حوار الساعة مع والي جنوب كردفان (آدم الفكي )!!

2013/08/29

[JUSTIFY]تكتسب ولاية جنوب كردفان أهمية بالغة في حلقة الصراع الذي يدور بين الحكومة والجبهة الثورية، وربما كانت هي أكثر الولايات تأثراً بالعمليات العسكرية في الآونة الأخيرة.. وهو الأمر الذي جعل المهندس “آدم الفكي محمد الطيب” يرث تركة ثقيلة بعد مولانا “أحمد هارون” مكلفاً بمهمة إدارة الولاية المحتقنة. الذي وتقول سيرة «الفكي» الشخصية إنه من مواليد ذات الولاية، ودرس متنقلاً بين مدن البلاد المختلفة حتى أكمل دراسته الجامعية في المملكة العربية السعودية.
إستراتيجية واضحة للتعايش ورتق النسيج الاجتماعي والسلام الداخلي للولاية، يبدو أنها حزمة مواضيع تؤرق بال الوالي الجديد الذي تقلد منصبه خلال شهر رمضان الماضي.. (المجهر) التقت بوالي جنوب كردفان وأجلسته على منضدة حوار تطرق فيه إلى قضايا السلام والأمن والنزوح بالولاية.. وأظهر خلاله معرفة دقيقة بشؤون ولايته وإن كان قد أبدى غضبه حول بعض القضايا التي أثرناها معه، إلا أنه رد عليها.. فإلى مضابط ما خرجنا به من حوارنا مع والي جنوب كردفان.

} ما هو تفسيرك لحالة السكون في ولاية جنوب كردفان وعدم حدوث هجوم من الطرفين منذ توليك أمرها؟
– هم لم يهاجموا لأنو ممكن يكون عندهم خططهم، وأنا ما عندي بيها شغلة، ولكن تحليل الجو العام ماشي في اتجاه إطلاق سراح السياسيين وفتح الاتصالات الهاتفية وغيره مما خلق جواً إيجابياً بعدم المبادرة بالهجوم.
} هل وصلتك أي اتصالات منهم؟
– لا لم تصلني أية اتصالات ولكن دا التحليل.
} إنت قلت إنو في ناس منهم هنأوك بالولاية؟
– نعم.. كتار منهم أصدقائي مافي إشكالية، وإنت كصحفي هسع بتعرف منهم ناس كتار.. التمرد في جنوب كردفان ليس تمرداً بين دولتين.. نحن في مجتمع متواصل ويجب أن نهيئ الأجواء العامة، ونحن الحاجة الشغالين فيها أن نبني ثقة بيننا والمجتمعات الداخلية وأن نبني الثقة بيننا وبين الطرف الآخر، وأن قضية الحرب دي لو إنتو مشيتوا فيها ما بتوصلكم لنتيجة.. ولا توجد أية قضية في الدنيا حسمت عسكرياً.. الثقة عايزة بنية تحتية وأهم شيء الثقة بين الناس، ونوحد الناس في اتجاه السلام.
} مولانا “أحمد هارون” ترك ليك تركة ثقيلة؟
– لا.. لا.. مولانا “أحمد هارون” لم يترك تركة ثقيلة، واشتغل بكفاءة عالية جداً وقاد المعركة بصورة عادلة، وكل شيخ عندو طريقة.
} ماذا عن الأخبار التي تداولها البعض بخروج تظاهرات في الولاية تطالب بإقالتك وبعودة “أحمد هارون” إلى الولاية؟
– مافي كلام زي دا.. وأنا لم أسمع بأية تظاهرات.
} ألم تكن هناك أصوات احتجاجية تطالب بإقالتك؟
– المجتمع حتى في عهد الرسول “صلى الله عليه وسلم” لم يكن موحداً، وحتى الناس لا يمكن أن يكونوا على قلب رجل واحد.. ودي ممارسات ديمقراطية عادية جداً.
