لو جمال الوالي هاجر يا ناس المريخ حضروا (ضمنتكم)

وياشماتة ابلة ظاظافيا.

وهجرة (الوالي) من غير شك اقوى من كل الاخبار السياسية امس ..لذلك تصدر خبر هجرة الوالي اخبار الصحيفة.

وقد شاع الخبر وعم القرى والحضر والمواقع والمنتديات ..وكان في طليعة نقاشات الناس.

وياشماتة ابلة ظاظافيا.

الخبر جاء في صحيفة سياسية ، والصحف السياسية اصدق (انباء) من الصحف الرياضية.

راوي الخبر هو خالد عزالدين الذي كتب في خبره : (تفيد متابعات “الصيحة” أن رئيس المريخ جمال الوالي قد قرر الاستقرار في لندن وذلك بعد قبول ابنائه في مدارس خاصة بالعاصمة البريطانية ، والتي من المحتمل ان يغادر لها خلال الاسبوعين القادمين برفقة اسرته. الجدير بالذكر أن الوالي أسرّ إلي بعض المقربين اليه انه سينهي رئاسته للمريخ بنهاية مباراة القمة القادمة امام الهلال والمقرر لها العاشر من الشهر الجاري ، مفسحا المجال لغيره لتولي القيادة الادارية في الفرقة الحمراء. واجرت “الصيحة” عدة اتصالات أمس بالوالي لتأكيد الخبر او نفيه إلّا انه لم يرد على كل المكالمات).

وياشماتة ابلة ظاظافيا.

هذا ما جاء في صحيفة (الصيحة) أمس.

طبعا ما قاصد جاء فيها (ياشماتةابلةظاظافيا).

أها بعد الخبر داعرفتوا (بله جابر) كان (بيجعر) في عطبره ليه؟.

فاتوا (القطر).

ابدا.

ما لقى تذاكر.

ابدا.

طيب في شنو؟.

ما عرفتوا السبب.

دا نحن افتكرناه ببكي عشان التعادل.

افتكرناه كدا.

وقلنا اكيد بله جابر قعد (يجعر) لينا عشان هدف الطاهر حماد جاء في الدقيقة (98).

والله الهدف جاء في وقت ..يبكي (الحجر).

وطريقة تسجيل الهدف ذاتو (تكسر القلب).

تبكي الكافر.

وياشماتةابلةظاظافيا.

لكن بلة جابر اتاريه عندو فهم تاني.

اتاريه ببكي ليه فوق رأي.

دا طلع ببكي عشان حاجة تانية خالص.

ببكي عشان جمال الوالي مهاجر الي لندن.

(بطل امور الجرسة اركز يا ولد).

انت قايلو يا بله جابر ..ما برجع ليكم تاني.

بعدين لندن مع طيارات جمال الوالي دي زي (السامراب).

تلت ساعة بصل.

وجمال الوالي في لندن ما بقصر معاكم.

بدعمكم من هناك.

بدعمكم بالانجليزي.

بيدعكم باللحمة.

خلاص يا بله روق.

اصلو ما عندكم مشكلة يا بله جابر …(ما تبكي ما بخليكم على ناس عصام الحاج ديل).

لو جمال الوالي فكاكم لي ناس عصام الحاج ديل …ح ترجعوا (للقرقوش).

تبلوا القرقوش ..وتاكلوه.

ح ترجعوا للسليقة والسخينة ..والكسرة بالموية.

وياشماتةابلةظاظافيا.

عصام الحاج ..ح يرجع يقول ليكم قفلوا (المراوح)..وما تشغلوا (المكيفات)..انتوا قالوا ليكم (الكهربة) دي نحن جايبنها بالقفة.

عصام الحاج ح يقول ليكم ما في احسن من (الهوا) الطبيعي.

مكيفات شنو؟.

يجيبوا ليكم (كهربة) من وين؟.

ح تبقوا يا بله جابر بعد العمر دا ناس (شبابيك) ساكت.

وياشماتةابلةظاظافيا.

عصام الحاج ح يقرّضها معاكم.

العدس (رغيفة) واحدة.

الفول تتموه بالملاعق.

الشاي ما في زول يدبل.

لاقين لي الفوضي دي وتشربوا في الشاي.

الواحد الصباح (15) كباية ما بتمسكو.

