بابكر سلك
هي وينا الكورة؟
طايرين من اي بطولة اسسناها دي المقولة
علوق الشدة والناس بي خموله ومافي احترام للناس وعقوله
زايدة ضغطنا والدم في الراس فار فورة رافعة السكري كمان جايبة ليها ايبولا
نضحك في سيكافا وفي بورندي ونسوي الشينة والشينة المنكورة
نتغلب جوه البلد بسهولة ونتقدل نردد نحنا الاسسنا الكورة
وصلنا حتة ما معقولة عندنا الكورة لاعبة نفتش في كورة بره منقولة
ونحنا في بلد ليها اربعين وزير رياضة ومافيها باسكت ولا سباحة ولا سياحة ولا كورة
يا ناس كان رضينا بي مستوى الكورة وكروره عليكم الله ختونا الايبولا
> امس نمت حلمت جدي الله يرحمه جاني في النوم
> قال لي القصيدة الفوق دي
> الغريبة جدي لحدي ما مات ما كان شاعر
> دقس الجماعة خلي بالك
> الميتين ديل قالوا ما بحكوها شديد
> المهم جدي بعد القصيدة اتونس معاي
> قال لي كورتنا ضد نيجيريا طلعت كم
> قلت ليهو الشوط الاول تعادل سلبي
> الشوط التاني الدقيقة تلاتة جابو قونهم
> قال لي مازدا ده ما لو مع تلاتة
> -الاقوان تلاتة والدقيقة تلاتة
> قلت ليهو يا جدي
> درنا
> في قبرو داك نطط
> ربط الكفن قوي وقام ينطط
> باقي هو زول مستور من حياتو
> وبعد نطط
> قال لي وبعدين
> قلت ليهو اللياقة بدت تنزل
> قال لي الله ينزل الدولار
> قلت ليهو والتفكير بدأ يتشتت
> واول عكسة تفكير الشغيل شتت تفكير اكرم المشتت
> ونيجيريا للحنة طبقت
> ونحنا بنحاول نستجدي الحظ يدرن لينا
> نيجيريا اكملت الكوتة
> تلاتة يا جدي
> قال لي خلاس
> ابراهومة ما مشى مازدا رجع لي كوتو ؟؟؟
> القصة يا جدي ما مازدا
> القصة سياسة فاسدة
> سياستنا الرياضية
> لا تخطيط ولا تنسيق ولا تسويق
> نشارك نطير
> نطير عشان نشارك
> قام جدي قال لي العيشة عندكم كيفنها ؟؟؟
> قلت ليهو يا جدي ارقد في سلام
> ما تسأل عن حاجة كان عرفتها تحمد الله في قبرك علي انك ما حضرت البحصل
> ارقد بسلام يا جدي خلينا نترحم عليك علي بال ما نجيك
> الغريبة جدي رحل عننا ليهو عشرة سنين
> مصر انو في الانتخابات الاخيرة صوت
> ياربي في خرف هناك برضو ؟؟؟
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> كنا بنتونس نفرق الهم الفينا
> نحكي وننكت ونضحك غصباً عن العن ذاتو يا والينا
> قام واحد قال لينا
> واحد مشى لي دكتور بتاع بحر فاتح خيال فينا
> قال ليهو يا دكتور كلو ما ننوم بيتنا كلو بشيلو حمار النوم ويطفش النوم علينا
> الدكتور قال ليهو
> غيروا الجزار يا والينا
سلك كهربا
ننساك كيف ولو غيرنا الجزار يمكن نصحى نلقى روحنا مشعبطين في شجرة .. باقي القرود كتار حايمين بعد ابادة جنينة الحيوانات
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
