الذكرى السنوية للكسرة الثابتة
بمناسبة الإحتفال بالذكرى السنوية للكسرة الثابتة يسرني أن أقوم بالرد على الإسئلة التى كان يسألنى لها القراء خلال هذا العام
س : ما هي قصة خط هيثرو والكسرة الثابتة التى تذيل بها مقالاتك منذ عام؟
ج : عشان تعرف اصل الحكاية أضغط على اللنك ده
ج : برضو عشان تعرف الإجابه أضغط على اللنك ده
س : وهل تمت الإستجابه بعد مقالك ده ؟
ج : عشان تعرف كدي أضغط على اللنك ده
س: طيب ممكن تورينا بالتقريب كده الخط ده إتباع متين؟ وبى كم كده؟
ج : قبل حوالي ستة سبعة سنوات يعني حوالى 50 مليون يورو !! لو ما أكتر
س: وهل الحكومة على علم بذلك؟
ج : والله (حمدو في بطنو) لكن هى أقرت بسرقة الخط قبل حوالي 3 سنوات من الآن
س : والحكومة عملت شنو؟
ج : قام البرلمان بإستجواب السيد وزير الدولة للنقل والذي قام بتشكيل لجنة تحقيق حول الموضوع
س : ولجنة التحقبق توصلت لشنو؟
ج : لجنة التحقيق توصلت إنو فعلاً الخط تم بيعه وتم تحديد الضالعين في مسألة البيع وكمان معاهم (السماسرة) وقد صرح حينها وزير الدولة للنقل عن اكتمال التحقيقات وتحويل الضالعين الي القضاء
(أضغط على هذا اللنك)
س : طيب والحصل بعد داك شنو؟
ج : القصة نامت .. ذيها ذي (الأقطان) ..ذيها ذي تجاوزات (المدينة الرياضية ) ذيها ذي أي ملف فساد
س : تفتكر نامت ليه؟
ج : عشان الناس طبعن تنسى الموضوع وكده .. ما نحنا شعب (زهايمر) وكده
س: يعني إنتا هسه الكسرة بتاعتك دى عشان توريهم إنو الشعب متذكر وقاعد منتظر محاكمة الناس السرقو خطو؟
ج : طبعن بالضبط كده
س : طيب ليه إنتا إخترتا (خط هيثرو) ده وما إخترتا أي ملف فساد تاني؟
ج : لأنو دي سرقة واااااضحة وما عاوزة ليها أي كلام يعني ما تفاوى فاسدة عشان واحد يجي يقول ليك نسبة الإنبات صحيحة أو ما فيها فطريات وللا شنو ما بعرف .. خط وإتسرق وإتباع لى شركة تانية وقاعدة تقدل بيهو !! يعني القصة ما عاوزة ليها المحقق كونان ممكن ضابط صف (يظبطا) وكده !
س : إلى ماذا تعزى تأخر تقديم المتهمين إلى محاكمة؟
ج : فقه السترة (طبعن) !
س : هل إذا تمت محاكمتهم سوف يسترد المواطن السوداني (خطو) وللا ح يسترد (قروشو)؟
ج : أفتكر دي مسألة قانون .. (ده لو فضل فيها قانون) وكده
س : هل تعتقد أن الإحتفال بمرور عام على الكسرة الثابتة سوف يجعل المسئولين يقومون بتقديم المتهمين إلى العدالة؟
ج : عدالة مين ؟ يااااخ ديل عليهم تخانة جلد . ما عادية؟
س : ليه مش المسئولين ديل بيطبقوا الشريعة؟
ج : أيوه بيطبقوها .. ويختوها يقعدوا عليها !
كسرة :
نشكر كل الصحف اليومية والإخوة الزملاء كتاب الأعمدة والمواقع الأسفيرية التى إحتفلت (حزنا) معنا بالذكري السنوية للكسرة الثابتة .. وسوف نشكر لها إحتفالها معنا بالذكرى (المئوية) إذا إستمر الحال كما هو عليه !!
كسرة ثابتة (نيو لوك) :
أخبار ملف خط هيثرو العند النائب العام شنــ(12+1)ــــو؟ .. شكلها حلو مش كدة؟
[/JUSTIFY]
الفاتح جبرا
ساخر سبيل
[email]gabra-media@hotmail.com[/email]
مبروك يا أستاذ وعقبال الشمعة ال 100 لانو أكيد ما حا يكون فى رد
وعدت…ووعد الحر دين أن تكون مشاركتي مفاجأة، وأرجو أن تعجبك يا جبرا…هي كسرات متعددة
كسرة الافتتاحية
[B]الليلة والليلة[/B]
الخط وينو ؟أكلو الدودو
الخط وين راح ؟ أكلو التمساح
الخط وين طار ؟؟ باعو السمسمار
يمكن نشلوووه…بالليل سرقووووه
بقول ليك يا زول
يمكن أكلو الغول
هوووي أنت شن بتقول ؟
ده كلام معقول ؟!
الحقنا سرييع يا انتربول
ولا أقول …تعالي جاي يا حاجة بتول
خط مسروق …خط منهوب
ما نحن خلااااص قلنا الروووب
هي يا حريم
قولن حي وقولن وووووووب
” الكسرة الأوووولى ”
مرّ عامن كااامل
للآن ما اتعرف سرو
وإيه اتبت في أمرو!!
