محمد عبد الماجد
جمال سالم الليلة ناس (بشه) ح يعيدوا ليه (فحص وظائف الكلي)
“””””””””””””””””””””””””””
الراجل وقت يكون راجع من الشغل بكون عندو موضوع واحد وهو (عاملة لينا شنو في الغداء؟)
“””””””””””””””””””””””””””””””””””””
طبعا اي دكتور حتى لو كان مبتديء في البداية بقول ليك انت ما عندك اي حاجة
“””””””””””””””””””””””””””””””””
انا ما عارف المريخاب ديل مع ناس (بشه) ديل بجيبوا ليهم (قلوب) من وين؟
“””””””””””””””””””””””””””
طبعا ما في علاقة بين الزول الواقف في (خشم) بيتهم في الكلاكلة القبة وواضع قدمو على الحيطة وبعاين بعيد مع الحركة دي.
حاشية :
الحركة دي نحن بنعملها كتير (خاصة يوم المباراة) لكن ما عارفين (فسلفتها) طالعة من وين؟.
في (فلسفات) بتطلع في الحياة دي ، من جيهات مجهولة بكون ما معروف ليها (اساس).
ظهرت من وين ما معروف؟.
ما في علاقة اصلا بين الزول دا (بتاع الكلاكلة) ـ وزول (هندي) آخر ، او (شخص) هندي عشان (زول) دي سودانية شخص هندي قاعد ليه في مطعم في (بومباي) وقدامو سلطة هندية (ما عارف الهنود بعملوا السلطة كيف؟).
ما عاوز ادخل ليكم في (تفاصيل) السلطة.
خايف اقوم اسرح.
اخلي المباراة واقوم اتلح ليكم في (السلطة).
عاوز لي سبب.
عشان كدا موضوع (السلطة الهندية) دي الرجاء ان تتجاوزه لي.
انسوه.
اعتبروني ما قلت حاجة.
الجاب في الاساس سيرة (السلطة الهندية) منو؟.
انتوا بتقطعوا ليكم حاجات من رأسكم وبتعلقوها في كاتب المقال.
وانا ما عندي اي ذنب.
لكن من باب المعلومات العامة السلطة الهندية كلها (شطة).
ديل اكتر مخاليق في الارض بضربوا (الشطة) والبهارات والتوابل والمحدقات يتخيل لي كدا (انس منصور) في كتاب (200 يوم حول العالم) قال الهنود ديل (التحلية) بياكلوها بالشطة.
يعني عالم بتاع (شطوط) بالجد.
ما تهتموا بالموضوع كتير مرات بتخيل لي حاجات كدا من رأسي.
لكن الموضوع العامل لي بالجد كدا (اشكالية) موضوع (العلاقات) دا.
هسع علاقة الزول بتاع الكلاكلة والهندي القاعد ليه في مطعم في (بومباي) تكون او بتتمثل في انهم الاتنين ما بشجعوا المريخ.
طبعا من اساسيات اي حاجة انها تكون ما بتشجع المريخ.
القاعدة انك ما تشجع المريخ.
الاستثناء تقوم (تزعل) وتشجع المريخ.
عليه فان هنالك (علاقة) طلعت بين الزول بتاع الكلاكلة والهندي بتاع بومباي لذا حكايتنا الاولى عن انه ما في علاقة تبقى حكاية مغلوطة.
انا ساكت كنت عاوز اروحكم بي (السلطة الهندية).
كان تثبتوني.
في ناس بجوا دافرين ساكت.
بتلبوا في الموضوع من الكنبة الاخيرة.
بدخلوا ليك بدون مناسبة.
تكون قاعد تتكلم مع زول في التلفون وانت راكب ليك حافلة كحيانة كدا ـ تقول للزول القاعد تتكلم معاه في التلفون شيليسي متقدم على الارسنال بي هدف.
الزول من غير ما يشعر ينط ليك في التلفون تقول (ضفر) ويقول ليك : (الارسنال ح يعادل).
انت مالك سألوك.
في زول جاب ليك سيرة.
شفتوا انا المباراة من يقعدوا يتدخلوا فيها بالصورة دي بتمرق من نفسي.
بقنع منها طوالي وقت يكون في زول (بتشوبر) على ذلك النحو.
الراجل بكون في البص قاعد بتكلم مع المدام.
الراجل وقت يكون راجع من الشغل بكون عندو موضوع واحد وهو (عاملة لينا شنو في الغداء؟).
