بابكر سلك
القصة ما قصة شيرنق
> لان الناس لسه فيهم وطنية
> حتى ولو تناقصت عند البعض
> الا ان الوطنية تفضل في النفوس زي «الرواب»
> والرواب معنى واضح
> ولكن بالنسبة لاولاد ميكي
> او لأولاد الما اولاد ميكي لكن بتمكمكوا ساي
> المستميكين
> حتى البرمودة مستلفنها
> والشعر مرقدنوا دق ساااااي
> وبدل الجل خاتين صابون سايل
> لي ديل كلهم
> لا ضير من شرح كلمة الرواب
> الرواب هو باقي الروب المنزلي
> بكبوا عليهو لبن لعمل روب او زبادي جديد
> وطالما رواب الوطنية باق فينا
> يبقى تتحرك دواخلنا غيرة على الوطن
> وعلى اي شيء يتعلق بالوطن
> بالذات نحن شعب يحب ان يفخر بنفسه
> وبوطنه وبحاجاته
> حتى ولو لم نقدم للوطن شيئاً
> نفخر به
> حتى سلبياته نفخر بها
> يقعد واحد يحكي ليك عن السيل
> بكل فخر
> وكيف ان السيل شال الحلة كلها
> وكيف ان الناس تعاونوا على مواجهته
> وكيف انهم بنوا من جديد الحلة في نفس مجرى السيل
> نفس الحلة في نفس مجرى السيل
> يفخر بعدم الاستفادة من التجارب والسلبيات
> لذا نحن شعب يفخر بأي شيء يخصه ولو كان ذلك الشيء يعتبر من السلبيات
> المهم
> كلنا في حاجة جوانا وجعتنا لما وصل اليه حال المنتخب
> ولان المنتخب يوحدنا
> او يفترض فيه ذلك
> ونحن ناس خلافيين جداً
> لكنا نتوحد ونلتقي عند المنتخب
> ولانه يهمنا يبقى بوجعنا
> التسلسل الهرمي يجعل أمنا الحكومة هي المسؤول الاول
> وحقو نوجه رماح النقد للفيل
> مافي داعي لتوجيهها الى الضل
> والضللة في قصة المنتخب كتاااار
> ضل الشتاء وضل الصيف البرمي عكس
> ضل الصيف اظنو اليومين دي بره البلد
> والخريف ليهو ضل
> نسيب الضللة
> ونمسك في أمنا الحكومة
> يا ماما
> الكورة ذاتها نخليها ؟؟؟
> نخليها ونمشي نذاكر !!!
> نذاكر لي شنو ؟
> هو الناس الاتخرجوا شغلتيهم عشان تقولي لينا ذاكروا ؟؟
> ماجستيرات سايقة ركشات
> عيادات داخل امجادات
> والفحيصين فارشين خردوات
> نقرأ ليه يا ماما !!!!!
> أيها الناس
> قليل من الاهتمام وخوف الله في هذا الوطن
> يجعلنا في مكاننا الطبيعي والطليعي الذي نستحقه
> يجب ان لا نبكي على اللبن المسكوب
> ولكن يجب علينا ان لا نمرر الامر مرور الكرام
> ونتجاهل وطن هو احق باهتمامنا
> ومستني قولة الحق منا
> وينتظر جهودنا وهو يقبع على رصيف النسيان
> أمنا الحكومة
> عليك الله المنتخب ده ما تقصري معاهو
> وعدم التقصير مع المنتخب يعني الاهتمام بكرة القدم
> يعني وضع الاستراتيجيات واستنهاض الهمم
> واعطاء الخبز لخبازه
> وخبازو الكرة لا يأكلون شيئاً من خبزنا
> لانهم اهل الكار
> أيها الناس
> نبارك لمن حالفه التوفيق من اهل الصحافة لقيادتها
> ونقول حظاً أوفر لمن لم يوفق
> ونخص بالتهنئة الأخ الأستاذ الرزيقي
> ونتمنى له التوفيق
> كما لا يفوتنا أن نهنئ الإخوة عائس وخليفة حسن بلة
> وكل الكوكبة التي كلفت بقيادة السفينة
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> في موضوع في سوق حلايب طال علينا
> الدكاكين الاتباعت للمواطنين يا والينا
> دفعنا ومشينا وجرينا
> لا شفنا دكان ولا قنعنا يا والينا
> بالتأكيد حانرجع بالتفصيل للموضوع يا والينا
سلك كهربا
ننساك كيف وندفع رسوم بالملايين وما استلمنا دكاكين
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
