الكُج

ناس الكورة.. ناس الكوشتينة.. ديل اكتر ناس قاعدين يكجكجو الناس والأشياء.. الجماد والحيوان.. حتى الضُبان ما قاعد يمرق من كجكجتهم.. وهدومهم البيلبسوها برضها فيها ما هو كُج..

والكُج هو جالب النحس.. والشخص البيخاف من الكُج تلقاهو يعتمد على الحظ في حياتو.. قد يكون الكج بالوجود المادي فقط.. يعني زول يقعد جنبك يكجك لمن تآمن.. والكُج النقنقي.. ودا فرع من فروع الكُج الاجتماعي.. دا دائما يقولوا الزوج المكجوج لزوجته الكجاجة.. المرا دي شفتها بي نقنقتها دي جايبه لي الكُج.. وقد يتعدى الكُج الزوجة إلى النسيبة أو الحماة.. أو كل أفراد أسرة الزوجة.. والكج الزماني “زول يعتبر إنو يوم السبت مثلا يوم كُج” والكُج المكاني “زول يكجج شارع بعينه.. وما يمشي بيهو كلو كلو”..

أيضا هناك الكُج الوظيفي.. مدير يكجج أحد موظفيه.. ولما يكون عندو حاجة أو صفقة وخايف الموظف دا يكجها يرسلو في مهمة طويلة.. أو يقول ليهو إنت حقو تمشي أهلك ترتاح شوية وشيك دا مختوووووف.. زي العندك مراريا..

واحد من أصحابي ناس الكورة المشجعين المرضانين.. لاحظ إنو كل مرة يدخل.. مباراة الفريق البيشجعو الفريق يتغلب.. وقعد يكوس للشي الجايب ليهو ولفريقو الكُج دا شنو.. شك في المحل البتقام فيهو المباراة لقى إنو ما ليهو علاقة لأن المباريات في أكتر من استاد.. شك في الناس البيمشو معاهو الكورة.. برضو لقى إنو كل مرة بيمشي معاهو زول مختلف.. شكّ في حاجاتو البيلبسها.. من الجلابية والعراقي والطاقية والنعلات.. غيّرن.. علا النعلات لأنو عندو مركوب جلد دبيب عاجبو.. وأصلو ما بيملصو من كرعيهو.. وفي إحد ىالمباريات وهو مستعجل لبس سفنجة ونسى المركوب في اليوم داك ربك حميد كريم فريقو غلب.. وجا مبسوط.. واكتشف إنو الكُج من المركوب…. قرر يجدع النعلات.. وقد فعل..

الكُج الغنائي تلقى فنان أي عرس يغني في حفلتو.. يكُج العريس والعروس ويتطالقوا بعد شهرين بس.. وقد يمتد كُجو ليشمل والدي العروس ويتطالقوا برضو.. ودا لو جابوهو في حفلة عرس جماعي الرماد كال حماد “فهو من أسلحة الطلاق الشامل”!

أنا غايتو بعرف اتنين من الفنانين أكجاج وسبق أن طلقوا أربع زيجات..

والكُج الفضائي دا بيكون عند المذيعات والمذيعين في القنوات.. تفتح التلفزيون يقابلك الكُج أو الكُجاية تتقفّل عليك محل ما تقبل..

وبرضو هناك الكُج السياسي.. تلقى سياسي كجيج يدخّل في أي مفاوضات يكُجها ويرجع أهلو والمفاوضات تفشل..

والكج الطبي مستشفى كُج أو دكتور كُج أو سيستر كُجة أو تمرجي كُج.. أي زول عيان يخت إيدو فيهو يكجو ويموت..

الكُج عندو مقياس زيو وزي المحركات اتناشر حصان تمانية واربعين حصان وهكذا.. فالكُج ممكن يكون اطناعشر كُج/ يوم.. ستطاعشر كُج/ يوم.. إلى تمانية واربعين كُج/ يوم.. يعني زول كُج يكون شغال بقوة تمانية واربعين كُج/ يوم.. دا يكُج الناس من يصحا من النوم لحدي ما يرجع يرقد!!!!!