المدام تقول ليه : (بامية مفروكة).
بامية مفروكة تااااني.
الرجل يتكفرن ليك في بص الوالي ويقول للمدام انا مية مرة ما قلت ليك ما تعملي لينا (بامية مفروكة) وقت تكون عندنا مباراة مهمة.
مية مرة حذرتك من (البامية المفروكة).
قلت ليك ما قاعد اتفاءل بالبامية المفروكة.
واحد من الناس البتكون راكبة شماعة في البص ينزل ليك في تلفون الزول ويقول ليه : (احسن انزل شيل ليك طعمية من الطابونة ديك) ـ والله البامية المفروكة لا بتتأكل مع الكورة دي ولا حاجة.
انت مال اهلك.
في زول سألك.
بتدخل ليه في الموضوع.
ليه بتفتح ليك نافذة بينك وبين (البامية المفروكة).
طبعا (البامية المفروكة) اصلا ما مشكورة في اي حتة بشيلوا حالها.
ما في زول قاعد تقع ليه (البامية المفروكة).
لا هي ولا القرع.
ولا كورة المريخ.
انت عاوز تقول كورة المريخ زي (القرع).
لا ابدا.
انا عاوز اقول (القرع) زي كورة المريخ.
لأن الاصل في (التقريع) المريخ.
دي غير الفجل.
ما تقولوني كلام ما قلتو.
قالوا ليك واحد نفسو قايم بصل البيت بي يا الله.
كل يوم بجيبوه راجع من الشغل في ركشة.
حالتو صعبة.
الحالات دي كترت ناس الحلة نقوا ليك فيه قالوا ليه لازم تمشي للدكتور.
لازم تمشي تراجع الطبيب.
بتموت.
صاحبكم مشى حجز عند اكبر دكاترة في البلد.
طبعا اي دكتور حتى لو كان مبتديء في البداية بقول ليك انت ما عندك اي حاجة.
صحتك زي الحديد.
اي دكتور بقول كدا.
بعد شوية تظهر ليك (الامراض).
لكن زولكم بالجد كان ما عندو حاجة يعني الموضوع ما شغل دكاترة.
الزول ما عندو شيء.
عمل رسم القلب الدكتور قال ليه قلبك مية المية.
عمل موجات صوتية طلعت نضيفة.
فحص الدم طلع تمام.
سوى ليه صورة اشعة للدماغ ما في اي ورم.
راجع الرئة سليمة.
فحص النظر شوفو ستة من ستة.
كشف وظائف الكلي طلعت ما فيها اي مشكلة.
آخر حاجة زولكم شال الاوراق دي كلها وخمخم ليك النتائج ومشى ليك لي اكبر دكتور في البلد.
قال للدكتور يا دكتور انا عندي شنو؟.
الدكتور عرفو ليك عرف سبب (الرجفة).
الدكتور لاحظ ليك الزول دا ضربات قلبو بتزيد وقت يجيبوا ليه سيرة بكري المدينة.
وبقوم يدخل تحت العنقريب وقت يجيبوا ليه سيرة نزار حامد.
وبرجف رجفيبة صاح وقت يشوف قون بشه.
دي غير الحالة الجنونية التى تصيبه عندما يجيبوا ليه سيرة نيلسون.
حالتو دي ما قلنا ليه (الشغيل).
الدكتور قال ليه : والله انت ما عندك اي حاجة لكن البعملوا فيه ناس (علي جعفر) ديل يوم بكتل ليه زول.
جمال سالم دا بعمل خلل عديل كدا في (وظائف الكلي).
صاحبكم شبط ليك الدكتور قال ليه : والله انت كتلتني عديل كدا والدكاترة ديك يقولوا ليك ما في حاجة الصور كلها نضيفة.
نضيفة وين مع ناس ايمن سعيد؟.
الواحد فيهم كورتو زي العنقريب المقلوب.
ناس (بشه) ذاتهم قاعدين يطيروا للزول قلبو.
انا ما عارف المريخاب ديل مع ناس (بشه) ديل بجيبوا ليهم (قلوب) من وين؟.
بشه دا اتخصص في حراس المريخ.
والليلة تحديدا كدا قالوا (بشه) داخل المباراة عشان حاجة واحدة.
بشه قالوا عاوز يعمل (فحص وظائف الكلي) لحارس المريخ جمال سالم.
يا بشه عشان تكون عارف الزول دا دخل البلد من غير اوراق رسمية.
نحن لا عارفنو يمني ولا عارفنو يوغندي ولا عارفنو سوداني.