خلاص (الفوضي) دي تاني ما في ليكم.

عشان كدا بله جابر قعد يبكي لينا في عطبرة.

جعري شديد.

وياشماتةابلةظاظافيا.

يعني زي ما مدثر كاريكا كان بيبكي عشان نصرالدين النابي استقال ..وسوف يغادر السودان.

كمان بله جابر ايضا ببكي عشان جمال الوالي مغادر الى لندن.

البلف قفل.

البلف قفل يا فردة.

بلف شنو؟.

البوفيه قفل.

شطّب.

ولا عدس.

ولا رغيفة.

وياشماتةابلةظاظافيا.

موش مرات بترجع البيت متأخر ..(ما تلقى اي حاجة تأكلها).

التلاجة ما فيها اي حاجة.

تشيل (الجك) وتنزل على الدكان.

بتاع الدكان يقول ليك : ما في غير موية الفول.

اها هسع يا بله جابر ..لو جمال الوالي هاجر ..موية الفول ذاتها ما ح تكون عندكم.

ولا موية فول.

قلت ليكم.

ولا رغيفة.

كدا اتخيلوا جمال الوالي (هاجر) لندن.

رغيف شنو؟.

تاني (ضربات جزاء) ما بحسبوها ليكم.

تاني ما تعشموا في (كورنر).

خلاص تساهلات (الحكام) معاكم ح تنتهي.

تقشف شديد.

بايرن ميونخ دا تاني إلا تشوفوه يوم الجمعة في الرياضة العالمية.

كرت ما ح يكون عندكم.

بتشوفوه فقط في (النشرة).

حكاية انكم لعبتوا مع (بارين موينخ) دا انسوها خالص.

جبتوا (الفقر) لي بايرن ميونخ.

فريق كان ماشي زي الطلقة.

السنة الماضية بايرن ميونخ ما خلى ليه لقب …لقط كل بطولات الموسم.

بايرن ميونخ الموسم الماضي فاز ليه بـ (5) بطولات.

بايرن ميونخ السنة دي وبعد ان واجه المريخ (اعداديا)…البافوري اتذل ذلة الكلاب.

انضرب ليك في بلدو من الريال 4 / صفر.

في زول بتخيل الفريق الالماني الاقوى في العالم والمتصدر لاندية العالم وبطل العالم (ذاتو) يتغلب في بلدو اربعة.

الماكينات الالمانية الاقوى دفاعا في العالم ..اتهزموا اربعة في ارضهم ووسط جمهورهم.

يا جدعان.

عارفين السبب شنو؟.

السبب المريخ ..جاب ليهم (الهوا).

جاب ليهم (الفقر).

والله الواحد لو ما ساي ..يسافر لي المانيا مخصوص ..عشان يقول لي ناس بايرن ميونخ …(الهوا) جابو ليكم المريخ.

المريخ مجرب في الحاجات دي.

هسع الله يستر على (ليفربول).

قالوا جمال الوالي مهاجر الي لندن.

يعني (ليفربول) صدارتو ح تروح ساكت.

إلّا اذا جمال الوالي هاجر الي لندن بعد انتهاء الدوري الانجليزي.

وجماعتنا ديل حالتهم هنا ح تكون صعبة.

تسجيلاتهم ح يتموها بـ (الاتوس).

اعملوا ليكم (صندوق).

سجلوا بـ (تحويل الرصيد).

اشتروا ليكم (ركشات)..وشغلوها ..بتطلع ليكم (مصاريف) اليوم.

او اجروا الجزء الشرقي من الاستاد.

اعملوا ليكم (فرن) في النادي.

خلاص جمال الوالي (مهاجر)..قاعد ليكم (11) سنة ما عملتوا شيء.

سيكافا النظمها ليكم ..ما شلتوها.

صرف ليكم في سيكافا مليون دولار.

بعد دا شالوا منكم كاس سيكافا.

اتراكو الراوندي شال الكأس ..وناس المريخ شالوا مدافع اتراكو غاسيروكا.

المدافع (المفلوق) داك تذكروه.

تاني مدافع مفلوق ذاتو ما بتلقوه.

خلاص جمال الوالي (باي باي).

اقول ليكم.

شوفوا ليكم (ضمنة)…الكورة اقنعوا منها ..اذا انتوا مع جمال الوالي (11) سنة ما عملتوا ليكم شيء.

