منى سلمان
رجال تضرب بهم الامثال
ونزيد لمعلومات الأخ هناك ايضا (زفوت) و(زفتان) وما تفرع عنه، فأن اللقب عادة ما يرتبط بالوزن التفعيلي لاسم الـ (الجايبين سيرتو) فان كان اسمه (مصدّق) مثلا تحول عند الغضب منه لـ (مزفّت) وهكذا قس على ذلك .. (قس) دي قاعدة تعجبني والله !
لكن حتى لا نتهم بكشف اسرار النسوان لاعداءهن من قبيلة بني قحطان (قحطان من مقحّط أي عدمان أو فلسان) وهل تتعكر النساء ويغضبن من رجالهن إلا بسبب الفلس قاتله الله ؟ اذن حتى لا نتهم بالتحيز نوضح حقيقة غائبة في هذا المقام، وهي انهن أي النسوان يكنن للغائب المغضوب عليه عموما بتلك الالقاب البهية، سواء أن كان المذكور بالشر ذكرا أو أنثي .. قريب أو غريب وليس بالضرورة الزوج فقط، وان كان له الحظ الأوفر طبعا – من هذه الالقاب، كذلك يمكن للمرأة ان تكني عن المغضوب عليه من الابناء أو الجيران أو النسابة خاصة الحموات، بصفات مثل (التجم) بضم التاء والجيم، و(البعامة) و(العلّة) و(العوقة) و(سجم الدواك) والدواك جمع الدوكة والمراد تشبيه المذكور بالسخام المتجمع من أثر النار على الدوكة .. فظيعة مش؟ بالله الما بعرف الدوكة ذاتا يجينا بي جاي !
كذلك تزدحم امثالنا الشعبية باسماء رجال خلّد التاريخ بعض مواقفهم، مثل (كنين) الذي يضرب به المثل عندما نريد أن نصف الشخص المتقاعس المهمل لواجباته ومسئولياته عندما يصحو ويقوم بما يتوقع منه، نقول عنه (خلاص .. كنين بقى راجل)،وهناك (حماد) ونرمز به لمن يسرق انجازات الاخرين وينسبها لنفسه (الخيل تجقلب والشكر لي حماد) ,, بالمناسبة عرفت انو (حماد) المعني في المثل كان احد ابناء (عبد الله جمّاع)، كما ذكرت من قبل ان (بلة) المقصود بالمثل (يحلّنا الحلا بلة من القيد والزلّة) هو سيدنا (بلال بن رباح) والمثل دعاء ابتهال لله سبحانه وتعالى بأن يفرّج عن الشخص كربته ويحلّه من قيد الهوان كما فرّج عن سيدنا بلال كربته وانقذه من التعذيب وقيد الرق والذل، أما أشهر المكنّى بهم فهو (حامد) رغم ان البطلة هنا هي شقيقته التي تمارضت حتى يزوجها كما فعلوا مع شقيقها الذي شفى من علته بالزواج ! باقي لي الزمن العلينا ده (مرض حامد) بقى بالمعكوس، لانو الزول النصيح وكت يعرسو ليهو بمرض !
عموما، تظل الغيبة وهي ذكر الشخص الغايب عن مجالس الانس والمؤانسة بالسوء من اسوء العادات لدى الحريم أو الرجال، فعندما يرغب الموجودون في التحدث عن شخص بالسوء في وجود من يخشى من أنه حـ (يشيل القوالة ويوصلها) كالاطفال مثلا، يرمز للشخص (المقطوع فيه) بلقب كـ (فلان) أو باسم المتحدثة نفسها فاذا كانت (حليمة) مثلا تتناول بعض اخبار جارتها (فهيمة) فانها تقول: ماشفتو .. الليلة حليمة سوت وسوت !!
