محمد عبد الماجد
العدس والفحم والزول الواقف هناك
“””””””””””””””””””””
كنا بنشيل ليك هم كبير لمن الاستاذ يقول لينا افتحوا قوس عارفين القوس بجيب ليه بلوة كبيرة
“””””””””””””””””””””””
(حاجة آمنة) اتصبري الاغنية التى تغنت بها فرقة عقد الجلاد في بداية التسعينات فخرجت بها الجلاد من شبه الاغاني الذي كان معتادا في ذلك الوقت
“””””””””””””””””””””””””””””
الشيء البسأل منو صلاح ادريس دا كاتب وإلّا طاعن؟
“”””””””””””””””””””””
·علاقة الزول الواقف هناك – بالفكرة الغريبة شنو؟.
·اقول ليكم حاجة يمكن تختصر الكثير من (المسافات) المستفة في الخاطر.
·توقف ليكم الكثير من (الشنط) المعلقة في الشوق.
·مرات لمن تكون بتتكلم ليك مع زول في موضوع اي موضوع ويكون الزول عاوز (يطوفش) ليك الموضوع بقوم يرفع رأسو كدا ويقول ليك : (شفت الزول الواقف هناك داك).
·من تقول ليه : ايوا شفتو مالو؟. بتكون انت كدا طلعت تلقائيا من الموضوع الاول الذي كنت بتسمع فيه بي لهفة.
·بدون ما تشعر بتلقى نفسك علقت في الزول الواقف هناك.
·مالو؟.
·والحاصل شنو؟.
·طيب العدس والفحم علاقتهم شنو بالحكاية دي؟.
·لا دا موضوع طويل شفتوا الزول الواقف هناك داك…(اعملوا حسابكم منو).
·كل هذه الاشياء ما علاقتها بالعدس والفحم والطعون التى قدمت في مجلس الهلال المنتخب.
·هل هذا قدرنا ان نعيش في هذا الوضع غير المستقر وان يكون السبب في ذلك هم ابناء الهلال انفسهم.
·اصبحنا ندمن العيش في اللا استقرار.
·عدم استقرار طول الموسم.
·نشارك في البطولات الافريقية الفريق يكون ماشى زي الطلقة ما في اي مشكلة.
·يقوم فجأة يظهر لينا (عدم استقرار) يطفش علينا البطولات..ونبقى نعيد ونكرر ونقول : والله يا ريت ..وكان مفروض يحصل …ولو عملنا كدا.
·كل مرة (بنخيّط) في النظريات دي…(بدون اي فايدة).
·اذا جاء مجلس معين ..انتقدوه الناس وهاجموه وغضبوا لأن المجلس معين ولأن صبغته السياسية تغلب عليه.
·وهاك يا تنظيرات واحتجاجات وكلام كبير.
·واذا جاء مجلس عن طريق الانتخابات كانت دوامة (الطعون) التى نعيش فيها الآن.
·وفي كل الاحوال يتضرر الهلال.
·والخاسر الاول والاخير الهلال.
·اشعر في كثير من الاحيان ان مشكلتنا في (القانون) وليس في (الفوضى).
·الآن ركبوا موجة (الطعون) بحجة انها ممارسة قانونية.
·بالله.
·اصلو ما بصدق.
·باسم القانون نرتكب الكثير من الاخطاء التى تبلغ حد ان تكون جريمة.
·في المسلسلات المصرية ذات الخلطة الصعايدية عندما تسمع عبارة (لازم القانون يأخذ مجراه) يعني ذلك ان الحكاية عكت وان الموضوع ح يجر.
·وان المسلسل سوف يكون فيه جزء تاني.
·وما امتداد مسلسل ليالي الحلمية الى الجزء الخامس إلّا عشان حكاية (لازم القانون يأخذ مجراه).
·وعييك لمن القانون يأخذ مجراه.
·قانون شنو البتفصلوا لينا عشان تعرقلوا الحكاية وتسلوا روح الواحد.
·نحن كمان قالوا ليكم ما بنعرف القانون.
·الهنود في افلامهم الهندية قنعوا ليك من القانون ليس لعيب بالتأكيد في القانون ولكن عشان سوس الفساد الذي ضرب القانون الهندي.
·لاحظوا اني بتكلم عن القانون الهندي.
