أسمنت عطبرة الطن بي كم؟؟؟

[JUSTIFY]> أكتب قبل مباراة الأمل العطبراوي.
> أمل عطبرة الوحيد بعد هبوط أهليها.
> وعطبرة مدينة الحديد والنار.
> المعروف إنها تلعب بالنار زي ما دايرة.
> النار ما بتسوي ليها شيء.
> ولأن عطبرة نار في نار.
> أمس فطومة أختي قدمت الأعذار.
> عشرة مصابين.
> وأفصحت إنها تناقشت في الشأن الفني مع باتريك.
> آها يا فطومة!
> لقيتي الطبخة كيف؟؟؟
> بقيتوا على التوم والكسبرة.
> ولاَّ سليقة ساي أخير.
> أقول ليك.
> سليقة أخير.
> لأنو جمهوركم بطنو طامة شديد.
> البهارات بتهيج عليهو القرحة.
> والجمهور الهلالي بينو وبين الاستفراغ زحة يدو من خشمو.
> المهم..
> الأهلة دايرين يصالحوا جماهيرهم.
> بأي ثمن.
> مهما كان التمن.
> وذلك تحت شعار المابي الصلح ندمان.
> كردنة سافر برة البلد.
> أخير يحكوا ليهو ثورة الجماهير.
> أخير من يحضرها.
> وجمهور الهلال الواعي.
> بعرف النصر والانتصار المستحق.
> من انتصارات الصلح التي تأتي بطرق مختلفة.
> منها الحظ والأخطاء التحكيمية.
> تفاحات الحاحات غير واردة.
> لأن أهل عطبرة بياكلوا من الباوقة اللذيذ تفاحة بس.
> المهم..
> أكتب قبل المباراة.
> ولا أتوقع خروج الهلال بالنقاط كاملة.
> فالهلال تعبان.
> تعبان يا حبيبي.
> فقط تمنياتنا ألا يخطئ التحكيم كعادته.
> لأن أخطاءه دائماً تصب سبحان الله في اتجاه واحد.
> صدفه ساي الحكاية دي.
> المهم..
> الليلة بكون ظهر التقييم الحقيقي لمكسيم.
> ومن اليوم مفروض تبدأ رحلة جمعة جينارو.
> بالمناسبة لوزان قالت شنو؟؟؟؟
> المهم..
> أداء المريخ أمام المريخ كوستي.
> لم يعجبنا.
> ولكن السوء لم يكن بحجم النقل الإذاعي لمعلق الرياضية.
> يعني ما ممكن يقول ليك المريخ العاصمي بلعب من الشمال للجنوب.
> ويقول ليك على جعفر بمشي باللاين من الناحية الغربية.
> الزول ده يا ما بعرف اتجاهات.
> ودي ما مشكلتو.
> مشكلة المناهج الخلت الناس الساعة البتمشي تك تك تك دي.
> ما بعرفوها.
> مشكلة المقررات.
> الدخلت الجغرافيا والعلوم والتاريخ.
> في كتاب واحد اسمو مسكننا.
> والباقي ختوهوه في ملبسنا.
> ومسكننا كمقرر.
> زي مسكننا كمدمر.
> وملبسنا ككتاب.
> بشبه ملبسنا المهترئ.
> الزول ده الكورة لو نقلها لينا بي درداقة.
> كان فهمنا الحاصل شنو.
> ولكنه هذا الزمان.
> أيها الناس.
> الصبر بجيب حقو.
> والدليل تطور عنكبة..
> تطور عنكبة لأن الثقة اللقاها من المدرب والجمهور.
> خلتو يلعب بأعصاب مرتاحة.
> مزيداً من الصبر يا جماهير المريخ.
> مزيداً من التشجيع.
> أوكرا وكوفي وجابسون.
> مكاسب كبيرة.
> حالتهم لسه ما دخلوا الفورمة.
> قليل من الصبر مزيد من الإنجاز والتطور.
> المهم..
> أمس شفت جرية بكري المدينة في كورة الاستقلال.
> ياخ أنا جريت.
> جرية مرعبة شديد.
> ليهم حق ناس السكري ما يمسكوا نفسهم.
> وعملة ناس المصران مجبورين عليها.
> الزول ده جا زي السهم.
> لو ما شاشتنا جديدة.
> كان اتشقتت.
> قلت لي لوزان قالت شنو يا روشا؟؟؟
> المهم..
> دايرين نشيِّد نادي أسري في القلعة الحمراء.
> لأسرنا.
> ألعاب للأطفال وكافتريات.
> لقضاء أمسيات عائلية جميلة.
> دايرين نبدأ.
> بأجود الأنواع نبني.
> أسمنت عطبرة الطن بي كم؟؟؟
> عندكم فكرة؟؟؟
> المهم..
> اليوم مكسيم سيظهر.
> أهو حديد يا فطومة.
> أيها الناس.
> «إن تنصروا الله ينصركم».
> آها نجي لي شمارات والي الخرتوم.
> كان شفت يا والينا.
> حكاية كبري المنشية دي زاولت بينا.
> الكبري ده إتعمل لينا ولا فينا يا والينا ؟؟؟؟
> ولا النيل الأزرق انحرف زي ماقلتوا لينا ؟؟؟
> شخصياً أرجح قصة الانحراف يا والينا.
> لأنو الحصل في الكبري ده غير. انحراف مافي شيء يبدو لينا.
> الانحراف فيهو ظااااااهر يا والينا.
> والينا.
> كبري توتي متين بنحرف لينا؟؟؟
> ولا طوالي بقع بينا؟؟؟
سلك كهربا
ننساك كيف وتاني بالمراكب يا أخينا.
والي لقاء..
سلك[/JUSTIFY]