كما تعودت بعض الزوجات على اطلاق اسم (كودي) ترمز به لزوجها، لتيسّر على نفسها مهمة الخوض في سيرة فعائله مع خلصائها، في وجود ابنائها أو وجوده شخصيا دون أن يدري بانه المعني بالحديث، كما حدثتني صديقة جديدة ولطيفة جدا جمعتني بها مناسبة فقد تعودت على الاشارة لزوجها بـ (علوية) فتقول (علوية جابت لينا) و(علوية مرقت من الصباح وما جات لغاية هسي) أو (الليلة علوية عيّانة ما مشت الشغل) وهكذا حتى تعود لسانها على ذلك وصارت تكنيه بـ (علوية) بعلمه وفي وجوده .. وبما أن الرجل معافى من عقد الجندرة والحزازات مع النسوان فقد تقبل الاسم بطيب خاطر .. حدثتنا ضاحكة بأنها نادته لتلفته لأمر ما في لحظة صفاء:
يا علوية !
فاستجاب للنداء بكل اريحية ودون تردد .. التفت اليها قائلا: نعم
لطائف – صحيفة حكايات
munasalman2@yahoo.com
الاستاذة الكريمة منى سلمان :
سلام ونحيات مباركات زواهر نواضر لك وللاسرة الكريمة
وتحية للمتداخلين بالحسنى ..
مجموعة من الامثلة والحكايات الجميلة مربوطة ببعضها بطريقة اخرجت المقال بصورته هذه ..
هذا ما نحييك عليه استاذتنا الفاضلة فكثيرا ما نجد سلوى وعزاء فيما تكتبينه يزيح عنا رهق الغربة وتجنيات الدهر ونوائبه فلك الشكر ..
وحمدا لله انو الواحد عندو اسم لا يمكن تصريفه لاسم سباب وشتم لكن ما عارف السيدة حرمنا المصون تكون اخترعت لينا واحد من بنات افكارها ولا ايه ما عارف ..
واصدقك القول اذا قلت لك ايتها الفاضلة بان هنالك نوع من النساء لديهن موهبة كبيرة جدا في الشتم وتبخيس الاسماء للناس وازواجهن فاحيانا احداهن تطلق على زوجها التعيس وصديقه الحميم خايب الرجاء وانهم مجتمعين عليها ليحيلوا حياتها الى جحيم ..
او يا راجل ما تقعد في حتة واحدة لافي فينا زي جمل العصارة مالك ..
تضحك لشنو ؟؟ من عماراتك الواقفة ولا من لواريك الحايمة ؟؟ عجب والله مفلس وكمان يضحك ..فتموت البسمة في شفتيك حالا ..
ولكن على كل فامراة من هذه الشاكلة هي عبارة عن منبه مزعج يعيدك الا الواقع المر حالما استسلمت لاحلامك ..قد تفيدك وقد تحبطك وتزيدك احباطا على احباط ..
والمرأة لا شي يثير غضبها مثل المشاريع الهوائية والخيالية واذا انتظرت منها تشجيعا لمشروع خيالي فقد خاب فالك و لن تحقق شيئا ..
تحية وامنيات طيبات لك ونتمنى الا تغيبي كثيرا ولا شغالة انتخابات ..
