مفطوم دور الـ (64) ما بتسكتو (سيكافا)

حرم النور دخلها شنو بي سيكافا ؟…(مالكم أنتوا عاوزين تكسروا لينا مرايات العربية)

ناسنا ناس المريخ ديل بي

أمانة كدا بي البعملوا فيه دا بعد الفوز بي سيكافا واضح أنهم فاقدين حنان

(عزام) بتاعكم دا في الدوري السوداني (طباخ) ما بنقبل بيه

مرات يقولوا ليك الزول دا (فاقد حنان) .. ودا في علم (المنفرشيا)..ودا علم قاطعو من رأسي أخطر نوع ممكن أن يكون (ضحية) في القصص العاطفية.

زول على الهبشة.

أخطر أنواع السمك.

أقصد أخطر أنواع الضحايا.

استوقفنا مرة في هذا المقام (وهذا من باب الاستزادة فقط) أن ثنائي العاصمة في أغنية لطيفة وجميلة وخفيفة غنوا للزول المفارق حيو (من غير ما يجيبوا ليه سيرة).

عجبتي الفكرة وشالني العفاف الذي كان في النص المتواري خلف قضبان الحياء.

هذا إذا كان للحياء قضبان (حسب اجتهاداتنا الشخصية).

تشيلوا وتقعلوا في عيونكم من الاستغراب.

وقريباً من هذا النص أو بعيداً منو ما عارف (المهم عندي كلام في رأسي عاوز أقولو) غنى النور الجيلاني (قلبي مشغول بي صبية شالت النوم من عينيا) في أغنية كدراوية التى كتبها ولحنها النور الجيلاني فتعجبت على الاطلاق هنا في النص وتحاشى التحديد إذا حدد المحبوبة بكلمة (صبية) وخلى أي زول يفسر على كيفو.

وهذا عفاف آخر (ﻣﺎ ﺣﺮﺍﻡ أﻧﺖ ﺍﻻﺯﻳﺎ ﻭأﻧﺖ أﻗﺮﺏ ﺯﻭﻝ إﻟﻴَّﺎ ﺑﺸﻜﻲ ﻟﻴﻚ ﻣﺮ ﺍﻟﺸﻜﻴﺎ ﻭﺍﻟﻘﻠﻴﺐ ﻧﻴﺮﺍﻧﻮ ﺣﻴﺔ ﻭﺍﻟﻌﻴﻮﻥ ﺩﺍﻳﻤﺎً ﻣﻠﻴﺔ ﻭﺍﻟﻤﻨﺎﻡ ﻓﺎﺭﻕ ﻋﻴﻨﺎ ﺍﻟﻠﻪ ﻟﻲ ﺭﻭﺣﻲ ﺍﻟﻮﻓﻴﺔ ﺷﺎﻳﻠﺔ ﺭﻳﺪﻙ ﻭﺍلأﺳﻴﺔ).

طبعاً ناس المريخ من (الخلعة) الفيهم ح يقولوا هسع الكلام دا دخلو شنو بي سيكافا.

إلّا يجيبوا ليهم الكلام عديل كدا.

عليكم اللـه في (اسية) اكتر من البتعملوا فيها دا.

نرجع لبداية الكلام.

الزول الفاقد حنان لو قالوا ليه كلمة (مشتاقين) تجهجو ليك يبقى ليك (رقيق) ونحيف وما بنوم الليل.

تطيّر ليه النوم من عيونو.

مشتاقين بس يشيل ويعيد فيها ..ويحلل ويعمل ليها برنامج ويمشي يقعد في شارع النيل اليوم كلو يفكر في (مشتاقين) دي.

ولو قالوا ليه : أنت وين الأيامات دي؟.

يشيل ويقطع في (التخمينات) ما يخلي ليه (خيار) في الدنيا ما يمشي عليه يا ربي الزول دا قاصد شنو؟.

وقال كدا ليه؟.

وممكن كمان يبقى (شاعر) عديل كدا ويعمل ليه ديوان شعر كامل لو في (زولة) كدا من بنات الحلة قالت ليه : (أنت زول رائع).

يتكسر عديل في الشارع ويبقى يمشي ويجي قدام البيت.

الزول الفاقد حنان دا يومو البقع في الحب ..بقع بي وشيهو ..يخلي الأكل ويكون اليوم كل سارح ..ويشخبط في الحيط.

