المباراة دي فاقدة (ترباس) !!

صناعة (سيدا) في استاد الهلال ظهرت في استاد الخرطوم
قاعدين نقلب في القنوات …مرة نمشي على الفضائية السودانية ..ومرة نقلب على قناة النيلين.
ومرة نمشي على (التلاجة) نشرب لينا …موية (باردة).
في الفضائية القومية (قناة الناس الكبار) …الهلال متعادل …وفي قناة النيلين …المريخ مغلوب.
دا شنو؟…الدوري دا مالو سخن كدا .. بقى زي الدوري الانجليزي …النتيجة ممكن تتغير في 5 دقائق.
بقينا نتعادل في استادنا ..تقول استادنا دا بانياه لينا الحكومة …عشان فريق الخرطوم (الوطني) يتعادل معانا.
ما عندنا ثقة في الهلال …ممكن عادي (نتعادل).
الايامات دي اصلو في موضة (تعادلات) حايمة علينا.
الهلال طردو منو لاعب من الشوط الاول …ايكانغا دا ماشي (متطور)..بقي يجيب اقوان.
وبقى بدل الكرت (الاصفر) بيأخذ ليه كرت (احمر).
دا تطور ملحوظ.
ايكانغا دا يكون فاكر السودان ما فيها (كشافات)..عشان كدا من تمغرب بشتغل (خبط).
يا كابتن انت قايل نفسك في (جزيرة الكنز)…مالك عاوز تبقى لينا زي (بلة جابر) أي مباراة بي (كرت).
ايكانغا دا بقى زي قناة الجزيرة المشفرة …ما بشتغل إلا بالكرت.
الزول دا من الليلة اسمو قناة الجزيرة 9.
عشان المواضيع تبقى واضحة …اصلو نحن ما بنحب اللخبطة.
ونحن أي حاجة عندنا بي نظام.
رجعت التلاجة …جبت لي (جركانة) موية باردة.
كوز واحد ما بحلك من الكورة دي …عشان كدا ..احسن تجيب ليك (جركانة) موية عديل كدا.
قلت ليكم …الهلال لاعب ناقص.
وهلال كادوقلي عامل حصار على الهلال.
الكورة دي في (كادقلي) وإلا في ام درمان؟.
لا …(النجيلة) دي ما نجيلة كادقلي.
صرة حمد كمال دي ..صرة زول لاعب في كادقلي.

غايتو بعد دخول هيثم مصطفى شكلها كدا في (لبشونة).
لكن قبل كدا.
معقولة دا استاد الهلال …طيب ليه الهلال ظاهر بالشكل دا..تقول لاعب ضد الترجي التونسي.
فجأة كدا ..اشوف ليك (النجيلة) خضرت.
الكشافات ..منها وليها قعدت تضحك.
والجمهور كلو صنقع.
والجركانة رجعت تلاجتها.
في شنو يا جماعة؟.
هيثم مصطفى حفظه الله ورعاه ..قام يسخن.
يسخن شنو؟…انتوا بتلعبوا …هسع يسخن هيثم مصطفى …غارزيتو يدخل جمعة جينارو.
اصبروا يا جماعة ما تضيقوا.
ما تستعجلوا …خلونا نشوف فهم الفرنسي دا شنو؟.
اصلو قالوا في اللغة الفرنسية ..لما يسخن صانع اللاعب …بدخل حارس المرمي.
الجدعة في اللغة الفرنسية …ضربة ركنية. والفاول جدعة تماس.
اللغة الفرنسية كدا …عاوزين تغالطوا كمان.
يوسف محمد دخل ..وطلع نزار حامد…دا شنو يا كوتش؟.
قالوا لينا في اللغة الايطالية ..الوضع اصلو كدا ..يطلع لاعب نص ..ويدخل طرف يمين.
اللغة الفرنسية عرفناها …كمان عاوزين تنظروا لينا في اللغة الايطالية.
مرة كنت بحضر لي في فيلم ايطالي خطير.
في نص الفيلم كدا …شفت ليك واحد شغال في (كمينة طوب).
قلت ليهم دا شنو دا؟…قالوا لي دا دكتور العيون في ايطاليا.
دكتور العيون الجابو كمينة الطوب شنو؟.
قالوا لي دكاترة العيون في ايطاليا بشتغلوا في الكمائن.
والله نحن اطباء العيون بتاعننا مرتاحين في دمهم …الواحد فيهم لو تعب شديد كدا بكتب ليك (قطرة).
عليكم الله هسع (القطرة) دي عاوزة ليها قراية 6 سنوات.
