محمد عبد الماجد
إتفاصحوا قدر (ضفركم) يوم الخميس الفورة الف
“””””””””””””””””””””””
في حلتنا (علماء) – المسلسلات التركية دي من الحلقة التانية يكبوها ليك الـ (90) حلقة
“””””””””””””””””””””””””””””
ليه (حبيبة) البطل وقت تمر ليها بي حقل زهور بتقعد (تغرود) في عيونها؟
“”””””””””””””””””””””””””””””
كان (الفيترابي) وقت يشوف ليه (4) نسوان بقول الله يستر الليلة النسوان ديل كتلن منو؟
“””””””””””””””””””””””””””””
· في قريتنا الصغيرة طبيب العيون ممكن يقلع ليك (الضرس) واستاذ الرياضيات ممكن يدرسك (جغرافيا).
· وود الجيران ممكن يقسم (مرتبو) مع الجيران النص بالنص.
· تامنها (بركة).
· في قريتنا الصغيرة (سواق اللوري) بفتي في اي شيء في السياسة وفي الطب والبولوجيا…وعالم البحار…والمخبارات الروسية.
· مع انه بلخبط بين (تحتمس الثالث) و(جون تيري) كابتن فريق شيلسي.
· هسع (شيلسي) الدخلو في (الجغرافيا) دي شنو؟.
· الواحد وقت يطول من الكتابة حرف (اللام) ببقى ليه زي (الكوريك).
· الكوريك ذاتو ما في داعي يدخل في (الجملة) دي.
· لكن (السياسة) بدخل ليك الحاجات في بعض لمن ما تفهم حاجة.
· سواق اللوري عندنا اعلى (منصب) في حلتنا…اكبر حاجة عندنا.
· زي السفير واحد.
· في قريتنا الصغيرة ..البسيطة ، التى ينوم اهلها من الساعة (خمسة) الكهربة لو ما جات ما بزعلو.
· الموية لو قطعت ما بغضبو.
· احساسهم ميت بالحاجات دي.
· قلبهم مات زمان.
· عشان اصلا هم ما عندهم كهربة وما عندهم موية.
· مويتهم من البحر.
· الى الآن شغالين بالجركانات.
· موية الماسورة عندهم (فلهمة) ساي.
· وهم ما بحبوا (المسخرة).
· البعوض يقطعهم قطيع ما بشتغلو بيه.
· الواحد فيهم لو طقتو عقرب يتكلم بيها بعد (15) يوم.
· والملاريا – ولا بياخدوا ليها (دواء).
· بكافحوها بالنية ساكت.
· في قريتنا الصغيرة لو كان في عرس الشباب كلهم بعملوا فيها (عرسان) ، ينهّروا في (الطباخين) كأنهم عرسان الاسود دا عليه شوية البطاطس عاوز ليه شوية (ملح) الرغيف ما جابوه والتلج كمل.
· والحفلة بي منو؟.
· شيالين حال بس.
· في حلتنا عارفين اي شيء.
· ناقشين اي حاجة.
· يختوا ليك تشكيلة الهلال زي (الترتيب) بشه يتقدم مهند يقعد برة.
· والمعز محجوب ما يطلع من المرمى.
· ديل وصلوا حتة في (العلوم) ما وصل ليها زول.
· تشكيلة برشلونة قبل (15) يوم من كلاسيكو الارض بختوها ليك زي ما بقول الكتاب.
· مورينهو بطلعوه ما ناقش حاجة…(بتفلهم ساكت) ما عندو كورة.
· في قريتنا حاجات وحاجات.
· جيب ليك (سمك) الحلة تاني يوم كلها بتسألك : (عندكم شنو؟)…العيان ليكم منو؟.
· الحاصل ايه؟.
· صرفت؟؟.
· في حلتنا تجي متأخر الابواب كلها تفتح يقولوا ليك الليلة مالك متأخر كدا؟.
· ياكلو (لحمك).
· اليوم التاني تجي بدري يقولوا ليك مالك الليلة جيت بدري كدا؟ ان شاء الله خير.
· يحللوا براهم زي ناس الريشة وابراهيم سليمان ومحمد محي الدين الديبة وشرف أحمد موسي يقولوا اكيد طردوك من الشغل.
