أسرار مذاعة!

[ALIGN=JUSTIFY][ALIGN=CENTER]أسرار مذاعة![/ALIGN] هل نحن شعب ثرثار؟.. قد تتباين الآراء والمواقف تجاه هذا السؤال.. لكني اليوم بدأت «أرخي أذني» لكل ما أسمع في كل مكان أقدم عليه.. أستيقظت مبكراً وجدتني أرصد كل ما يقال في البيت في ذلك الصباح .. «جيبوا الشاي» «أعملوا الشاي سريع» «بالله الشاي أدينا ليهو في كبابية كبيرة».. «الأيام دي البرد أحسن تشرب الشاي بدري» «الشاي.. الشاي» فوجدت أن عدد الكلمات التي قيلت في حق هذه «الكباية» أكثر مما تستحق.. وتمر الساعات ثم خرجت للشارع ودلفت داخل المركبة العامة وتلفت يمنة ويسرة وجدت معظم الركاب يحتضنون «موبايلاتهم» وكماً هائلاً من الهمس.. أما ذاك الشاب الذي جلس في الركن القصي بدت «ونسته» عالية الصوت كأنه لا يتحدث للجوال فقط «أيوه.. أمبارح عقدنا ليهو» فهمست لنفسي «جخاخ تلقاك معزوم بس»، فواصل حديثه المرتفع الصوت «يا زول تمام البيت ذاتو بنيناهو ليهو أوضتين طوب أحمر».. فهمست لنفسي «وقت بتبني للناس بيوت ما كان تعمل ليك عربية ترفع كراعك من المواصلات العامة».. وأستمر في حديثه «أها مسفرين حليمة الأردن ومتابعين معاها الإجراءات»، قلت لنفسي «شوف بالله الكلام الكبار».. فواصل في حديثه «الأيام دي ناس علي والزين قاعدين عاطلين والله عربية ما عندهم.. شغالين بس يشيلوا عربات أصحابهم لمن يسافر أو لمن يكونوا ما فاضين.. يا زول الدنيا عصرتم عصرة شديدة»، فصحت في داخلي «فضح الناس لزومو شنو».. وتمدد في كرسي المركبة عندما نزل أحد الركاب وتعالى صوته «والله هويدا طلقوها وهسة قاعدة عند ناس خالها والله أكان ركبت رأسها حتكون دي آخر فرصة ليها».. وضاقت أخلاقي فوجدت نفسي أتكلم اليه إشارة يا أخي «خفض صوتك شوية.. عرفنا مشاكل أهلك كلها»، فودع المتحدث اليه «طيب يا أخي برجع ليك بعد شوية» وألتفت إليِّ «يا أخت مالك.. راكب زي زيك بحقي وبتكلم في موبايلي.. مالك.. الدخلك شنو».. فترددت في التحدث ولكني أستجمعت كل قوتي وقلت «يا أخي عارفينك راكب بحقك لكن إتكلم في حدود سمعك.. إنت سمعتنا كل كلامك قوة وعنوة.. برضو في حاجة اسمها الذوق العام..».. فرد بصورة أكثر حدة «أكان ما عاجبك أرح بالحافلة القسم..»، وطبعاً القسم مقصود بيهو قسم البوليس.. فتصايح الركاب «صلوا على النبي».. «عليه الصلاة والسلام».. وتوقف النقاش عند هذا الحد وطفق الرجل «يدق على تلفونه» ويواصل في ذات الأطر الكلامية.. ولأنه راكب بحقه والدنيا حقي وحقك لم أجرؤ على قول كلمة «بقم».. حمدت الله أن وصلت إلى المكان الذي أنزل إليه.. فهرولت هرولة إلى مقصدي وأحسست «بعطشة».. فدخلت إحدى «البقالات» وأخذت «القارورة» تحدث إليّ البائع قائلاً «شكلك عطشانة زي الصائمة».. وحتى لا أدخل مرة أخرى في نقاش وخذ وهات أكتفيت بهز رأسي إيجاباً.. وبالقرب من مدخل الجهة التي قصدتها وجدت النقاش محتدماً بين البعض و«كمية» من الفضائح والتنابذ بالألقاب.. فصممت أذني ودخلت ولم أحس بالراحة ونقاء الجو إلا عندما وصلت إلى مقصدي. آخر الكلام: نشر الكلام بلا تروٍ ضرره أكثر من فائدته!
سياج – آخر لحظة -العدد 818 [/ALIGN]