[JUSTIFY]من مواصفات السياسي الناجح.. لا يوجد وصف تشريحي محدد بسطة الجسم أو دقيق.. ما مهم.. المهم العيون والخشم.. العيون تتلفت أحيانا من فوق لتحت.. وغالبا من الشمال لليمين بسرعة 1400 ميغاهرتز في الدقيقة.. الخشم ديمة ريقو ناشف.. ودائما يبلع ريقو.. في النضم لا يلتزم بالنقطة أو الشولة.. يقدر يضحك وهو في قمة الغضب.. ويزعل ويطرم وهو في قمة الفرح والسرور.. المشي.. لو تابعت اتر نعلاتو في الواطا تلقاهو يمشي وكرعيهو ملفوتات.. يعني كل كراع مقبلة علي بلد.. ولو مشى أصلو ما بيعتر واللا يترتع حتى لو كان سكران لط.. حويييييط.. أي سياسي عاين ليهو في مشيهو إن عتر واللا اترتع بشروهو بمستقبل سياسي زي الزفت.. وأصلو ما حيقطع فرقة في السياسة.. في النضم برضو دائما يستعمل ايديهو حسب لونو ونوع ادب خطو السياسي منهم من يستعمل اديهو الاتنين مفتوحات ومنهم من يستعمل يد واحدة مركزا على السبابة.. يسكت مسافة.. ما جاتا شي..بعد شوية ينفتح فيك.. نضم إن قبضتا من نضمو شي.. وعرفت شي.. دا يبقى سياسي ما عندو موضوع.. وما تشتغل بيهو شغلة.. لكن أن ما فهمت منو حاجة.. أقبض فيهو قوي.. دا ياهو السياسي الناجح.. وامشي وراهو وانت مغمض.. يا غرق يا جيت حازما…. أن يكون غالاااااط.. مغلاط.. يغالطك في أي حاجة.. ويثبت لك إنو صاح.. أن يكون زول بتاع لف ودوران.. وما يجاوبك دغري.. لو سعلتو سعال.. يعني مثلا لو سعلتو الليلة غداكم شنو؟.. ويكون السوعال ما عجبو يبدا يقول ليك: “والله يا أخي شوف.. التكل حقنا يمر بمنعطف تاريخي ختري.. وفي ورطة ما يعلم بها إلا الله.. زي ورطة كديستنا الورطتا داك الليلة.. عندنا كديسة شليقة وقليلة أدب.. وهابشة (دي أوصاف مقصود منها اغتيال شخصية الكديسة).. الكديسة دي قبل أسبوع سكت لها.. فار.. الفار جرى منها.. دخل جحرو.. وجحرو في حيطة التكل.. قومي يا الكديسة دخلي راسك وراهو في الجحر.. وتاني ما تعرفي تمرقيهو كيفن؟.. وقدر ما حاولنا نمرقها من الورطة دي.. ما قدرنا.. في النهاية فكرنا نهد حيطة التكل.. لكن خفنا نهدها تقع درابة فوق الكديسة تقتلها.. علا جات حاجة بخيتة جارتنا مرا بصيرة.. وعندها خبرة في ورطة الكدايس أي كديسة تورط يجيبوها وهي تمرق الكديسة من الورطة.. بي بصارة مرقتا من الجحر.. الكديسة جات مارقة.. علا رقبتا معوجة وبعد دا كلو خامشة الفار في خشما”.. انت هنا تنسى سوعالك.. ويكون عندك عشرين سوعال في المنعطف التاريخي حق التكل و ورطة الكديسة وخبرة حاجة بخيتة.. وليه الدولة ما تسفيد منها.. وتعينها إن شاء الله.. خبيرة في مشروع الجزيرة.. وخصوصا مشروع الجزيرة مليان فيران.. وبالتالي ح تكون في كدايس وأكيد ح تورط.. وتنسى السؤال المحوري والمصيري وهو غداكم شنو الليلة؟!!
[/JUSTIFY]