·ما عندي اي علاقة بي قانونكم دا.
·بتكلم في القانون الهندي.
·الفيلم الهندي من يجيبوا ليك فيه سيرة (الكانون) بخنعا..نهي مشربة ..اعرف الخبط ح يدور.
·وحبيبة البطل ح تطلع اختو بالرضاعة.
·وعينكم ما تشوف إلّا النور ..وهاك يا موت وهاك يا ضرب ودم.
·الحاجات دي نحن حافظنها حفظ.
·مرة عندي قضية …كان المتحري فيها (رقيب اول).
·اها رقيب اول دا لمن بقى (لواء)..قضيتي ما انتهت.
·العندو زمن ينتظر ليكم (ليالي الحلمية) حقتكم دي منو؟.
·امشي واجي كل يوم…القاضي الشغال في القضية نزل معاش وبديله نزل معاش.
·خمسة نزلوا معاش في قضيتي دي.
·وانا قاعد وبسمع في الحركة.
·شفتوا الزول الواقف هناك.
·نخش بعد كدا على (الفكرة).
·الفكرة الفوق.
·الفكرة – افتح قوس ..واقعد فيه ثم اقفل القوس بعد ذلك استاذ اللغة العربية زمان كان عندما يقول لينا في حصة الاملاء افتحوا قوس كان يأخذ نفس عميق.
·ونحن نشيل ليك هم كبير من حكاية افتحوا قوس دا عارفين القوس بجيب ليه بلوة كبيرة.
·فتح القوس كان بيجب ليه بلاوي…ونحن بيني وبينكم ما فاضيين للحكاية دي.
·ولا عندنا وقت.
·الاستاذ كان يشعرنا ان فتح القوس هذا عمل وطني كبير نضال بالمفتخر كدا ..مثل فتح الكبري او فتح الشارع رئيسي.
·ثم يتنهد الاستاذ ويسترد النفس الذي اخذه ليقول لنا وهو في استرخاء تام (اقفلوا القوس).
·فنتصبب عرقا لأن اغلاق القوس وقتها كان عملا صعبا وشاقا.
·قلاب ما بقفلو ..ما زي اقواس الزمن دا …هسع شفع الزمن دا قفل القوس ما بستغرق معاهم ثواني.
·ولا بشتغلوا ليكم بالموضوع دا.
·نحن كان (فكرتنا) كلها بتكون في ما كتب داخل القوس ..يا ربي الكلمة دي ليه ميزوها وعملوا ليها قوس.
·نقعد نحلل ونستشرح لمن نفهم حاجة.
·اولاد الزمن دا القوس عندهم زي الما قوس ..واحد.
·عشان كدا الاقواس ذاتها بقى ما عندها قيمة ..وما عندها طعم.
·زمان السنة كلها يمكن يقولوا ليك في المدرسة افتح قوس واحد.
·تعال شوف هسع دي ..بقى في استهلاك غريب للاقواس.
·اي كلمة يقوسوها ليك.
·البتستاهل والما بتستاهل.
·لكن بالجد خلونا نقول الفلسفة شنو في انك تفتح قوس وتقفلو؟.
·نشوف موضوع (الفلسفة) هنا شنو؟.
·الكلمة البتكون جوة القوس الزمن دا ما فيها اي ميزة وما عندها اشارة بتخليها تتميز على باقى الكلمات البرة القوس.
·اقواس آخر زمن.
·شفتوا الزول الواقف هناك.
·اروع زول دخل لينا العدس والفحم في الاغنية السودانية هو الشاعر عبدالوهاب هلاوي.
·عبدالوهاب هلاوي دخل لينا العدس والفحم في اغنية حاجة امنة اتصبري.
·ويا ريت كمان لو وقفت على كدا.
·هلاوي دخل لينا (جوز الحمام)..وناس الموية جوووك.
·حاجة آمنة اتصبري الاغنية التى تغنت بها فرقة عقد الجلاد في بداية التسعينات فخرجت بها من شبه الاغاني الذي كان معتادا في ذلك الوقت.
·اتصبري اتصبري.
·طبعا اقسى حل في الدينا هو (الصبر).
·يعني وقت تمشي تشكي ليك لي زول ..والزول يقول ليك (اصبر بس) بكون قفلها عليك.
