نشاليـن دُبي

ثارة ثائرة السودانيين.. في الداخل والخارج من خلال مواقع التواصل الاجتماعي بالنت.. عندما قامت شرطة دبي بنشر صور وأسماء تمنطاشر سوداني على أساس أنهم من أخطر النشالين في الإمارة.. منبهة المواطنين والمقيمين اخذ الحيطة والحذر.. يعني لو لاقاهم زول بشبه أي واحد من الفي الصورة. عليه أن يقبض قوي في جيبو.. بالتالي دي ح تصبح فوبيا تمسك الإماراتين والجاليات الأخرى من أي سوداني.. حايم في الإمارات حتى لو كان السفير وحايم بكرعيهو.. يشوفوهو يقبضو في جيوبهم ويمشو بهنوووووك بعيد منو.. وخصوصا أن ملامحنا تتشابه لحد بعيد.. وممكن السوداني تقبضو وانت مغمض.. المهم المحيرني الشرطة دي ما قبضت الناس ديل؟.لو قبضتهم وهم عندها، الناس تاني الحيطة والحذر من شنو وفوق كم؟.. وهي أكيد ح تبعدهم للسودان طيب بعد تبعدهم منبهين الناس يعملو حسابهم ليه؟.. اعتقد ان الهدف ابعد من تنبيه الناس لمجرمين او معاقبة المجرمين بالتشهير.. علا كان دايرين ينبهونا نحن هنا.. ونحن هنا النشال يباريك.. وينشل منك العشرين جنيه الفي جيبك.. ويسب ليك”عالم فقر”!! وتحننو ويباريك تاني ويرجع لك العشرين في جيبك.. ويمكن يعرض عليك أن تكون نشال متعاون.. المهم كانت ردود الافعال للغاضبين”انهم ديل ما سودانيين”.. “ويا اخي حكومتنا بتدي اي زول جنسية”.. أو ” الله يفضحهم جابو راسنا الواطا”.. “يا أخي لو دايرين ينشلو ما يقعدو ينشلو هنا” وهو يكون عارف انو النشل هنا ما بيجيب حق مساككة الهدف الستهدف بالنشل.. وجدت أن معظم الناس اتفقت على أننا مجتمع المدينة الفاضلة.. أواننا ملائكة الله على الأرض.. ما بتجي مننا اي عيبة.. ونسو انهم قبل شهرين كانو يتدالو في الواتساب تسجيل آثار ضجة، لفى الدنيا باركانها الاربعة.. وكان ابطال التسجيل مقيمين في دبي.. . نحن بشر زي باقي البشر.. فينا الصالح والطالح.. فينا المنحرف وفينا السوي.. لكن ترتفع نسبة الانحراف مع الاستعداد الفطري ترتفع نتيجة لتأثير عوامل خارجية كتيرة.. اهمها العامل الاقتصادي.. من حاجة.. مع عدم توفر العمل لكسب لقمة العيش.. مشكلتنا ايها السادة اننا فاكنها في روحنا.. أي حاجة تحصل يقول ليك دا ما سوداني.. علينا أن نخلغ ثوب النرجسية دا.. ونحاول أن نكون واقعيين.. وعليكم الله قللو لينا من سلخ جلد النملة.. ونحن ونحن ونحن.. الغريبة نتسامح.. مع الهمباتة.. وهم رباطين.. مهما اختلفت التسمية أو الهدف.. الهمباتي فلان قلع الجمال من الراعي وكشاهن قدامو ومشى باعن في الدامر.. ورجع بالقروش وهو راكب فوق جملو ويدوبي.ويصرفن على حبيبتو ام خديدن يلالي لا رشيم لا فصيدة.. يكملن معاها يركب جملو ويمشي يقلع تاني. ونحن نسمع قصصو وكل دقيقة نردد (هيع).. ويصل بعضنا من اعجابه بالهمباتة درجة التماهي.. ونزيّن في نفسه القلع.. والاستيلاء على أموال الغير من غير وجه حق.. وان اختلفت الاساليب.. ايها السادة لا فرق بين من يستولي على المال العام وبين من يتلبد في اسواق دبي كايس لي زول ينشلو.. كلهم فوق سرج وااااااااحد!