انتصار الهلال على الزمالك وحده يساوي (3) بطولات سيكافا و(7) دروع انقاذ

لو في شاعر كبير قال ليك ان قبل ما اكتب (القصيدة) لازم اشرب لي (كباية لبن) دافئة اكيد قوله هذا لن يجعل (كباية لبن) قاعدة في كتابة الشعر.

ولن تكون (كباية اللبن) بحر من بحور الشعر لكن ناس المريخ لو سمعوا المعلومة دي ممكن يعملوا لينا (كباية اللبن) قاعدة اساسية في كتابة الشعر.

عفوا (اللبن) ما عندو علاقة بالشعر.

إلّا ناس المحلية يكون عندهم رأي تاني.

ولو في فنان كبير قال ليك قبل ما ألحن النص بعاين بالشباك وبأخد لي نفس عميق.

هذا لا يعني باي حال من الاحوال ان (المعاينة بالشباك) شرط من شروط (التلحين).

في ناس السنة كلها بعاينوا بالشباك (دجاجي يلقط الحب ويجري وهو فرحان) ما بقدروا يلحونها.

التلحين ما عندو اي علاقة بي الكلام دا.

لا من بعيد ولا من قريب ولا من الكلاكلة ذاتها.

قبل ايام علقت على اعتزال صلاح ادريس للكتابة الرياضية ولو موقتا…(صلاح ادريس ما بقدر يصبر اكتر من شهر).

هسع تلقى ايدو ماكلاه للكتابة عن (سيكافا).

سوق سيكافا دا ما تضيعوه اكتبوا ساكت.

قلت وقتها واللـه صلاح ادريس لو كمل جميلو واعتزل (التلحين) كمان يكون ما قصر معانا.

الكتابة براها ما كفاية.

من الحكايات البحكوها في الحتة دي قالوا ليك واحد ركب ليه في تاكسي مع سواق قديم.

السواق النوع البخت ليك طاقيتو قدام.

(سواقين) التاكسي طبعا في الكلام ما بتلحقو الواحد من تركب معاه لمن تنزل منو بكون حكي ليك (ليالي الحلمية) 7 اجزاء.

صاحبكم ركب ليه مع سواق تاكسي بتاع التاكسي ما بشوف كويس كل ما يمشي خطوة خطوتين بدخل ليه في عمود.

كل (5) دقائق يطلعوا ليك (الراكب) من الانقاض زي (الافلام الاجنبية)ويشغلوا ليك صوت السارينا.

الراكب مرة يفقد كراع ومرة يفقد عين ومرة نخرة…اخر المشوار وصل (صرة) بس.

الراكب (لديح) بعد دا يقوم يتنفض ويركب ليك تاني مع السواق في التاكسي.

وبتاع التاكسي يحكي.

قال للراكب انا شاعر وملحن ومطرب ورسام كاريكاتير وناقد فني ومؤلف مسلسلات دينية وبتاع ديكورات ودكتور اسنان (حاجات كدا ما بتجمع مع بعض).

الراكب يقول ليه كدا سمعني حاجة من شعرك.

السواق يسمعو حاجة من شعرو زي (الدراب)…ويدخل ليه في عمود كهربة بالتاكسي.

الراكب يطلعوه من الانقاض بدل ما يقول ليه خلي السواقة يقول ليه خلي (الشعر).

شعرك احسن منو سواقتك.

الراكب يقوم يقول للسواق كدا سمعني حاجة من الحانك.

السواق يقول ليه (لحن) زي الطين ما فيه اي ابداع ويقوم يدخل ليه في حيطة.

الراكب يطلعوه ليك من الانقاض.

الراكب يقوم يتنفض وبدل ما يقول للسواق خلي السواقة بقول ليه خلى (التلحين).

تلحينك اخير منو سواقتك.

يمشوا شوية كدا يقوم يقول للسواق كدا وريني حاجة من رسوماتك في فن الكاريكاتير.

السواق يطلع ليه (كاريكاتير) لو حفزوك عليه ما تعرفو دا كاريكاتير ويقوم كدا يدخل ليه في قلاب.

يطلعوا ليك الراكب من (الانقاض).

الراكب بدل ما يقول للسواق خلي السواقة بقوم يقول ليه خلي رسومات الكاريكاتير.

رسوماتك اخير منها سواقتك.

يمشوا شوية الراكب بقول للسواق كدا سمعني حاجة من اغنياتك عشان نشوف صوتك.

السواق يقعد يغني …غنا يضرس ويدخل ليه في خور.

الراكب يقوموه ليك من (الانقاض) ..حالتو بالبلاء بدل ما يقول للسواق خلي السواقة بقول ليه خلي الغنا.

غناك احسن منو سواقتك.

يرجع يركب تاني في التاكسي …يقوم الراكب يقول للسواق كدا وريني حاجة من نقدك الفني.

السواق يوريه حاجة مهببة ويدخل ليه في فرن.

يطلعوا ليك الراكب من الانقاض.

الراكب بدل ما يقول ليه خلي السواقة بقول ليه خلي النقد الفني.

نقدك الفني اخير منو سواقتك.

المهم صاحبنا يطلع من حادث ويدخل في حادث وقبل كل حادث يوريه موهبة من مواهبه.

وبدل ما يقول ليه خلي السواقة الراكب كان بقول ليه خلي الموهبة.

الى ان دخل صاحب التاكسي في قطر ..طلعوا ليك الراكب وهو بين الحياة والموت خلاص بقول في وصيتو الاخيرة.

الراكب عاوز يموت قال ليهم جيبوا لي سواق التاكسي.

