كان تشكي تلقى الببكي ..

حاور الصحفي الشاب أحمد عبد الحميد مراسل صحيفة المحمل من جنوب دارفور نازحة التقاها في معسكر كلمه.. قالت كلاماً سجله أحمد بنصه.. بذات الطريقة الدارفورية في الكلام.. إفادات المرأة تستحق أن نعيد نشرها عسى أن يطلع عليها من يهمه الأمر..

_ اسمها:

اسمي حواء محمد أنا من «جقمة» بعد الفرسان

_ تقول عن عمرها:

أنا سمعته من أمي قال ولدوني قبل حرب العالم نمرة اتنين .

_ وتقول عن وصولها للمعسكر:

يا جناي حرب بدت صبح وناس هجموا حلتنا أصوات السلاح بفكك الاضنين وسلاح ما بفرز ناس كتير ماتو وإنحنا جرينا مرقنا من الحلة زي الساعة 2 ظهر ومشينا جهة مدينة عد الفرسان ..

وليدي نركبو شنو!؟ ماشين بكرعينا

إنحنا مرات نمشو في الخلا ومرات نمشو في الطريق ولاقينا ناس نهبونا في الطريق

_ وسألها عن عدد الموتى منهم وعندك زول منهم:

أيوا رجال ونسوان وبنات وأولاد وعيال صغار كلو كان ما نقدر نحسبو ليك، وأنا وليدي واحد ماتت وبنيتي تاني ما نعرفي جهتو وين.. سلاح ولا بفرز ياوليدي.. شغل البسوهو الأخيان ودواسهم دا والله .

_ وقالت: يا وليدي من خلقنا ما ضقنا مهانة زي دا وحياة المعسكر النشيفي دا ولا حياة بني آدم لكن كمان ظروف الحرب جبرت الناس.. إلا نصبرو ونصلو عشان ربنا يبدل الحال بالأفضل و عيالنا البتشاكلو الله يهاديهم

_ وتحكي النازحة المسنة فتقول:

أول ما كنا عايشين في أمن وأمان ناكلو من زراعتنا ونشربو لبن من بهايمنا وما محتاجين حاجة، إلا كان الواحد عيان بمشي المدينة بيتعالج.. وهو ذاتو المرض زمان ماكان كتير زي هسي، لكن عيال البلد هم براهم القاموا قالوا دايرين يكاتلو الحكومة وخربوا البلد ولامن الحكومة ما اتكاتلت ليهم قبلو في بعضهم بيتكاتلو والبلد خربت أكتر وكل الناس عاشت ظروف..

وسألها.. حبوبة كلامك ده كلام سياسيين عديل؟

وليدي الدنيا بعلميك كن ولا قريتي كلو وأنا عمري العشتو في الدنيا دي علماني الكتير وعمرو الحرب ما حلا مشكلة إلا الخراب وكلامي ده ولا كلام سياسيين، عشان كلام سياسيين كلو كضب في كضب..

والله من قاعدين في حلتنا دي كم مرة جونا سياسيين ديل.. والا نسوو ليكم كدي .. ونسوو ليكم كدي .. شغل واحد ما سووهو.. ولا دي الكضب زاتو؟!

_ حبوبة انتي بتتمني شنو؟

أول كنته نمني نمشي الحج إلا هسي دي نمني حرب الفي دارفور دي يقيف وبلد يرجع زي أول..

اني دي كلامي من قلبي نقولو لناس الشايلين سلاح في الخلا كان ناس معارضة ولا ناس حكومة ولا ناس القبايل البداوسو بعضهم.. والله إنحنا تعبنا وحرب ده عمرو ما حلا مشكلة.. ودارفور دا كفيل بانو يشيل كل السودانيين ويأكلهم كمان، بس كده همن يختو الإيمان والرحمن في قلوبهم ويختو دارفور في روسينهم.. و يا وليدي نقول ليك كلام.. دارفور دي كضاب البقول قبيلتو صافي براهو ما دخلت في قبيلة تانية أو قبيلة تانية ما دخلت فيهم.. كل ناس دارفور ديل عندهم نسب بيناتهم .. عشان كده خليهم يقولوا أعوذ بالله من الشيطان الرجيم ويقعدوا في واطة ويحلو مشاكل البيناتهم

شكراً ليك انته كلو وكن جيتي تاني أسأل مني وما يكون كلامك كلام سياسة.
[/JUSTIFY]

الصباح..رباح – آخر لحظة
[EMAIL]akhirlahzasd@yahoo.com[/EMAIL]