الموضوع ما محتاج لي التعب دا.
تلقى الدكتور بتاع العيون شايل ليه (قاموس) قدر الكتلة ..وقت تجيه بتشكي من حاجة ..بكتب ليك (قطرة).
القطرة دي طالب اثار ..ممكن يكتبها ليك …ما عاوزة (الجكة) الطويلة دي.
المحيرني …الدكتور بتلقاه لابس روب…تمشي ليه في البيت ..بقول ليك تعال لي في العيادة.
تمشي ليه في العيادة ..بكتب ليك (قطرة).
عليكم الله هسع (القطرة) دي ما كان ممكن يكتبها ليك في البيت.
يعني إلا يتلتلك ..ويوديك العيادة ..ويدفعك دم قلبك.
انت يا غارزيتو عاوز اقول ليك حاجة بالايطالي.
حاجة زي (البيتزا) حقتكم كدا.
ألعب لينا انت بالواضح ..بقينا ما بنفهمك …مرة تلعب لينا بالفرنسي ..ومرة بالايطالي.
ونحن والله (نجيلتنا) ما بتقدر على الحاجات دي.
ولا بتستحمل الشيء دا.
نجيلتنا على قدرها ..فهمها (حبة)…عشان كدا يا غارزيتو ..ما معقول كل مرة تجينا بي نظرية.
يوسف دخل ..ونزار حامد طلع …قلنا الحاصل شنو يا جماعة ..نزار دا احسن لاعب في الوسط.
احسن لاعب في المباراة كلها.
قالوا لينا اسكتوا …ما تتكلموا ساكت ..دا شغل فرنسي …انتوا ما بتفهموه…الزول دا لعب في كأس العالم للاندية…عاوزين تورهو انتوا شغلو.
الزول دا لعب في اليابان ..ما تقعدوا تقاطعوا فيه ساكت.
طيب نفهم بس ..يوسف محمد دا لزومو شنو؟.
المدرب الشفت دي يكون عاوز يجهز يوسف محمد للمباراة القمة.
اقصد يكون عاوز (يصيب) يوسف محمد …عشان يطلعو من حساباتو في مباراة القمة.
في واحد قاعد جنبي …كل مرة بسبقني على (جركانة) الموية القديمة ..(قبل دخول هيثم مصطفى) ..قطع ليه كوز ..وقال لي انت عارف يوسف محمد دا يكون داخل (وفد مقدمة) لي هيثم مصطفى.
هيثم مصطفى بعد الغيبة دي ..ما بشارك في المباراة ساكت.
الزول ما تم كلامو ..شفت ليك هيثم مصطفى على الخط …(النجيلة) فلاجاتها ظهرت.
والكشافات بقت تضحك من الاضان لى الاضان.
نجيلتنا دي ما فاضل ليها إلا تشيل (زهور).
الناس كلها قبلت على فضائية السودان.
قناة النيلين ناس بلة جابر يسوطوا فيها زي (فطور السماية) …ما بتفهم فيه أي حاجة.
الحاجة الوحيدة البتفهمها فيها ..(عصيدة التمر).
هيثم مصطفى دخل..زي الكان داخل ليه بي (عود) او (كمان) ما عارف ..غايتو الزول دا كان شايل ليه معاه آلة موسيقية.
هيثم مصطفى شارك بي هنا …العجب ذاتو فتح ليك بي هناك.
هيثم دور ليك في استاد الهلال وفي استاد الخرطوم.
دور ليك في الفضائية السودانية وفي قناة النيلين.
كمال حامد ..عمتو عاوزة تقع.
الحسابات كلها اتلخبطت.
الهلال جاب ليه هدف.
ساني سجل ليه هدف …بعدو طوالي ثبتو ليك العيد ..يوم الجمعة 26 اكتوبر.
عشان ما تقعدوا تغالطوا ساكت.
هيثم مصطفى لعب ليه باص لي ساني (يا ربيع الدنيا) ..ساني بدون ما يشعر كدا ..لقى ليك نفسو براهو (انا والنجم والمساء).
ساني قاعد براهو.
قاعد في السهلة.
ساني الخطوة الاولى والثانية ..طوالي سجل (ما بصدقكم).
هدف على طريقة عثمان حسين…ما فيه مقدمة موسيقية …طوالي بدخل ليك في متن الاغنية.
ساني قال ..انتوا دا كنتوا داسنو وين؟.
دا جنسو شنو؟.
ساني من الفرحة عاوز يشاكل.
زولكم (قبقب) ليك هيثم مصطفى ..لمن هيثم فهم حاجة ..طيب ما تقول كدا من الصباح.