بدون جمال الوالي ح تعملوا شنو؟.

بي جمال سافرتوا تلات مرات للولايات من اي ولاية رجعتوا بي (نقطة).

بدون جمال الوالي (نقطة) ما بتلقوها.

وياشماتةابلةظاظافيا.

جمال الوالي ذاتو عرفها …عرف ليك هلال المجموعات دي ما بتقدر.

عاوز يخت ليك ناس محمد جعفر قريش في وش المدفع.

اها يا قريش.

يا عصام الحاج.

يا نادر مالك.

جمال الوالي ح يسافر ..يلا ورونا شطارتكم.

تتكلموا في الجرايد ..وتهاجموا في الوالي في الفضائيات.

الوالي خلى ليكم البلد.

يمشي لندن ..يبقى (مشجع) لفريق الارسنال ..افضل ليه من يكون (رئيس) لنادي المريخ.

هناك المشجع عندو قيمة.

مالو ومال (التلتلة) دي.

نحن بنجيب ليكم (الضمنة).

ملحوظة : وياشماتةابلةظاظافيا.
هوامش

كم (ضربة جزاء) سوف تمنح للمريخ في الفاشر؟.

الهجمة (التزويرية) على الحكام من قبل اعلام المريخ ..سوف تأتي اكلها في مباراة الفاشر وفي مباراة القمة.

الحكام بسبب اعلام المريخ بقوا اشهر من ناس ضفر وبله جابر وسعيد السعودي واكرم الهادي سليم.

ما في زول بكتب ليه كلمة عن لاعب.

تتخيلوا في جماعة الى الان بكتبوا عن عمار كريمة.

وبيكتبوا عن ضربة جزاء وهمية سنة 1996م.

انتوا كابتن المريخ منو؟.

(ناجي علي دوكة)..وإلا اكرم؟.

اكرم الهادي سليم يقعد يتفرج ..ويعاين في الكورة وهي في السماء ..والطاهر حماد يقلبها من الطابق العاشر.

وناس المريخ بتكلموا عن وديدي الفاتح.

غايتو (جرستكم) دي ما في زول سبقكم عليها.

بله جابر ما (جعر)..جعريكم دا.

شهر قبل مباراة القمة ..سوف يكون الحديث عن الحكام.

مذاكرة شديدة.

تسميع بس.

والحكاية مشكوفة.

ومضحكة كمان.

ديل عاوزين من الحكام اكتر من كدا شنو؟.

في المباراة الواحدة الحكم بمنحهم ضربتين جزاء.

عشمانين في ضربات الجزاء في مباراة القمة.

وعارفين مباراة (النقعة) ما فيها طريقة ..إلّا عبر (الحكام).

تراوري دا ..ما فيه عشم.

اكرم الهادي سليم قاعد يتفرج.

في حارس بتفرج في الدقيقة 98.

لو جبتوا ليكم (خفير) مدرسة كان طلع الكورة دي.

كورتكم دي إلا تساعدوها بالحكام.

الطريف في الامر ان اعلام المريخ الذي يتحدث عن (الحكام)..يطالب بتغيير جلد المريخ وبشطب معظم لاعبي المريخ ..عشان ما فيهم رجاء.

طيب انتوا وقت مقتنعين بي ان جماعتكم ديل ابطال ..وان سبب خسائر المريخ (الحكام)..ليه بتطلبوا بشطب لاعبي المريخ.

حسب كلامكم دا ناس اكرم ديل ما عندهم اي ذنب.

المشكلة في وديدي الفاتح.

وديدي الفاتح ما فاضل ليه إلا يجيب ليه (ملاعق) لي نارس تراوري واوليفيه عشان يسجلوا اهداف.

وديدي الفاتح قال لي اكرم الهادي سليم ضيّع ليك (10) دقائق.

اكرم الهادي سليم مشى الامارات ما اتعالج ..جاء عاوز يتعالج في استاد عطبرة.

وفي الشوط التاني كمان.

انت ناس الامارات ما عالجوك ..عاوزهم يعالجوك ناس عطبرة.

….

عاجل : تلعبوا مع بايرن ميونخ ..تطلعوا من دور الـ (64)..وتبقوا في الدوري الممتاز في مركز (الوصافة) حارة عليكم والله…ركزوا في (الحكام).