ويبدأ ليك كدا زي فيلسوف وما فيلسوف.

زي زول قنعان كدا في الدنيا وما قنعان.

زاهد وما زاهد.

صارف وما صارف.

عارف وما عارف.

زي كأنو تفكيرو عميق وما عميق.

بين بين.

وكل يوم يطلع ليه بي قميص جديد (حالة حب).

وممكن بي لغة الأيام دي نقول عليه اليوم كلو زولكم بكون قاعد في الفيس بوك والواتس آب.

ما بطلع.

يراقب بس في زولو كتب في الحالة شنو؟…وطلع متين؟..وآخر ظهور كان ليه الساعة كم؟.

يخلي أي حاجة ويقعد يتابع في برنامج الزول دا.

ناسنا ناس المريخ ديل بي أمانة كدا بي البعملوا فيه دا بعد الفوز بي سيكافا واضح أنهم فاقدين حنان.

ديل اتكسروا لينا غزل في سيكافا وجابوا لينا كمان طلال حلفا والأمين البنا وحرم النور يغنوا لينا في أغاني الحقيبة.

حرم النور دخلها شنو بي سيكافا ؟…(مالكم انتوا عاوزين تكسروا لينا مرايات العربية).

أمانة فيكم كدا في علاقة بين سيكافا وأغاني الحقيبة.

خلوه الزول الفاقد حنان.

انتوا بتعرفوا الزول الما عندو موضوع.

الزول الما عندو موضوع ظاهر من تلفونو.

ممكن يضرب ليك تلفون يتكلم معاك ساعة ونص.

بعد ساعة ونص يقول ليك أنا ضارب ليك ليه؟…كنت عاوز أقول ليك شنو؟.

تتخيل نسيت الموضوع الضارب ليك فيه.

والزول الما عندو موضوع ممكن يركب ليه حافلة من الكلاكلة وينزل ليك في السوق العربي ويقول ليك اللـه هفت لي.

تقول ليه هفت ليك شنو؟.

يقول ليك هفت لي نمشي نفطر في قندهار.

يا زول نطلع من (القراريص) دي…باللـه يجيبوا ليك القراصة في الفطور تقول شغال في الاهرامات تقول عاوز تعمل في الجيزة الهرم الرابع.

قراصة تدخل فيها ايدك للكوع عشان تصل نهايتها بي غادي.

عدم موضوع بس.

الزول الما عندو موضوع ممكن فجأة كدا يقترح ليك حاجة ما تخطر بي بالك.

فجأة كدا يقول ليك رأيك شنو نعمل لينا رحلة للقاهرة.

نطلع شوية من البلد دي.

نشم لينا هوا.

والزول الما عندو موضوع تلقاه حايم النهار كلو في الحلة.

من الدكان لي محطة المواصلات.

ما يخلي ليه (جك فول) حايم.

أي حاجة يقعد يعلق ليك عنها.

وآخر تعليقاته يقول ليك الأيامات دي في مسلسل هندي في (زي أفلام) متابعو.

لو قلت ليه متابعو …تعبت معاه ..بقعد يحلل ليك المسلسل مشهد مشهد.

ولو قلت ليه كمان ما متابعو يقعد يقص ليك المسلسل مشهد مشهد ويقول ليك عليك اللـه تابعو من الليلة.

زول وما عندو موضوع.

لو قلت ليه ناس فلان جابوا ليهم (قولة خير) تمشي تلقاه ركّب ليه صيوان في شارع بيتهم.

الناس الما عندها موضوع اصلو ما قاعدين يقصرو.

أي حاجة كدا يتصدروها ليك.

ناس المريخ بالحالة العليهم دي يؤسفنا أن نقول عنهم ما عندهم موضوع.

زي حكاية (الشفتلي ود الشافو زعلان).

أها أمانة فيك كدا (الشفتلي ود اشلافو زعلان) دا مالو؟.

الشفتلي ود الشافو زعلان دا …زول صعب.

زول شفت.

زول ما بقصر في الواجب.

الشفتلي ود الشافو زعلان دا لمن يسمع ليه خبر طشاش ساكت خبر من بعيد لي بعيد.

خبر طاش بس ويقولوا ليه التوم ود الكدرابي عاوز يعرس.

