أحوال

بتأمل حال الدنيا… والميل الكسر الخاطر

المسخ طعم الفرحة… والباع الريد النادر

البدل بينا السكة… والخلى الرابح خاسر

الطيبة بتبقى سذاجة…. والظالم يصبح شاطر

أغراب بيشيلوا همومك… وحبيبك قاسي وناكر

****

أحزان ماليانا مآسي… وشجون.. والحيلة قليلة

شايلين الهم من بكرة… خايفين.. والشيلة تقيلة

ماشين في درب الحيرة… تايهين والسكة طويلة

خلونا قراب من الله…. والخطوة بتبقى عديلة

والرضا بالقسمة حقيقة… بيخلي الدنيا جميلة

****

الرحمة كمان مطلوبة… خلونا خلاص نتراحم

ليه يعني نسك الدنيا… وعليها دوام نتزاحم؟

كل واحد عندو نصيبو… مكتوب من قبل العالم

مفروض لا نجوط لا نكره…. بالحكمة كمان نتفاهم

نتعافى وتصفو نفوسنا…. بالحب والشوق نتسالم

*****

وبتأمل حال وجداني…. والشوق الهدا كياني

والريد الساكن روحي… واللهفة الفيها حناني

والشجن البكتب ويرسم… ويطلع صوت أحزاني

والحظ العاكس وعاند…. وخلاو متأخر جاني

والخوف يا غالي تغادر…. وتغيب عن دربنا تاني

***

قررتا أسامحك وأنسى….. قصتنا دي ما بتستاهل

لازم نعفو ونتسامح…. وشوية كمان نتنازل

العمر قصير لو يطول…. ليه نحقد وليه نتجاهل؟

بيناتنا العشرة بتبقى…. وضروري كمان نتعامل

خليك من غدرك أكبر… وتعال بالود نتواصل

تلويح:

ما بين أحوالنا…. وآمالنا…. تنسج أقدارنا