} هل تعتقد أنك تحظى بقبول عريض داخل الولاية؟
– أنا لا بفتكر ولا بقدر، أنا زول مبتعث من المؤتمر الوطني لتنفيذ برنامج محدد، وأنا أرتب بناءً على الرؤية الموجودة داخل المؤتمر الوطني وأنا زول ممثل لحزب.. أيه تحظى دي؟! هذه ألفاظ تصنع الفراعنة.. وتحظى والجماهير يريدوك، وعشان تبقى القضية منطقية إنت ما بتحظى وأنا ما بحظى.. أنا زول صغير في المؤتمر الوطني وأنا نائم في بيتنا المؤتمر الوطني قال لي تبقى والي وجيت عشان أنفذ سياسته.. وبالتالي كل الموجودين في هذه الحلقة مفروض يصطفوا معاي لتنفيذ سياسة المؤتمر الوطني.. بعد شوية المؤتمر الوطني رأى إني أمشي ويجي زول تاني أنا ذاتي بمشي أقيف في الصف وأنفذ معاهو سياسة المؤتمر الوطني.
} مع تقديرنا لحديثك وتنزهك عن الفرعنة.. لكن نقول إن أي شخص يؤمر على شخصين أو ثلاثة يجب أن يكون له قبول إن كانت كلمة (تحظى) لا تعجبك فما بالك بولاية كاملة.. هل تعتقد أن لديك قبولاً داخل ولاية جنوب كردفان؟
– ليس لديّ أية معدلات قياس.. وأنا بنفذ في برنامج وإنتو كصحفيين مفروض تكون عندكم معدات قياس.
} يعني بتقعد في برج عاجي وما بتنزل للناس عشان تعرف بيفكروا في شنو؟
– لا.. لا.. أنا ما حأقول ليك أنا مقبول ولاّ ما مقبول.. لأنو معدلات القياس مافي زول بيقيس نفسو.. ليه عايزين تعملوا معدلات قياس عشان أقول ليك أنا مقبول ولا ما مقبول.. أنا ما مسؤول من معدلات القياس.. أنا مهندس.. وإنت أعمل لقاءاتك مع الجماهير وأعرف النتيجة وحدك.. لكن يجي الوالي ويقول ليك أنا عندي قبول ولاّ ما عندي قبول دا تفكيرو ما سليم.
} نحن نتحدث وفقاً لمؤشرات معينة؟
– مؤشراتك دي تقيم بيها إنت، لكن أنا مع مبدأ مافي زول بيجي يقول أنا كويس وعندي قبول وعندي جماهير.. القصة دي ما صحيحة.
} ذكرت في حديثك أنك بصدد تكوين حكومة ذات قاعدة عريضة.. هل وجدت أي رفض من قبل القوى السياسية بالولاية؟
– حتى الآن لم نكتشف.
} هل عرضت عليهم المشاركة؟
– لا.. ولكن القوى السياسية شغالين معانا في الحكومة وعندهم مجلس بتاع أحزاب، واتفقنا كلهم حيشاركوا معانا ومولانا “أحمد هارون” عمل ليها أساس.
} هل أضيفت لهم أحزاب جديدة؟
– لا.
} إذا الحزب الشيوعي طلب المشاركة؟
– مافي مشكلة.. جنوب كردفان ليست ملكاً لحزب معين، ولكنها ملك لكل الناس.. بالتالي قعدنا مع المؤتمر الشعبي وكل الأحزاب.
} هل جلست مع الحزب الشيوعي؟
لم يأتوا إليّ.. جوا ناس العدالة والبعث وكل الناس قالوا رأيهم والطاولة دي مفتوحة لكل الناس.. نحن عايزين كل الناس يشيلوا معانا الشيلة عشان نطلع بجنوب كردفان لبر الأمان.
} هل ستمنحهم مواقع مهمة أم هامشية؟
– والله طبقاً للحصة هي ذاتها كم وحيشاركوا، وعندي (8) وزارات ممكن هم ياخدوا خمسين في المية منها وأمنحهم معتمدين وغيرها.. القصة دي لسه وفق أولوياتنا المحلية..
