الجفلن خلهِّن.. أقرع الواقفات

قبال يومين.. اتلمومو مجموعة من الشباب.. العاطلين عن العمل.. ومشو مكتب السيد والي الخرطوم.. وذلك على حسب وسائل الإعلام بناءً على دعوته للشباب الباحثين عن عمل.. لكل عاطل انو يجي ويشغلو.. تاني سمعنا قالو لا.. نضم الدكتور الخضر اتفهم غلط.. هو ما قال كدي.. غايتو أنا فهمي للنضم، هل الخدر قال “تعالوا بكوس ليكم شغل”؟.. واللا قال “تعالوا بشغلكم”.. إن قال تعالوا بكوس ليكم شغل يبقى ما متلوم.. زول داير يكوس للناس شغل والكواسة يمكن تصيب ويمكن تخيب.. أما إن قال تعالوا بشغلكم يبقى اتلوم لوم شديد.. ان ما شغلهم.. لأنو في فرق بين “بكوس ليكم شغل” وبين “بشغلكم”.. زي زول تقول ليهو داير قروش يقول ليك “اديني فرصة بكوس ليك”.. يكون أدا نفسو مساحة زوغة وخلاك فهمت إنو ما عندو قروش لكن بيساعدك بالكواسة لهن.. أما لو قال ليك تعال بديك ليها معناه القروش قااااعدة وبتسمع في نضمكم دا.. يبقى ما عندو طريقة يزوغ.. وإن ما أداك ليها يبقى متلوم.. ومن حقك تشيل حالو.. البلد تمر بأزمة اقتصادية مدخلاها في قدوم إبريق.. والوعود البراقة والتخدير المؤقت ما بتحل المشكلة.. بل تزيد الطين بله.. لأنها بتفقّد الناس المصداقية في المسعول البيرمي النضم دا.. يقول النضم ويتورط.. ويقعد يكوس في التخارجو.. أما ناس البنك الإسلامي السوداني.. ربنا يفتحها عليهم.. ويرزقهم من واسع أبوابو.. قريت ليهم خبر في صحيفة (اليوم التالي) بتاريخ 9/6/2014.. ونقلتو بي ضبانتو.. الخبر بيقول أعلن فتح الرحمن أحمد مدير التسويق بالبنك الإسلامي السوداني عن برنامج يطلقه اليوم (الاتنين) “تمليك (المتفلتين) و(العصابات) وبائعات الشاي وسائل إنتاج”.. في قراية للخبر.. فهمت انو البنك بيعتبر التفلت مهنة.. والانتماء لعصابة مهنة.. وبيع الشاي مهنة.. وكلهن بيحتاجن لوسائل إنتاج.. والبنك داير يملكهم وسائل الانتاج دي إن شاء الله في ميزان حسناتو.. بائعات الشاي ح يملكهم (كوانين.. كبابي.. كفتيرات.. بنابر.. الخ).. أها وقفت عند المتفلتين وناس العصابات ديل.. دايرين يملكوهم شنو وسائل إنتاج وتساعدهم في الإنتاج؟.. مخي مشى لأنو دايرين يملوكهم (عكاكيز.. وسواطير.. وسكاكين.. مسدسات.. رشاشات.. وممكن قنابل).. أها شيلو شيلتكم.. المتفلتين والعصابات يسمعو.. ويجو يتلمو قدام البنك ويقولو دايرين وسائل إنتاجهم.. أوعى تنطو.. سمح؟..

السادة البنك الإسلامي السوداني.. عليكم الله النضم البي يخلع ويهجم خلوهو فترنا منو والله.. الفلت دا فلت وانتهى بعد كدي تبقى مسئوليتو علي جهات تانية اجتماعية وأمنية وممكن تساعدو الجهات دي إن بقى عندكم باقي قروش محرقات روحكم.. في وليدات لي حسي ما اتفلتو.. لكن إن اضايقو في لقمة العيش ح يتفلتو ساعدوهم هم.. والمثل بيقول (الجفلن خلهن اقرع الواقفات).. فيهم خريجون يحملون الشهادة والمؤهلات.. الممكن تخليكم تساعدوهم وتملكوهم وسائل إنتاج كل في مجال تخصصه.. أما تقعدو تكوسو للمتفلتين وناس العصابات.. ما بيجوكم.. الناس ديل لو سالتوهم ح يقولو ليكم مو العشرين مليون دي؟ فلتة واحدة في يوم واحد بنجيبها!!