·يعني ما في امل.
·ما في حل.
·ما عندك اي طريقة غير انك تصبر.
·زي الدكتور البقنع من (المرض) يقوم يقول للزول المرضان والله نحن مرضك دا ما عندنا ليه علاج لكن بس اصبر…خلي املك كبير.
·عبدالوهاب هلاوي في اغنية (حاجة امنة) اشاع لينا (الصبر) تمشايا مع الحالة الاقتصادية وقتها.
·والتى مازال فيها الكثير من المعاناة.
·عشان كدا فرقة عقد الجلاد غنت (اتصبري اتصبري).
·والناس لي هسع صابرة.
·وما قالوا اي حاجة.
·وما عملوا اي شيء.
·ماسكين لي باقى العدس دا وقاعدين.
·فلسفة العدس شنو؟.
·يتخيل لي كدا (العدس) دا حالة من حالات التمدد غير المبرر في المعدة.
·تاكل ليك عدس ..تتنفخ ما تعرف تدخل نفسك من وين؟.
·تبقى زي الميدان الفي الحلة ..قدر ما تمشي فيه ما تصل آخرو.
·كلو من (العدس).
·تقعد تهمهم ليك بي كلمات غير مفهومة والسبب العدس.
·شفتوا الزول الواقف هناك.
·الشيء البسأل منو صلاح ادريس دا كاتب وإلّا طاعن.
·طاعن وإلا ملحن.
·باقى نحن اتلخبطت علينا الاختصاصات.
·زمان كان عندنا حارس مرمى صعب.
·حارس شفت.
·آخر عشر دقائق بقوم يتقدم..ويلعب (رأس حربة).
·كنا ما بنقدر نقول ليه اي حاجة.
·ولا بنسألو.
·نتغلب بي سببو خمسة.
·وقت الاقوان تكتر عليه ..بقول لينا انا عاوز اتقدم عشان اعادل ليكم النتيجة.
·صلاح ادريس هسع بعمل في نفس الحكاية.
·دخلت فيه (5) اقوان وهو حارس مرمى في الانتخابات ..وقال للجماعة قدموني (رأس حربة).
·يا صلاح ادريس كورتك دي بتلعبك في الاهلي شندي.
·ممكن.
·في الاهلي عاوز تلعب صانع ألعاب ..عاوز تلعب رأس حربة ما في زول بسألك.
·في الهلال ما عندنا ليك غير (حارس مرمى).
·ولو عملت لخمة كمان بنوقفك وراء الحارس.
·شفتوا الزول الواقف هناك.
·…
·ملحوظة : ما شفناه.
هوامش
·فريق الاهلي الخرطوم صمد امام الهلال.
·وصمد الاهلي الخرطوم امام الاهلي شندي في شندي.
·عاوزين نشوف ناس الاهلي الليلة بعملوا شنو؟.
·عاوزين نشوف فهمهم.
·وبعد كدا بنحكم.
·ما تقعدوا تعملوا لينا نواياكم الحسنة دي.
·ألعبوا كورتكم.
·الجماعة ديل اصلا هم قنعانين.
·اصلا عندهم مشكلة.
·وماشيين يلعبوا في سيكافا.
·يعني بي بساطة كدا ما تشيلوا همهم.
·ممكن تغلبوا المريخ عديل كدا.
·ناس المريخ ديل جابوا ليهم حارس يوغندي ..الكورنر من ضربة المرمي ما بفرزها.
·ما عارف اي حاجة.
·هلال التبلدي جاب ليك فيه قون ..في (الاردن) ما بدخل.
·قون بدون برد وبدون مطرة كمان.
·ركزوا على جمال سالم بتغلبوا تلاتة.
·وتعالوا لينا مدردقين.
·يمين في العيد دا نخلي عيونكم تفارق.
·لكن نحن مفروض نصبر شوية.
·اعملوا فيها رايحيين.
·عندنا مباريات في الكنغو.
·جدول مباريات عديل كدا في الكنغو.
·نمشى اول نستر برة ..ونجيكم.
·…..
·عاجل : يا كوليبالي ورينا شطارتك…قنعانين من مصعب عمر وموسى الزومة. [/JUSTIFY]
وإن طال السفر – محمد عبد الماجد
صحيفة قوون