} هل ممكن يشارك معكم حزب في الولاية دون أن يكون مشاركاً في المركز؟
– نحن نمثل المؤتمر الوطني، وعامل اتفاقيات مع الأحزاب وعامل معاهم مذكرات تفاهم، وبناء على تلك المذكرات الموجودة دي نحن ننفذ قرارات المؤتمر الوطني.
} ولكن حزب العدالة مثلاً يشارك على المستوى المحلي دون أن تكون له مشاركة في المركز؟
– نعم.. ولكن لديه اتفاق مع المؤتمر الوطني على أن يشارك ولائياً، والاتحادي الديمقراطي عندو اتفاق مع المركز.. نحن فقط نجيب الكلام دا ننفذوا على أرض الواقع.
} إذن بعد مرور وقت قليل على تقلدك منصب الوالي.. ما هو الوضع الآن فيما يخص الملفات الأمنية والإنسانية في الولاية؟
– الوضع الأمني الآن مستقر كويس، والإنساني ممتاز. وحسب المعلومات الوضع الإنساني للناس الموجودين في الحركة فيهو إشكالات بتاعة أكل، وعشان كدا نحن دعينا للسلام من الداخل لحل هذه القضية، وقضية التفاوض الكلية في إطار المسارات وغيرها دي بيتفاوض فيها المركز.
} الجبهة الثورية تقول إنها تحاصر الدلنج؟
– لا.. الآن مدينة الدلنج غير محاصرة ولا توجد فيها أي مهددات.
} تحدثت بمرارة عن الأوضاع الخدمية في الولاية عامة وفي التعليم خاصة؟
– نحن عندنا واقع، والمعلومات الموجودة على مستوى التعليم، في المدارس مفروض يكون عندنا (258550) طالباً على مستوى المراحل الدراسية، وتقيس القصة دي بناءً على معدل السكان ونحن ولايتنا فيها (2) مليون مفروض يكون العدد الذي ذكرته، والعندنا الآن (57) ألف فقط ودي إشارة سالبة.. الثانوي العالي فيهو (30) ألف، وفي (20) ألف غير موجودين، والسنة دي الممتحنين (8200)، ودا العدد الذي جلس لامتحانات الشهادة السودانية، وعشان تعمل معدل قراءة تشوف الممتحنين كم في السودان وتقسمها على نسبة الممتحنين في الولاية تمنحك إشارة إلى أن قصة التعليم عايزة حاجة، ونسبة النجاح (53) في المائة، الناس بينافسوا للجامعات (2) ألف، ومن سيقبلون في الجامعة من السودان (200) ألف، ودي أيضاً مؤشرات سالبة ويجب أن نعدل، ودا عندو مسببات.. وفي كادوقلى مافي فصل أقل من تسعين طالب والأساتذة يشكون من أنهم يخرجون من فصل فيه مية إلى آخر فيهو تسعين، وأنهم لا يستطيعون تصحيح كراسات بكل هذه الكمية وكل الفاقد دا بيكون أثرو غير جيد في الولاية، عشان كدا نحن قلنا التعليم من أجل السلام كي نعالج مشكلة كادوقلي فقط أحتاج إلى (8) مدارس.
} ذكرت إنو الولاية كلها فيها (2) اختصاصي نساء وتوليد فقط؟
– نعم أنا ما جبت حاجة من عندي، أنا زرت وزارة الصحة وتقريرهم إنو عندهم فقط (2) اختصاصي بتاع نساء وتوليد، وبقية الولاية ما فيها، وفي واحد باطنية وآخر للجلدية، وديل الأربعة فقط الموجودين في الولاية، عندهم (40) طبيب عمومي موزعين على الولاية، وعندهم كادر مساعد عددهم زي ستين فقط مثل الأشعة، وسبعة صيدلانيين.
} هل تعتقد أنهم يكفون؟
– طبعاً لا.
