عين الحسود فيها عود

عين الحسود فيها عود.. فلان عينو حارة.. العين رمت الجمل.. الحسادة والعين مترادفات للدمار.. دمار مادي، دمار معنوي، دمار نفسي..

ربنا قال “ومن شر حاسد إذا حسد”.. أفرد للحسادة آيه كاملة.. مع إنو قال “من شر ما خلق”.. وكان ممكن يكتفي بي دي وبس.. ولكن لخطورة العين قال: “ومن شر النفاثات في العقد* ومن شر حاسد إذا حسد”.. الحسد والسحر في مرتبة واحدة من حيث الأذى والأذية.

كتير تلقى ناس عيونهم حارة.. (حولينا وما علينا).. كنا نقول (عينّا باردة).. لو شفنا حاجة عجبتنا ونفسنا دخلت فيها.. وما لاقينها..

والمال قالوا برضو ما بيحسدو إلا سيدو.. كان أحدهم فرحان بحمارو.. وقاعد يتونس فيهو كتير ونجهو لحدي ما صبح صباح لقى الحمار متندل ميت.. بقرصة دبيب.

واحدة راسمة الحنة رسمة سمحة ومشت ليها عرس.. تاني يوم اتقلبت بها ركشة وكسرت كراعا.. لو فتشت حتى تلقى واحدة من النسوان العيونن حارة ناشتها وجابت خبر الكريع..

ومن أشهر الحساد وأصحاب العين الحارة في التاريخ كان نابليون بونابرت.. نابليون الواحد دا.. كان حاسد حسادة شديدة وعينو حارة..

درس العلماء وعلماء الفيزياء تحديدا.. العين والحسد.. لقوا إنو الذرة فيها نواة.. والنواة فيها جزيئات.. والجزيئات دي بتتحرك حسب ما الزول البيعاين ليها ودايرها تتحرك.. لو متوقع إنها تتحرك شمال حتتحرك شمال ولو متوقع إنها تتحرك يمين حتتحرك يمين.. ولو متوقع انها تتصاط وتجوط برضو دا حيحصل.. دا بالنسبة للزول العادي.. أما الزول الشوية عندو الطاقة دي عارف يستعملها كيف.. حيأثر في الذرة كلها.. والأقوى منو حيأثر في المادة المكونة من الذرات دي..

يعني الزول كلما كان صاحب طاقة موجهة توجيه صحيح حيكون حاسد شديد.. ويأثر في المادة القدامو بقوة أكبر.

والداير يبقى كدا ويمتلك الطاقة دي اليعصر علي الحسادة ويبقى حاسد.. لكن يبعد من المرايا.. لأنو ممكن يدي نفسو عين ويروح فيها..

ولو داير تمرن عينك وتخليها حارة.. ابداها من النملة.. اقعد عاين للنملة واحسدها علي جريها وشلهتتها دي.. بعد شوية تلقى مرتك جات ماشة.. وتخفج النملة وتكتلها.. ثم ارتفع إلى الفأر.. برضو أحسدو في جريهو ونطيطو من حته لي حتة.. بعد شوية تلقاهو يفرفر في خشم كديسة وجارية بيهو..

واعلم عزيزي حاسد المستقبل أن تمرين الحسادة داير صبر وطول بال.. (زي اليوجا) أحسد أي حاجة لا تأخذك رأفة ولا رحمة.. اقعد احسد واحسد.. وبعد شهرين حتلقى نفسك قد تمرنت على السيطرة على طاقة الحسادة الكامنة وحولتها إلى طاقة حسادة متحركة.. وأصبحت من أصحاب العين الحارة الذين يشار إليهم بالبنان.. وما حتحتاج إنك تمد إيدك علي زول ولا تضربو ولا يضربك.. تضوقو عين وتمشي أهلك مبسوط.. واعلم أنك تمتلك سلاحا فتاكا!