نسيان

الماضي لو حاول يعود..
حا يلقي مين في الانتظار؟
ما نحن كفكفنا الدموع..
وضمّدنا جرح الانكسار
ودّعنا ليل العاشقين..
وبدينا نحلم بالنهار
ونسينا كل الذكريات..
ما عاد أمامنا ولا خيار
بعد انهزم حلم السنين..
وأصبحنا في حيرة وودار
ومفروض نعيش واقع الفراق
وتشرق شموسنا مع النهار
ليل المحبين الطويل
مافيهو معنى سوى الودار
خلينا نتحرر خلاص
ونفك عن القلب الحصار
نحفظ حقوق عشرتنا ديك
ما دام صعب درب الوصال
٭ ٭ ٭ ٭
والماضي لو حاول يعود..
حا يلقى وين لينا العُذُر؟
من وين يجيب تاني الحروف..
ويكتب قصايد من شعر
ويدندن التحنان نغم..
ويغني ألحان في وتر
ويقنع عقولنا الهائمات..
بي صدق إخلاص زول غَدَر؟
خلانا في نُص الطريق..
ضيعَّنا وإحْنا على سفر
لا راعى إحساسنا النبيل..
لا قدَّر إننا في خطر
بدَّل غرامنا وباع رخيص..
يا ريتو بس لو كان صبر
٭ ٭ ٭ ٭
والماضي ما ممكن يعود..
خجلان أكيد من عملتو
كذَّاب لأنو حلف كتير..
وشبَّهنا يوم بي دنيتو
وخلانا هسه مع الحنين
بنقاسي من نار وحدتو
والليلة ودّعنا السراب ..
كل زول عِرِف وين سكتو!!

{ تلويح:
الماضي لا يعود.. والسبت أخضر.