شوية كدا …الشغل دور صاح.
الشغل بالجاز.
اقصد الشغل بالبرنسة.
او قول الشغل بالغرزتة.
غارزيتو ..لمن اتبسط في كنبتو.
شوية كدا …كاريكا لعب ليه كورة لي هيثم مصطفى.
هيثم مصطفى عمل (زاد الشجون)..وثبت في صدرو ..ولعب ليك الكورة لي مهند الطاهر (حلم الاماسي).
مهند الطاهر طبعا ما بكذب ..طوالي شات الكورة (جاني طيفو طائف).
هدف على طريقة محمد الامين.
الكورة دي من قوتها ..لا عارفها دخلت في ابوعشرين بتاع (هلال كادوقلي) ..لا اقول ليكم دخلت في حافظ حارس (النسور).
يا ود الناس دا شنو اللخبطة دي؟..حافظ حارس هلال كادوقلي ..وابوعشرين حارس النسور ..والحضري حارس المريخ.
هسع الحضري ذنبو شنو؟.
اعمل ليكم شنو ..باص هيثم مصطفى دا …حولت قناة النيلين ..لقيت ليك المريخ جاب ليه قون.
دا باص مشترك.
باص مزدوج.
لكن يا مهند …انت صحي قالوا غيرت تردد (هوبتك).
هوبتك دي في تلفزيونا بقينا ما بنشوفها.
عليك الله لو بدلت (التردد) حق الهوبة …نزلوا لينا في مباراة السبت.
باقى نحن بنحب (الهوبة)..وبنشرب بيها شاي الصباح.
وانت يا غارزيتو ….هيثم مصطفى دا البقلب نتيجة المباراتين …ما بخطو في الكنبة.
ويا ناس المريخ ..لو هيثم مصطفى ما نزل …كنتوا لي وقتنا دا بتكونوا مغلوبين من النسور.
الله شافكم بس.
الشيء شنو؟.
قون هنا ..وقون هناك.
جبنا التالت …جابو التالت …المباريات الفي توقيت واحد دي ..فاقدة (ترباس) بس.
الشغل دا .. شغل ترباس ….ما شغل هيثم.
قون كل 5 دقائق…دا شنو دا؟ …مباراة ..وإلا حفلة في المسرح القومي؟.
يا ناس المريخ لو دا فريقكم …هيثم مصطفى دا .يوم السبت إلا يقعد ليكم في (المقصورة).
عشان هيثم دا لو قعد ليكم في (الكنبة) ساكت بجهجهكم.
عندي ليكم وجهة نظر.
وجهة …ما فيها أي تنظير.
باسكال دا يوم السبت شوفوا ليه (نضارة).
قالوا بقى ما بشوف بعد السابعة.

ملحوظة : باسكال براهو.

هوامش
اذا لعبنا مباراة القمة يوم السبت القادم …والعلاقة بين غارزيتو وهيثم مصطفى (سمنة على عسل) …يبقي المريخ دا إلا يشوف ليه بلد.
تصريح غارزيتو في حق البرنس …كان تصريحا شجاعا ..وما بصدر إلا من مدرب كبير …وهو بقول بعد كل تصريحاته السابقة في حق هيثم مصطفى ان البرنس لاعب كبير وانه غير نتيجة المباراة …وسوف يحتاج له في المباريات القادمة.
ما مهم ..يلعب هيثم او ما يلعب…يقعد في الكنبة او ما يقعد ..المهم تكون العلاقة تمام بين المدير الفني والقائد …لأن هذه العلاقة بتنعكس بشكل واضح على استقرار الفريق.
وافتكر ان مجلس الادارة اذا اراد ان يحقق فريقه البطولات التى ينافس فيها …عليه ان يوفر الاستقرار للفريق.
وهيثم مصطفى وجوده يؤثر حتى على المدرجات …والجماهير.
باقى من الموسم اربع مباريات في الممتاز و5 مباريات في الكونفدرالية ..وعلى ما اعتقد 3 مباريات في كأس السودان ..يعني الموسم كلو باقى فيه 12 مباراة.
هذه المباريات تماسكوا فيها وكانوا اسرة واحدة ..وروح واحدة …وهم الجميع هو ان يفوز الهلال بالبطولات التى ينافس فيها.
بعد كدا …هيثم مصطفى ما عندو مانع حتى لو شطبتوه.
هيثم مصطفى همو الاول والاخير …الهلال …وهو بقدم مصلحة الهلال على مصلحته.