لو شغالة انتخابات بالله جيبنا حكاية مره مؤتمر وزوجها حركة
كونوا بخير
بت سليمان يارائعه انت دائما بتحسسينى انى قاعدة مع حبوبتى الماشوفتها لى عشرة سنين لكى منى كل الحب والتقدير
تحية طيبة
ياختيي النساء انوع والنوع البتكلم عنه صديقك ده يعرف باسم “زوجة” فيروس
تهجم عليك وانت لا تدري وتستهلك جميع مصادرك
اذا حاولت اخراجها فانك ستخسر شيئا ما
وان لم تحاول اخراجها فانك ستخسر كل شئ
من زمان الغنجة عندكن بنات حواء وبتعرفن السلخ ونشر الغسيل الوسخ وبتعرفن الدغالة لاكبر حد ممكن وتنكرن العشير لو انفق لكن الدهر كلو وشفتن شوية قرصة تقولن الرجال ديل ما شفنا منهم غير النكد وما براكن بنات السودان لكن شماركن مخالف وطعمو مر علقم .. فواحدة من بني جلدتكن ومنتمية لقبيلتكن النسوية بكامل اهليتها العقلية تزوج عليها زوجها وبعد ما مات وشبع موت سالها ولدها يا يمة الحار شنو زواج ابوي ولاَ يوم موتو . فجاء ردها يا ولدي والله لما تزوج ابوك عيني لي الصباح ما نامت ولكن لما مات نمت من عشاء . درتن نشر الغسيل الوسخ كدي استحملني شوية بوريكن المكشن بلا بصل . واخرى منكن تنادي لزوجها تعال يا الهم الكلك غم ولما يقول ليها شنو ويحمر فيها؟ تقوليهو قلت البشيل الهم وبزيح عني الهم . ولا نبعد بعيد فالسيدة عائشة الرسول صلى الله عليه وسلم كان يقول ليها بعرف لما تكوني غير راضية عني فتقسمي وتقولي ورب ابراهيم ولما تكوني راضية تقسمي وتقولي ورب محمد . وواحدة تقول كما القدر الزيك بتزوجني وهي بقرشين ما يعرسوها. واخرى لما تزعل تقول لزوجها فايتة بيت ابوي بعيشني وابوها ما عندو حق الردشة لي بكرة . واخرى تقول لزوجها تور الساقية الما عارف الباقية والباقية عندها علاقة مع اخر والرجل سدادة بيت . واخر الكلام لو عدتن عدنا….
والله يااستاذة الرجال ديل بتاعن حركات تعامل الواحد كويس يمسح بيك الواطة تهرشو وتعمل مجنون احترمك . يالله دة من شنو……………… امكن عشان التربية كانت بتبني حاجات معينة فيهم ولا شنو
والله صدقتي يا منو…
بسمع زوجتي دائماً لما تتكلم في التلفون مع صحبتها تقول… أميرة جابت لي هناي أميرة قالت لي كدي…. إتكلمي أميرة بعيدة … أميرة نااااااااااااايمة في سابع نوم.. أميرة جات..؟ وأنا سامع أي حاجة من كلام الطرفين وااااااااضح…وعامل فيها ماناقش حاجة ومديهم الأماااان وماعندي مانع في الكنية اللطيفة ما دام كلامها في المشروع وليس في الممنوع وما فيهو كشف للمستور وقطيعه…؟
تحياتي لك يا ست الكل وعايزين نعرف سيد الإسم ملقب بي شنو
أخوك: أميره هههههههااااااااااااي
استاذة منى :
تحياتي وسلامي ..
ان شاء الله خير ومالك غايبة صحي كدة شغالة انتخابات ولا شنو ؟؟
طيب كان شغالة انتخابات تعالي اكتبي هنا ورينا اخبار وشمارات السيدة الدكتورة فاطنة بنت عبدالمحمود ..
وكا ن كمان سيد الاسم مترشح دا يكون موضوع تاني ..
ولا اقول ليك حاجة يا استاذة : كدي قاطعي الانتخابات وتعالي بالله علينا في الراكوبة هنا نحن منتظرنك اصلها المقاطعة طالعة موضة اليومين دي ..
تحياتنا واحترامنا وامنياتنا لك بحفظ الله ورعايته
منى سليمان وينك انت طولى مننا مالك انشاءالله المانع خير
يا رشا البهرشوه دا ما أسمه راجل
السلام عليكم كيفك يا منى وكيف ابن عمى عساكم بخير انا بقرأ ليك وبتعجبنى كتاباتك جدا لك منى كل التجلة والاحترام وسلامى للعيال
😡 انا عافي يامني في كتاباتك بالجد كلها صاح اجنبية بجواري علقت علي صورتك وضحكت زكرتك بخير/شرف شانغهاي/;) 😉
انت والله بالجد كتابه او بالمعني الاصح لزييييييييييييزه
قاتله الله لفظ لم اقبله ربما الفقر يكون خير لبعض الناس قولى الله يغننا بالحلال