} عملت شنو طيب؟
– أوريك الوضع كلو، في (11) مستشفى تابع للحكومة وتلاتة مستشفيات تابعة للتأمين الصحي، والسرائر لا تتجاوز الألف سرير، وتم عرض هذا الأمر في الخرطوم واتفقنا نعمل ورشة في الخرطوم عن التعليم وأخرى عن الصحة بناءً على مخرجات الورش، ونقسم بعد ذلك المعالجات.. والورشتان ستعقدان في شهر سبتمبر.
} ما هي المناطق التي تسيطر عليها الحركات المسلحة؟
– بعد (الكتمة) الناس ديل مسيطرين على تلاتة محليات هي (شيبان وأم دورين والبرام)، والآن الجيش حرر جزء من محلية (البرام)، وجزء من محلية (أم دورين)، وجزء من (شيبان)، والآن الجيش مرتكز هناك، ودي المحليات التلاتة الآن بالنسبة لي في جنوب كردفان وتسيطر عليها الحركة الشعبية جبال النوبة.. في ناس كتار ما عارفين ما يدور في جنوب كردفان.
} ما هي جهود الولاية في إعادة النازحين إلى مناطقهم؟
– في ناس داخل الولاية، وفي ناس خارجها، وافتكر أن في ناس عندهم أسباب أمنية حركتهم من مكان لآخر.. وأنا أعترض على كلمة نازح في الأصل، والكلمة في حد ذاتها غير جيدة وأي زول ممكن يستقر في المكان الذي يريده.
} عفواً السيد الوالي.. أنت تطرقت إلى (هامش) الكلمة ونحن نريد (متنها) نريد أن نعرف حال من تركوا ديارهم بسبب الحرب؟
– أنا أعتقد أن كل الناس الموجودين في السودان ديل أحرار اللي جاء من كادوقلي أنا ما بجبرو إنو يرجع كادوقلي، ولو عايز يرجع بحريتو في إنو يرجع.
} بترجعوا إذا إنت حققت استقرار؟
– تتكلم عن العودة وبتبني بنية تحتية جيدة، وأنا ضد أعمل تفويج للناس ونرجع النازح لديارو.. وإرادياً إذا عايز يسكن في أي مكان فهو حر فى خياراته.. والنازحين كويسين وكل زول عندو تقديراتو.. الرجوع يعتمد على تقديرات الإنسان.
} يجب توفير معطيات محددة لعودة النازحين السيد الوالي؟
– حتى إذا توفرت تلك المعطيات ولا يريد الشخص العودة إلى مكانه.. أنا ضد إجباره على العودة.
} ولكن النازحين الآن يعيشون أوضاعاً سيئة للغاية؟
– مهمتنا توفير أمن في (أبوكرشولا) وكل الأشياء، ولكن ليس مهمتي إرجاعهم بقوة العضل إلى مناطقهم.
} هل الأمن متوفر في (أبو كرشولا) الآن؟
– الآن فيها تسعة آلاف وحاجة.
} مفروض الناس كلهم يرجعوا لـ(أبو كرشولا)؟
– لا ليس صحيحاً.. الرجوع دا حاجة ذاتية.. ولا يمكن أن تسوق الناس سوقاً للعودة إلى مناطقهم.
} هل تعتقد أن الأوضاع الآن في (أبو كرشولا) مناسبة لهم للرجوع؟
– مناسبة إلى حد ما، وكل زول بيحدد موقفو، في مستشفى ومدارس فاتحة.
} لكن في تمرد موجود؟
– نعم، في تمرد موجود والجيش أيضاً موجود، وكل زول بيعمل تقديرات موقف.
} في ناس عندهم ثروة حيوانية ويرون أن الحكومة غير قادرة على أن تؤمنها لهم؟
– الحكومة غير مسؤولة عن تأمين الثروة الحيوانية.
} كيف؟
– الحكومة تؤمن المسارات فقط، وأنا مسؤول من تأمين البلد عامة.