· ويعلقوا كمان.
· مالك بقيت (فتران) كدا؟.
· تكون بتضحك السنة كلها مبسوط وسعيد وفرحان (ما بقولوا ليك حاجة).
· اول ما (تفتر) شوية الحلة كلها تتكسر فيك سؤال.
· مالك فترت كدا؟.
· مالك (كبرت) فجأة؟.
· يشفقوك ويدخلوا ليك (الشفقة) في حلقك لمن تشك في نفسك.
· في حلتنا لو شفت ليك اكتر من (4) نسوان طوالي اعرف النسوان ديل (كتلن) ليهن زول.
· ما في شك في زول مات.
· كان (الفيترابي) وقت يشوف ليه (4) نسوان بقول الله يستر الليلة النسوان ديل كتلن منو؟.
· اول حاجة يضرب يطمئن على جدو.
· ثم يضرب لي حبوبتو.
· في حلتنا (علماء) – المسلسلات التركية دي من الحلقة التانية يكبوها ليك الـ (90) حلقة.
· الافلام الهندية دي حافظنها حفظ ما بقيفوا فيها.
· عارفين (البطل) بعمل شنو؟.
· والخائن حيكون شنو؟.
· وليه (حبيبة) البطل وقت تمر ليها بي حقل زهور بتقعد (تغرود) في عيونها؟.
· وتكتل في ضلها.
· عارفين كل شيء.
· ناقشين اي شيء.
· ما في حاجة بتفوت عليهم.
· لو جيت غريب في الحلة يطلعوا ليك (جدك) الخامس عشر.
· ويقولوا ليك دا هسع عامل فيها زول مهم (حبوبة) ليه ، كانت بتسرق (جنا الجداد).
· يندموك على جيتك.
· لو جبت ليك (مجنون) قعدتو مع تلاتة (عاقلين)…حكمة الله المجنون ما ببقى عاقل.
· تتخيلوا (التلاتة) العاقلين هم الببقوا (مجانين).
· اي حاجة ماشه بالعكس.
· لو زرعت ليك (171) شجرة سدر.
· الـ (171) شجرة سدر تتخيلوا ما فيهم شجرة واحدة ح تشيل (لالوب).
· كلهن بشيلن (نبق).
· بعد (النبق) دا احسن نخش على ناس المريخ.
· الناس الفرحانين ديل.
· الطيش في المدرسة لو جاء تاني (الطيش) بكون فرحان ومبسوط.
· بكون فرحان اكتر من اول الفصل.
· والطيش بكون همو كلو يمرق من المرتبة الاخيرة.
· همو ما يجي (الطيش).
· عاوز يرمي ليه زول وراه.
· هسع ناس المريخ ديل مسكتهم ام فريحة.
· الواحد فيهم بدون مناسبة تلقاه واقف ليه في ضل وبظبط في الساعة.
· الساعة عندهم نوع من الفلهمة.
· موش المغترب (البسيط) وقت يسافر ويغترب.
· ويقعد (10) سنوات في السعودية.
· وقت يرجع في اول اجازة بقولوا ليه : (اها عملت شنو؟).
· بقول ليهم : (اشتريت لي ساعة).
· ناس المريخ فرحانين بالساعة.
· عملوا ليهم ساعة ووقفوا في (الضل).
· لمن تكون واقف في الضل بكون عندك احساس انو الزمن مشى.
· الاحساس دا بطلع من وين؟.
· البجيبو شنو؟.
· بجيبو (الضل).
· الساعة.
· ولا دي فياقة زول ساكت.
· ما عارف لكن بعتقد انو في (فلسفة) في الحتة دي.
· طالعة من وين ما عارف؟.
· لكن عشان ما نتكلم ساكت.
· ناس الهلال ذاتهم قاعدين ببالغوا..(احسن نشتغل الهلال شوية نوع من التكتيك).
· ناس الهلال جايبين ليهم (8) مدربين.
· قالوا ليك مباراة القمة بشرف عليها (8) مدربين غير (البلجيكي) البكون قاعد في المقصورة.
· انتوا عاوزين تعملوا شنو؟.
· عاوزين تفتحوا القسطنطينية؟.
