خُلعــــة الســـــواد

فارس أحلام البنات :-
كل إنسان يبحث عن نصفه الآخر للزواج.. وهو حق مشروع ما في زول يقدر يفتح خشمو ويقول فيهو كلمة..
كيف تعثرين عزيزتي علي نصفك الآخر لو كنتي تبحثين عنه؟ وكيف تعرفين فعلا أنه فارس أحلامك؟
دققي في التوافق الجسدي.. والحسي بينكما.
مثلا:-
لوكنتي جالسة في المواصلات.. وجنبك يجلس شاب.
لو يستعمل عطرا فواح.. وجذبك إليه.
لو جلس وهو مربع ايديهو.. وانت مادا ايدك في حجرك.
لو حرك يديه بجانبه.. بينما انتي تحركين يديك تعدلين من طرحتك.
لو كانت غنية في الحافلة أعجبته وأخذ يدندن معها.
لو بدون أن تشعري اخذتي انتي تدندني نفس الغنية في سرك.
لو التفتي إليه فجأة تلاقت عيناكم.. لمدة عشرين ثانية.
لو احسستي أن وجهه مألوفا لديك..
لو قرأتي في عينيه وميض إعجاب…
لو نظرتي إليه مرة أخرى والتقت عيناكم وابتسم اليكي بسمة ودودة لطيفة.. ثم فجاة نزل من المواصلات فأعلمي عزيزتي الحالمة أنه قد سرق موبايلك!!
…………………………………………………
الوصا بالمهلة:-
عزيزتي الزوجة:-
راجلك أمانة في رقبتك.. ومسعولة منو
كوني امو.. دلعيهو
كوني جمرة.. ولعيهو
كوني جنبو.. والصقي فيهو
كوني باروكة.. غطي جلحاتو
كوني استيكة.. امسحي غلطاتو
كوني نجااااضة.. وخوفي اخواتو
كوني براية.. وابريهو وابريهو
كوني قلم.. واكتبيهو
كوني لايوقة.. ما تخليهو
كوني احلامو.. وكوابيسو
كوني جاسوسة.. كوني بوليسو
كوني بعيدة.. وكوني قريبة منو
كوني فكي..وطيري ليهو جنو
كوني حياتو.. ما يشوفك إلا انتي
كوني حيطة.. لما يشوت بلنتي
كوني نسمة بااااااردة.. وريحيهو
كوني ناموسة.. وقرصيهو
كوني بسلم.. بسلم جراح حياتو
كوني مرهم.. مرهم شقوق كريعاتو
كوني فُلة.. وعطري بيتو
كوني نِقة.. وطلعي زيتو
كوني عشيقتو.. عشان يكون حبيبك
كوني جيبو.. وقديهو قصاد جيبك
كوني غبار.. بالوداد دمسيهو وادفنيهو
كوني مطرة.. بالحنان كسريهو وغرقيهو
كوني مدهشة.. كل ما تلقي فرصة اخلعيهو
كوني تفتيحة.. دقسيهو
واخيرا عزيزتي الزوجة:-
كوني محلية.. وفلسيهو
……………..
خلعة السواد:-
تهرشهُ.. هرشا عنيفا
هو كان مستسلما للهرشة.. حُباً فيها
كانت تتحن.. وهو نايم في السرير المواجه ليها.. نهزتو من النوم.. “عماد!! قوم كفاك نوم.. سوي لي الصبغة دي للحنة.. اشرب كباية الشاي دي عشان تصحا”.
قام مخلوع
جغم الصبغة
وحننا بالشاي.!!!
(قالت الجارات وهن يتهامسن في الفراش:- “مخييييييير الله!!!…حنة الشاي شالت”)