زول ملخبط كدا في كمية من الجنسيات.
فصلوا لينا يا بشه.
طلع لينا كل (جنسية) براها.
نحن واثقين وملانين بالفوز.
اصلو ما عندنا شك.
موش حارسكم جمال سالم.
خلاص الموضوع يبقى منتهى وما فيه اي جدال.
ما فيه اي نقاش.
بشه دا قالوا مرة جاب ليه قون في المريخ.
ناس المريخ قاموا طلعوا اليوم التاني قالوا هدف بشه دا نحن شفناه في (الطشت) قبل (72) ساعة من المباراة.
موسى الزومة قال ليهم وقت انتوا شايفين الهدف قبل (72) ساعة من المباراة بتكلموني بعد الهدف ليه.
بتخلعوني ليه؟.
كان تحدثوني – على الاقل كان الواحد بكون عارف.
وكان موسى الزومة ما سرح.
يسرحوا ليك في المباراة ويقولوا ليك الهدف شفناه قبل (72) ساعة.
حالتكم دي شايفنو.
……
ملحوظة : يا هلالاب امشوا بدري على الاستاد المباراة حقتكم ان شاءالله ما عندكم اي مشكلة.
هوامش
اترك احساسي كاملا في الكتابة.
وكأس السودان الليلة ح يكون ان شاءالله من نصيب الهلال.
بس عاوزين الجماهير تمشي الاستاد.
عاوزين حضور جماهيري كبير من الهلالاب.
اي هلالابي الليلة مفروض يمشي الاستاد.
ويا ناس المريخ ما تتعبوا ساكت المباراة منقولة في قوون.
وانتوا يا ناس الهلال ما تتكلوا على التلفزة.
التلفزة في السودان ما مضمونة.
بعدين انتوا عندكم بطولة ح تفوزوا بيها ان شاءالله.
عشان كدا لازم تكونوا في الاستاد.
وخلوا الباقي لي ناس نيلسون.
محمد عبدالرحمن ضروري في مباراة اليوم.
ويا ريت نشوف وليد علاءالدين.
ونشوف اطهر كمان.
المباراة دي ألعبوها بي روقة.
ما عاوزين اي توتر.
ألعبوا كورتكم بس.
والنتيجة ان شاءالله ح تكون حقتكم.
ما ح نحذر من التحكيم.
عشان الهلال الليلة ان شاءالله بي تحكيم فايز.
ولا ح نعمل (الحكام) شماعة.
عشان الفريق المهزوم هو البعلق الخسارة على الحكام.
ألعبوا كورتكم.
وجضموا الكفر.
واستمتعوا في امسية هلالية خالصة.
فوزي الاسد وعاكف مصدر التفاؤل ذاتو.
ناس المريخ خليهم يتذكروا.
استاد الخرطوم دا دحين ما حصل مرة شلتوا فيه الكورة.
اوعكم تشيلوا الكورة.
خلوا المباراة تتم.
ناس بشه عندهم فهم براهم.
مهند الطاهر اتألق مع المنتخب والهلال محتاج ليه.
خاصة ان مهند الطاهر بروق الكورة.
ونحن عاوزين نلعب كورة رايقة.
الحذر من الاصابات ومن الايقافات.
قمة الممتاز مهمة.
الهلال السنة دي ح يجمع بين الدوري والكأس.
الليلة بكري المدنية ح يعيد (تسجيلو).
تسجيلو في (شباك) المريخ.
بكري بسجل في المريخ.
براكم بتجبوها لي روحكم.
………..
عاجل : الله يجيب لينا الساعة عشرة…(ونحن مبسوطين).
[/JUSTIFY]
وإن طال السفر – محمد عبد الماجد
صحيفة قوون
قلت لي كيف؟ كلى مفروكة وفحص بامية واللا بامية مفحوصة وكلى مهرودة !!!!!!!
قول واحد الهلال احرز الكأس الباقي ليكم كأس الممتاز!!!!
حلم ووهم
9) جمال سالم الليلة ناس (بشه) ح يعيدوا ليه (فحص وظائف الكلي)
وينك يازول أه بشة عمل شنو خلاك تسجل غياب اليوم .
ياها عادتك كل ما تنضرب اليوم التاني ما بنجد أي حرف ليك
انتظر في الممتاز
ضفر ايمن سعيد راجي بيغروك السلام بالثلاثة
اها الساعة عشرة وجدتك كيف يا عرص