· عاوزين تعملوا ليكم عملية قلب مفتوح.
· (8) مدربين لي منو؟.
· وضفر وقت يجيب ليه قون بجيبو (تسلل).
· اها مع الحكام ديل ح تحرسوا لي (التسلل).
· (8) مدربين برة الملعب وواحد في المقصورة يعني (9) زايد الكاردينال (10) وعماد الطيب (11).
· يعني اي لاعب في تشكيلة الهلال بكون قصادو (مدرب).
· اي مدرب يجي شايل ليه ورقة وقلم براهو ويمسك ليه (لاعب).
· دا علم جديد.
· دي فلسفة مختلفة.
· غايتو اول مرة نسمع بالنظريات دي.
· اها يا الكاردينال الـ (8) مدربين ديل بقعدوا في (الكنبة) وإلّا حجزتوا ليهم (المسطبة الشمالية).
· تلخبطوا الزول في نفسو.
· بعدين الكاردينال بعد المدربين الكتار ديل كانت تصريحاته تفتقد الدبلوماسية وهو يقول اللاعب لو بقى (ميسي) ما بنسجلوا اذا رفض الهلال.
· تصريحات الكاردينال دا ما وقتها.
· وحضور البلجيكي الان دا ما وقتو.
· وما عاوزين نكتب في هذه المواضيع عشان دا برضو ما وقتو.
· التركيز يجب ان يكون في مباراة القمة.
· والخميس الفورة الف…ابقوا مارقين.
· …
· ملحوظة : انتوا قايلين الخميس بعيد يا مريخاب الخميس بكرة.
هوامش
· اذا كانت تسجيلات الكاردينال زي المدرب الجابو يبقى الله يستر.
· اهم من كل الاجانب اعادة قيد النجوم المطلق سراحهم.
· يجب ان تكون اعادة قيد النجوم المطلق سراحهم في اولويات الكاردينال.
· اذا فشل الكاردينال في التسجيلات لن يستمر في قيادة الهلال (45) يوم.
· لذلك على الكاردينال ان يحرص على انجاز التسجيلات بنجاح يرضي جماهير الهلال.
· تبقى التسجيلات هي المحك الحقيقي للكاردينال.
· مباراة الغد هي مباراة اللاعبين.
· النتيجة مسؤوليتهم.
· لا اعلام ولا جمهور.
· كورة بكرة حقت اللاعبين.
· كاس السودان ما بساوي (ضفر) الممتاز.
· البطولة الكبرى حقت الهلال.
· نحن من يومنا بنحب الحاجات الكبيرة.
· سيكافا والحاجات نمبر تو دائما ما بتنفع معانا.
· بكرة موعدنا مع جمال سالم.
· وايمن سعيد.
· وابقوا منتظرين.
· اعلام المريخ بستعمل لغة (مفخخة) ظنا منهم ان تلك اللغة يمكن ان يرهبوا بها الهلال.
· هناك اشارة واضحة وتحريض على تحطيم استاد الهلال.
· الارهاب ظهر على حقيقتو.
· حماية استاد الهلال يجب ان تكون عن طريق ان يغطي جماهير الهلال في كل الاستاد.
· ما تخلوا حتة فاضية.
· اقعدوا في استادكم.
· خلوا ناس المريخ يحضروها في التلفزيون.
· قناة قوون ناقلة الكورة.
· ما تتعبوا ساكت وتمشوا المباراة يا ناس المريخ.
· المغصة ح تكتلكم.
· في احتفالات وكاس الممتاز …واحتفالات.
· مالكم ومال (التلتلة).
· احسن احضروها في القناة.
· وخلوا لينا نحن الفرح والممتاز.
· كدا ما نتفاصح ساكت (الحكام) ديل ما مضمونين.
· احسن نسكت لي يوم الخميس.
· والخميس ما بعيد.
· ….
· عاجل : انت يا مزمل ابوالقاسم اذا كنت في مكتبك بترجف من المباراة عاوز (ضفر) يثبت ليكم.
[/JUSTIFY]
وإن طال السفر – محمد عبد الماجد
صحيفة قوون
اتفاصح انت كدة لحد ما نتقابل بعد المباراة …