صحيفة عالم النجوم ..وعبر كل كتابها وطاقمها التحريري ظلت تعطي هيثم مصطفى احتراما وتقديرا خاصا رغم دفاعهم عن المجلس والجهاز الفني للهلال.
دافعوا عن وجهة نظرهم دون الاساءة لهيثم مصطفى …وهذا شيء تستحق عليه صحيفة عالم النجوم التحية.
هيثم مصطفى …قيمة نتفق عليها جميعا …والذين يختلفون معه ..يحتفظون له بالتقدير والاحترام.
المرحلة القادمة …نحتاج الي ان يفتح الجميع صفحة جديدة.
الهدف الاول والاخير فيها ..فوز الهلال.
الممتاز والكونفدرالية وكأس السودان …كل هذه البطولات …الهلال هو الاحق بها.
ليس هناك افضل من الهلال ليفوز بهذه البطولات.
فريق النسور ..تقدم او لم يتقدم على المريخ …يأتي في النهاية ويخسر امام المريخ.
فريق النسور ما بنستر.
مباراة هلال كادوقلي والمريخ ..هل سوف تلعب في الموسم القادم؟.
يا ناس المريخ …الخريف انتهى في كادوقلي.
يعني ما بتجيكم عوجة.
جاء في تقرير اللجنة الذي عينت لمعاينة استاد الحصاحيصا …حسب ما نشر في موقع (سودانا فوق) …ان الملعب جاهز بنسبة 90%.
المضحك ان اللجنة ومع هذه النسبة العالية لاجازة الملعب وضعت هذه الملاحظات.
منطقة السنتر ظهر التور = تساوي.
منخفض الناحية الشمالية الشرقية قدام الراية الركنية.
منخفض في الجهة الشمالية الغربية قدام الراية الركنية.
منخفض الناحية الجنوبية الغربية اتجاه راية المرمي.
منخفض الناحية الجنوبية الشرقية تجاه راية المرمي.
منطقة المرمي الجنوبية منخفض تراجع.
طيب يا جماعة خليتو شنو للبهدلة.
على كدا …استادكم دي ما فيه حتة جاهزة.
الغريب بعد دا قالوا الاستاد جاهز بنسبة 90%.
والله ملعبكم بهذا الوصف الذي وضعته اللجنة …مزرعة ارانب ما بنفع.
معقولة بس.
مباراة القمة يوم السبت …الهلال محتاج ان يلعبها بي مزاج.
يعني مباراة ما فيها ضغط ..وما فيها توتر.
مباراة للمتعة.
خلوا ناس مهند الطاهر ومدثر كاريكا يعملوا فيها أي حاجة.
أي لاعب في الهلال في المباراة دي ..يعمل الحاجة الفى رأسو.
مفروض غارزيتو يعطيهم فرصة …عشان يمتعوا الجمهور.
نحن فترنا من خطط غارزيتو …الحربية دي.
عاوزنك يا غارزيتو ..تفكها شوية.
جمهور الهلال مطالب في مباراة القمة ..الاحتفاء والاحتفال بي غارزيتو.
مطلوب من جمهور الهلال ان يقدم لمدربه الفرنسي صورة مغايرة عن تلك الصورة التى حملها عن الجماهير.
لا سيما وان غارزيتو ابدى نوايا حسنة ..واثبت انه ما عندو مشكلة.
مطلوب من الجماهير ..ان تؤكد لهذا المدرب الذي لم يخسر حتى الان ..ولن يخسر ان شاءالله ..احترامها الكبير ..وتقديرها العظيم له.
اذا فتح غارزيتو صفحة جديدة …فان الجماهير مطلوب منها ان تفتح كتاب جديد عديل كدا.
غارزيتو ..عمل في ظروف صعبة …وواجهته الكثير من العقبات ..ولم يجد السند الجماهيري الكافي في هذا الموسم …مع ذلك هو يتصدر الممتاز والكونفدرالية..وهو لم يخسر حتى الان.
اذن ومن منطلق (صفحة جديدة)…احتفلوا بهذا المدرب.
واذا وجد غارزيتو السند الجماهيري ودعم المدرجات في مباراة السبت ..سوف يلحق هزيمة تاريخية بالمريخ.
الجماهير عليها ان ترد التحية لغارزيتو بما هو احسن …ونتمنى ان يكون ذلك من التمارين التى تسبق مباراة القمة.
روابط الهلال الجماهيرية ..بمختلف مسمياتها …مطلوب منها التحرك من اجل الاحتفاء والاحتفال بي غارزيتو.
مباراة القمة …الانتصار فيها يمر عبر الاحتفاء بي غارزيتو.

عاجل : يا الحضري نحن في انتظارك.