فـي حـاجـة غـلط !!

تنـويه .. لو في طريقة يعني بعدين في التعليق أكتبوا رقم الحاجة الأغـلط

1
زمان كانت الغنية غنية والدعاية دعاية .. حسة مابتفرزوا الا اذا انتهت وحدة فيهم بي كلمـة
والآن
…!!

2
زمان كان الأولاد هم الـ بشاغلوا البنات والبت لمن يشاغلوها بتخجل ..
الغريبة حسة نفس الشي !!
( ماعايزين مشاكل مع ناس أعتقد يادكتور ومن وجهة نظري ديل )

3
زمان كان المغترب بيوصفوا بيهو .. يعني يقول ليك دا صاحب ود ناس فلان الـ سافر السعودية
حسة بقولوا : ياخ خالد داك الـ لسـة قاعد في السودان
أتقول قاعد في بيت أبـو واحد فيهم
!

4
زمان كان الناس بتزهج من الفيسبوك تقوم تقفلوا وتطلع ..
حسة الناس بقت تطلع مخصوص عشاااان تخش الفيسبوك !!
وعينك ماتشوف الا التـاق

5
زمان كان العقد في الجامع والقيدومة في بيت الجيران والدعوة في البيت الكبير والحنة قدام البيت والعرس في بيت العروسة والجرتق في الحوش بعد مايطردوا الأولاد
حسة العقد في الصالة والقيدومة في الصالة والدعوة في الصالة والحنة في الصالة والعرس في الصالة والرقيص زاتو في الصالة
وعادي جداً يكون أي واحد فيما ذكر سابقاً قبل التـاني
يعني العرس قبل القيدومة والخطوبة بعد الرقيص
والزفاف الضهر والغدا آخر الليل
شكلوا كدا سنتين تلاتة عشان مافي زول تفوتوا الزفة .. الناس حايصلوا الصبح ويتحركوا على الصالة
عشان يلحقوا التأشيـرة دي !!

6
زمان كان تلقى البت خاتة صورة مصحف مفتوح وفي نصو سبحة بنيّـة .. وتلقاها كاتبة ليها غنية بالانجليزي
hug me again n again n agaaaaaaain
وحسة تعاين لي نفس الاسم تلقى مكتوب قصادو :
اللهم لاتؤاخذنا بما فعل السفهاء منا
# DOAA

.. نـان السفـه دا كيفنو يالسمحـة ؟؟؟
!!

7
زمان كان الناس بتعرف بعض بعدين تعرس ويجيبوا أولاد و يسموا الأولاد
حسة بقت تعرف بعض وتسمي الأولاد طوالي
بعداك يعرسوا مايعرسوا دي حـاجة تـانية
!!
ديل هينين بالمناسبة .. مؤخراً بقى في ترتيب تاني كدا ..
ولا بلاش
!!!!!!

8
زمان الواحد يقرا ويقرا ويقرا عشان يتخرج ويبقى دكتور ويشتغل
حسة الواحد ببقى دكتور في الأول
ويقعد يقرا ويقرا ويقرا ويقرا ويقرا ويقرا
وبرضو مابشتغل
!!

9
زمان كانت صفحات الجرايد بسيطة لكين مليـانة
حسة الجريدة الواحدة فيها ألف صفحة وكلها فارغة و مافيها حاجة مفيدة الا مواقيت الصلاة
و صفحة الجرائم .. ناس عصابة أجنبية تسطو بجريمة منظمة على محل مناسبات وتستولي على عدد واحد غطاء حلة ولمبتين
متذكرنهم ؟؟؟

10
زمان البيت كلو بكون فيهو شريحة وحدة وغالباً كدا بكون شايلها رب المنزل
حسة الحبشية براها عندها أربعة أريبـا
!!

11
زمان الشركات كانت يامقاولات يا استيراد وتصدير
حسة كلها قلبت حـلول متكاملة
الناس دي بتحل في شنو الله أعلم
!!؟

12
زمان الـ بيتمرد ويشيل سلاح بيدخل المعتقل مروراً ببيوت الأشباح
حسة بيدخل القصـر مروراً بشيراتون الدوحة
!!

13
زمان الأطفال كانو أطفال
وبريئين وقنوعين كدا وامكانياتهم محدودة وحركاتهم المطلبية في حدود المعقول
يعني المثقف فيهم لمن يتقطع بيقول ليك أنا عاوز أتاري
قبل أيام سألت طفلة : لو جيتي الأولى عايزاني أجيب ليك شنو ؟؟؟؟؟؟
قالت : عايزة سونـاتا 2012 سودا ….. ومظللة !!
أها زي دي في عيد ميلادها أجي شايل تورتة بي يدي اليمين وشقة من مجمع النصر بي الشمال ولا كيـف ؟؟

14
زمان كان الواحد لمن يقطع الشارع بديهياً بيعاين يمين وشمال
حسة يعاين يمين وشمال للعربات وفوق للأنتينوف والسواريخ
والسواريخ دي تحديداً ماحيفرق كتير لو عاينت أو لأ
بس عالأقل تكون عارف في الحلقة الأخيرة انـت مت كيـف ؟؟
!!!!

15
زمـان كان لمن ترسل مسج مابتكون عارفها وصلت ولا لأ
حسة مع تطور الفيسبوك بيوروك انها سين ات كدا .. وبالدقيقة كمـان
لكين برضو أهو قدر أخف من قدر
و seen
بتاعت الفيسبوك
ولا الـ last seen
بتاعت الواتس اب
قبَـضَتك قبَـضَتك ياحبيــب