وآآآآه …آه لوتدرو
الزول كاتم الوجع في صدرو
أها والجماعة شن قايلين ؟؟
لابدين سااااكت …لا نضمو لا ظهرو
لا اعترفوا لا.. ولا نكرو
ضاربين طناش في طناش
والشاطر يجيب خبرو
يااااربي عملو فيهو شنو ؟!
كتلوهو …قبال يتم عمرو ؟
لفوووهو …وطوااالي دفنوهو في قبرو ؟
سريع ..سريع ،قبل الناس تشم خبرو ؟
هو ذااااتو ..يا حليل الناس
زهجو وخلاااص فترو
عدمو الحيلة،حد ما سوو… رجعو وانكسرو
ضاقو المر..وبعدين استغفروا وغفرو
صبرو صبرا شديييد مافي زول…صبرو
بس مهما يطول الليل لابد يهل فجرو
بس قلم جبــــــــــــــــرا صااامد
يتابع ديمة في أثرو
يفتش جاي …يكوس بي جاي
غرقان جوووه في بحرو
يوم بي يوم ..لامن يتم شهرو
عارقين يا ناس …فقدنا الخط
وماظنيت عندنا تاني خط قدرو
ما بنساهو ..لا لا محال يموت ذكرو
ياحروم : قولن حي وقولن وووووب
” الكســــــــــــرة الوسطى ”
أخويا ياااا جبــــــــــــــرا
يكافيك رب الكون ..رب الحيلة والقدرة
يديك قدر نيتك ..يغطيك بالسترة
يشهد الله عليك ما قصرت …بالمرة !
جاهدت في إخلاص ..داير الحقيقة لو مُرة
شهور وراها شهور ….وأيام تترة
كتبت مااااخليت
كاتلت ماااكليت
لا زهجت لااامليت
وكمان ثبت لييييك كسرة
في سبيل وطنك ؟ نشهد ليك نحن ياااجبرة
ناضلت كنت شجاع ..عضيت علي جمرة
بس كفااااك يا أخوي
خايفين عليك من الغدرة
بي سبب هيثرو ما تموت لينا بالحسرة
ما بنستغنى عن قلمك
مادايرين نشوف ألمك
وكمان يا أخوي ورااااك أســرة
لو قست علينا سنين
لا لا ..لايهمك ، ما معروف إيه يكون بكرة
صبرنا صبرن مر
وبعد الصبر تجي النصرة
” الكســــــــــــــرة قبل الأخيرة”
وتاااني بقول ليك ياجبـــــــــــــــرة
بي قلمك بتجبر المكلـــــــــــــوم
دوام بتفتش غبينة المضيــــــــــوم
خلاص خليهو خط الشـــــــــــــــــوم
وعندي ليك فكــــرة
نقوم ونجهز الجثمان
والتشييع يكون بكرة
نلم الناس.. من كل مناطق السودان
يجو علينا في امدرمـــــــــان
وراسنا عديييل نتوجه علي بحري
نشيلو ونقطع الكوبري
عديل طواااالي يا خرطوم
ندفنو هنااااك في تراب أم دوم
ولو حبكت …ندفنو هناك في السلوم
خلاص الخط بقى مرحوم
نشيل الفاتحة
نحتسبو عند الله
وبرضو نصيح ..ووب يا وووب وحي يا وووب
ولازم نرضى بالمكتوب
ويا ناس اصبرو شوية
قدر جاااهو ووقع محتوم
وفي شنو الوووب ؟؟!! ولشنو اللوم
( الكسرة الختااامية ) انتهاء العزاء بانتهاء مراسم التشييع
خلاص الحط مااات
والبارح وفاااات
ونحن ناس اليوم
يعني شنو لو خطنا مات ؟!
كل حي مصيرو يموت
ووين شايفين في زول حيدوم ؟
مهما طالت الدنيا ، مصير القيامة تقوم
مادايم إلا وجه الله …يا حي يا قيوم
نتلمه عنو – عزّ وجلّ – في المحشر
كان ظااالم أو مظلــــــــوم
سبحان ربي الأعلى
حتى الحاكم بيجي محكوم !!
قدام جلالته نقيف حفايا عريانين
ما مغطيانا هــــــــــدوم
عشان يحاسبنا
بالعدل يقاضينا
عزّ وجلّ رب الكون
تعالى اللهُ ربنا العادل
رحيم وكريم
حاشا وكلا مااااهو ظلوم
البركة فيك ياجبرا وفي قلمك ، أحسن الله عزاءكم
يا جبرة يااخوي لا حياة لمن تنادي وربنايجعل هذه المثابرة في ميزان حسناتك والا يريك مكروها في خط اخر وانا شخصيا لم اتوقع غير هذه الصهينة لان البلد جبانة هايصة بلد تؤجر محلياتهتا الكراسي لستات الشاي وتستثمر في ما يخرج من سبيلي المواطن ويمكنك ان تسال عن اي حمامات بالسوق ستجد وراء ذلك محلية جهبوزة ان خائف بعد بيع خط هيثرو يقوموا يلغو خط جبرة وربك يستر ….
المسألة بقت خطيرة يا أستاذ جبرة، اقترح الدعوة لمسيرة مليونية تتجه لديوان النائب العام وتقدم له مذكرة ، ويطلبوا منه اتخاذ قرار خلال أسبوعين والا يتم هدر دمه.
ةالعاقبة للباقين من المتسترين على الفساد.
أولاً كل عام وانت في كل كسرة بخير وثانياً أخترع عليك كسرة العام القادم … بكسرة جديدة ثانية : أخبار بيوت السودان بلندن شنو ؟؟؟