جابوا ليه سواق التاكسي.

قال ليه اسمع عاوز اقول ليك حاجة (سواقتك) دي لو فكيتها ما بتاكل عيش ابقى عشرة على (التاكسي) بتاعك دا ..انت ما بتعرف في الدنيا دي احسن من السواقة.

سواقتك افضل من الحاجات البتعمل فيها دي.

الراكب قال الكلام دا ومات على كدا.

هسع يا ناس المريخ لو فهمتونا – سيكافا دي لو خليتوه ما عندك غيرها اي طريقة.

ابقوا عشرة على سيكافا دا ..(لا عندكم في الابطال ولا في الكونفدرالية ولا في الممتاز ذاتو).

ابقوا عشرة على (سيكافا) دي.

يا هم ناس عزام التنزاني وبنادير الصومالي البتقدروا عليهم..(تقول صوالين حلاقة).

واللـه اسم بنادير دا فيه حلاة اسم صالون حلاقة.

وصالون كمان يكون ناصية.

نرجع لبتوع (المهنية).

ناس (المهنية) الطلعوا لينا حديثا.

المريخاب واعلامهم كان بتكلم عن ان مباراة الهلال والزمالك ودية (الجماعة ديل طبعا ما عارفين لوائح دوري المجموعات).

ولا عندهم فكرة في الموضوع دا.

سيكافا خربت ليهم رأسهم.

يا جماعة المجموعات دي ما فيها (وديات) بغض النظر عن الشكوى نكسبها ام يرفضوها.

ما مشكلة.

طالما هنالك ترتيب لفرق المجموعة ودرجات تمنح حسب نتائج المباريات يبقى ما في مباراة ودية.

ودية دي عندكم في سيكافا.

كيف تكون مباراة الهلال والزمالك ودية والاتحاد الافريقي يمنح اول المجموعة وثانيها مبلغا معينا ويمنح ثالث المجموعة مبلغا اعلى من رابع المجموعة.

اي ان الهلال سوف ينال من (100) الف دولار فارق من الزمالك رابع المجموعة.

هذا المبلغ كما افادنا المحامي عماد جلاجل يسوي او هو اكثر من حافز ثلاث بطولات في سيكافا باعتبار ان بطل سيكافا يمنح (30) الف دولار.

بينما انتصار الهلال وحده على الزمالك جعل الاتحاد الافريقي يزيد حافز الهلال في المجموعات (100) الف دولار من الزمالك.

اذا انتوا يا بتوع (المهنية) في (30) الف دولار جايبين ليكم طيارة خاصة ..وعاملين ليكم مهرجان وجايبين حرم النور تغني ليكم نحن في الـ (100) الف دولار نعمل شنو؟.

نجيب برشلونة.

انتوا انتصرتوا على بنادير الصومالي عملتوا كدا نحن انتصرنا على الزمالك المصري نعمل شنو؟.

يا جماعة اللـه خلوا (مهنيتكم) حلوة شوية.

ما كدا.

ما تخلوها ظاهرة.

عارفين انتصار الهلال على الزمالك بساوى كم؟.

بساوى (3) سيكافات زي سيكافاتكم دي مع (7) دروع من دروع مباريات قمة الانقاذ.

هذا اذا حسبنا (3) سيكافات بـ (90) الف دولار والعشرة الالف الباقية بنديكم بيها (7) دروع انقاذ.

اها قصرنا معاكم.

الكلام البنقول ليكم فيها دا بمنتهى المهنية.

عشان ما تقعدوا تنططوا لينا عيونكم ساكت.

نحن جننا وجن نطيط العيون.

….

ملحوظة : رأيكم شنو يا ناس المريخ بعد (40) يوم تعملوا ليكم تاني (سيكافا).

هوامش

ما في فرق بين محسن سيد واسامة عطا المنان الاتنين قاعدين حارسين المريخ.

انت يا اسامة عطا المنان بي حركاتك دي خليت شنو لي لفيصل سيحة.

حركاتك دي فيصل سيحة ما بعملها.

قالوا ليك اسامة عطا المنان في بطولة سيكافا كان مساك صبارة الموية في كنبة المريخ.

دا امين خزنية الاتحاد العام.

اقصد امين خزينة الموية.

ماسك (التلج).

جمال الوالي علّم قيادات عليا كسير التلج.

بقوا يكسروا في التلج بدون خجل.

ديل بكسروا على طوووول على قول الزعيم عادل امام.

بله جابر قال في قناة الشروق نهدي الكأس للشعب السوداني.

انت مالك يا بله عاوز تجيب للشعب السوداني (ملاريا).

كأسكم دا ما فايت علاءالدين يوسف.

انت عاوز تهديه للشعب السوداني.

يعني الشعب السوداني راجي كاس سيكافا دا.

قاعد ومنتظر.

وما عندو شغلة تتخيلوا.

جمال سالم دا حارس ما اعتيادي تتخيلوا.

جمال سالم دا طيّر المريخ امام كمبالا سيتي في بطولة الاندية الافريقية للابطال.

وجاء وطيّر كمبالا سيتي في سيكافا امام المريخ.

يعني الوحيد الما طار في العمليات دي جمال سالم.

صاحبكم مصدق يعني.

واللـه يا جمال سالم يلم فيك بكري المدينة يخليك تستفرغ سيكافا دي (عشب عشب).

…..

عاجل : فيصل سيحة اتوقعوه بكرة الجمعة يقول ليكم الضربة الترجيحية التى سجل منها فريق عزام في مرمي المريخ (تسلل).
[/JUSTIFY]

وإن طال السفر – محمد عبد الماجد
صحيفة قوون