ما تخليو ! أجررررى وراو !

هووووب بلم فيك .. بيفاجأك ..بيختك فى ال(لا خيار) .. يعنى مثلاً مثلاً .. تكون طالع مع اصحابك من عقد زميلكم الفى جبرة .. و عندك موضوع انيق لى باقى اليوم مع الشباب .. وانت طالع يلم فيك الزول اياهو … يقول ليك ..حبيبنا معااااااكم أنا .. نتقدم سوا على السوق العربى .. تقول ليو ياخ انا ما سايق ! يقول ليك : فى اجمل من المواصلات .. تقول ليو زحمة شديدة الليلة .. يقول ليك يا حبيبنا نونس سوا ! نكسر الزمن ! يكسر نخرتك ياخ ! تركبو توووولب يركب معاكم .. نشيط كيف ! ينط فى الحافلة ذى الارنب .. و لى حظك المهبب يقعد فى الكرسي المواجهك فى الهايس داك ! و يبدا يحكى عن انو كيف زول راااااااااائع و ظرييييييييييف و مواقفو المرحة و حياتو الصاخبة و و و و و و و و و و سكان الحافلة قاعدين ذى الطلبة .. يسمعو بالغصب .. وانت تكون بقيت عامل ذى صابونة لوكس فى بيت عزابة ! و تقوم تصل ( الييلد بوينت) ودى النقطة البينتهى فيها السلوك المرن للمعدن ! و تقوم تقرر انو تتفرغ ليو .. تنتقم منو .. و تقبل عليو .. و تستخدم سلاحو .. ..تقول لى فردك شباب اتقدمو لى .. انا بلحقكم .. بس عندى موضوع مع الزول دا … تقعد معاو على انفراد … وهاااااااااااااك يا معط … تحكى ليو بدووون توقف.. عن حبك للمريخ .. و الكفتة .. و العجلات .. و المصارعة الحرة .. والجيوجستك .. والبطاريق .. و القمصان الفرنسية .. و البيتزا بتاعت ديبونيرز .. و مديدة السمؤال .. و مسائل الفيزياء .. والسلطة الخدرا .. يجى يقوم ..تجرو من فلينتو … وتواصل عن مهارتك فى بليستيشن 3 .. و كورة الطايرة .. و مصارعة الثيران .. وركوب الامواج ..الشطرنج.. رمى الجلة .. و عن مغامراتك فى روسيا .. و ساحل العاج .. وجزر السقط لقط … وكلو ما يجى يفتح خشمووو تكون انت راااااااااااااااشى .. لحدود ما يقوم يتكرفس .. و ينكمش .. و يبقا عامل ذى قرقوشة قاعدة فى راس بيت من فيضان تمانية وتمانين .. و يقوم يقرب يبكى .. ويقول ليك : حلنى منك ياااااااااااااخ ! خلاااااااااااااااااس …كفااااااااااااااية … و يشيل شباشبو و يقوم جااارى .. ما تخليوووو ! أجررررى وراو !