إمرأة مثقفة جداً

قولتا ليو : ياخ جميل انو الزول يتزوج من مراة مثقفة ! فقرب يطير فينى .. قال لى ياخ انتا لانك ما جربتا ..قلتا ليو كدى احكى لى .. فهمنى .. و انداح صاحبنا … قال لى صدق انو امس القريبة دى جابت لى كستر محروق .. قلتا لي…ها دا شنو قالت لى (دا كستر عميق ! حاولتا اتخلص من السطحية البيبدو فيها الكستر فى صورتو النمطية فقمتا حرقتو )!! و يوم جونا ناس امى فتحت ليهم المطبخ و قالت ليهم الرو ماتيريال بتاعت الاكل فى المطبخ و كل التولس متوفرة فقومو اطبخو حاجة اكلوها و ما تنسو تعيدو ترتيب الفاسلتس ( العدة) كما كانت !! شرب ليو جقمة موية و واصل : تصدق ياخ مرة كدة عازم ناس وليد اصحابى للغداء جابت لينا حاجة كدة ما عرفناها تحلية و لا سلطة و لا شنو ! سألتها جوة يا بت الناس دا شنو ! قالت لى دى سلطة البينزينيلا اليونانية بالصوص ! غايتو لو ما صلاح عجنا لينا بى باقى الفول ما كان اتأكلت !! و الصالون ياخ الصالون مليان صور من اتفاقية سيداو ! و رسمات بتاعت سمك قالت فيها رمزية .. أنا بقيت حاسي انو الحيطة ممكن يطلع منها تمساح بعد دا .. دا كلو كوم و كديستا البتنوم معاها فى السرير كوم تانى .. اقول ليها يا مراة اجدعى الكديسة دى برة تقول لى ياخالد اتوغل معاى فى الفكرة و خليك مطاطى ! زول أنا و لا لستك ياخ!! زول ولا لستك جاوبنى !