ديمقراطية القرود

كل عام وأنتم بعام.. قالها لينا طالب ونحن في المرحلة المتوسطة.. والعيد جايي قدامنا.. الأستاذ مسكو جلدو عشرة جلدات، وقال لينا يقول ليكم بعام وانتو تضحكو؟.. وكان هذا الطالب اسمو (عامر القربة) معروف عنو بياكل من عشرة لحدي مية سوط.. وما بيقول اح.. حمّال اسية.. وفدائي واخو اخوان.. أي حاجة تحصل وفيها دق وعقاب جماعي للفصل كلو.. يقيف هو ويقول انا السويت كدي.. فيجلد.. سألت الأستاذ عن معنى كلمة بعام.. نهرني وقال لي (بي تغالطني كمان؟).. وجلدني خمسة جلدات.. عرفت أن معلمنا العلامة الفاهم الفهامة ما عارف البعام شنو؟.. البعام هو الشمبانزي.. لا يعتبر الشمبانزي قرد.. بل هو فصيلة براها كدي.. زيها وزي الغوريلا وميمون.. وانسان الغابة. انسان الغابة دا بيشبهن كدي علا حجمو شوية اقل منهن.. .. ديل كلهن فرقن من القرود انهن ما عندهن ضنب.. .قاعدات ساااااكت كدي والساتر الله.. أما القرود فكل ما يشبه الزول وعندو ضنب فهو قرد ،القرد في نظري من اجمل خلق الله انسانا.. فهو خفيف الروح.. مستهبل.. أونطجي.. تفتيحة.. القرد من الحيوانات الما بتحب النضم الكتير.. وعندها لغة مختصرة للتفاهم.. غير استعمال لغة الجسد فهي تستعمل لغة منطوقة بسيطة زي(اوووف).. (آآآآآآخ)..(أح).. (أهـ) وربما(أجي).. وكفاية عليهم.. في دراسة للقرود في الكنغو.. لقو أن النظام الاجتماعي السياسي للقرود دي متطور.. فهي تمارس الديمقراطية (لينا بي حالا) عندها مجلس قيادي.. المجلس دا عند اختيار القرارات الخطيرة البتهم القطيع بي يجتمع مع رئيس القطيع.. واختيارالقرار ما صعب كلمتين(نعم) أو (لا).. يصوتو عليهو.. ممكن يجي قرد ما يكون عضو في المجلس ويكون عندو راي في الموضوع يجي ويقول رايو ويمشي من المجلس.. ووراهو المجلس يدرس رايو لو بقى سمح ياخدو بيهو (دي دراسة علمية يا جماعة ما ونسة مني).. ورأي الأغلبية مُلزم لكل افراد القطيع كبير وصغير ضكر وانتاية.. والانتاية في السياسة وقيادة القطيع ما عندها أي دور.. تقعد تلد وتربي الشفع وتنطط مع باقي القرود لكن تنطط بي فهم.. الانتاية البتكون والدة جديد تحظى برعاية من مجموعة من القطيع لحدي ما تربعِّن وتقوم تنطط معاهم ولاحظ العلماء إنو القردة الانتاية الحامل مافي قردة بتشاكلها خوفا عليها تعاين ليها وتقول لها “انتي اصبري بس.. انتي تلدي.. وبعدين أوريك اياهو”.. القرود قاعدة تدخل حروب مع بعضها يعني مجموعة ضد مجموعة.. والصراع دائما بيكون علي قطعة واطا سمحة وغنية بالأكل والشراب والشدر الطوال عشان يدسو فيها من باقي الحيوانات أكلة اللحوم.. وحروب القرود شرسة بها اسراف في تقتيل الضكور.. المجموعة المنتصرة تقوم بإعدام الضكور المهزومة بعد الاستحواز على الاناتي (سبايا) وتوزيعها على ضكور المنتصرين.. طبعا بي يخلو رئيس القطيع هو اليعزل.. .عليكم الله ديل حسي ما قرررررربو يبقو ناس؟..