بس من يجيبوا ليه سيرة العرس دا.

عندو شنطة ينزلها ليك من فوق ..ويمشي قبل (45) يوم من العرس ويعسكر ليك في بيت العريس.

زول واجب ما بقصر.

لو قالوا ليه خديجة بنت السترة تعبانة في مستشفى الخرطوم.

يشيل شنطتو ويمشي على مستشفى الخرطوم لو خديجة بنت السترة دي ما طلعوها على المقابر ما بجي راجع.

يمارضها إن شاء اللـه (7) سنوات.

إلّا تموت.

يدفنها ويجي راجع.

زول واجب ما بلعب في الحاجات دي.

هسع ناس المريخ عاوزين يعملوا لينا الواجب في سيكافا.

عاوزين يفرشوا ويقفلوا الشارع.

طبعاً نحن مراعيين الحالة الحرجة العايشين فيها ناس المريخ.

اتخيلوا كدا واقعدوا شرعوا معاي.

اتخيلوا كدا (رضيع) يفطموه ليك من الأسبوع الثالث.

أكيد حالتو بتكون صعبة وبنيتو الجسمانية ذاتها بتكون ضعيفة.

وممكن تكون ما عندو مناعة …وبمرض بسهولة وبكاي وما بنوم الليل.

ناس المريخ بقت عليهم نفس الحالة.

جماعتنا ديل فطموهم من دور الـ (64).

شموا البطولة كدا ..وفطموها منهم.

عشان كدا حالتهم بقت صعبة.

وقت شافوا سيكافا دي شافوها زي المنقذ زي الأمل زي الحلم.

ناس يشاركوا في سيكافا مرتين في (6) شهور وعاوزنهم ما يشلوها.

في جنون اكتر من كدا.

سيكافا في (6) شهور مرتين.

ليه وعشان شنو؟.

عشان يسدوا النقص دا.

عشان يعالجوا الحالة دي.

عشان يطلعوا من الوضع دا.

عشان يتخارجوا.

جماعتنا ديل كل ما ينزقوا ليهم في حاجة يشاركوا في (سيكافا).

بعدين ناس عزام وبنادير ديل نحن ما بنلعب معاهم.

ديل لو جاملناهم كدا بنضرب ليهم تلفونات.

معقولة..عزام شنو كمان؟.

عزام بتاعكم دا في الدوري السوداني طباخ ما بنقبل بيه.

بتاع الترحيلات ما بنقبلو.

…

ملحوظة : ادخل بعد كدا في الهوامش كفاية.

هوامش

أسامة جويلي قال لي من الأبطال طلعوا من دور الـ (64) من سيكافا طلع خازوق.

نعمل ليهم شنو يا أسامة.

الجماعة فرحانين.

ونحن فرحتكم دي واللـه لقينا لينا فيها موضوع.

سيكافا دي ح أكتب عنها (6) شهور.

لو كسبنا الشكوى …بكتب عنها شهرين.

لكن لو ما كسبنا الشكوى ح أكتب فيها إلى الموسم الجديد.

لمن تطلعوا من التمهيدي.

نحن ذاتو فترنا من التمهيدي بتاعكم دا.

الغريبة في جماعة بقوا بكسروا تلج.

بقوا فرحانين مع جمال الوالي.

ديل من كسير تلجهم بقوا يفرحوا اكتر من جمال الوالي.

طبع ما كويس.

انتوا ما تقولوا الحقيقة.

ما تعترفوا.

بدل اللولوة البتعملوا فيها دي.

ضربت لي (سلك) أبارك ليه سيكافا.

ما عارف كنت أبارك ليه ولّا أكفر ليه.

ليقت (سلك) بره الشبكة.

أها عليكم اللـه يا جماعة أنا قصرت.

أعمل شنو تاني؟.

معاوية الجاك قال عاوز يضبح.

قلت ليه تضبح شنو يا ود الجاك؟..إلّا ود أبرق.

سيكافا دي اكتر من (ود أبرق) ما بتستاهل.

………..

عاجل : الواحد لو اشترى ليه (بطيخة) من السوق المركزي وشالها في كتفو .. ناس المريخ ديل ممكن يعتبروها (بطولة محمولة جوًا).

[/JUSTIFY]

وإن طال السفر – محمد عبد الماجد
صحيفة قوون