الوجــــع

زول يقول ليك.. راسي موجعني.. تقول ليهو أبلع لك حبة بندول.. ولو كنت من أصحاب الكيف.. تقول ليهو انت شربت شاي الفطور؟.. أو يمكن الجبنة.. تكون ما شربت الجبنة.. أما لو كنت نكدي.. وزول متشائم.. تقول ليهو امشي قيس الدغت.. ولو زول نكدي لدرجة الوفاة.. ح حتحكي ليهو قصة فلان القتلو وجع الراس الأسبوع الفات.. الموضوع هنا موضوع الوجع.. يعني شنو وجع؟.. ولو قالو ليك أوصف لنا الوجع في عشرة سطور.. ما ح تقدر تكتب سطر واحد.. الوجع من الحاجات البي يحس بيهو سيدو.. يعني لو زول جاك وماسك جضمو وقال ليك عندي وجع ضرس.. ما ح تقدر تتخيل الوجع قدر شنو؟.. ولو أي زول بيتخيل الوجع بتاع الزول التاني الدنيا دي كلها ما ح تلقى زول ماشي بدون ما توجعو حاجة.. يعني لو مشيت مستشفى زيارة لي زول راقد وعندو وجع بطن.. ح تطلع عندك وجع راس.. ووجع بطن.. ووجع كرعين.. ووجع عيون.. ووجع ضرس.. و وجع ضهر.. ووجع أي حاجة تانية يكون قابلك زول موجعاهو.. وانت حسيت بها.. رحمة ربنا الوجع غير معدي.. وما بينتقل من زول لي زول.. وما بيترجم ترجمة عضوية عند غير صاحبو.. الحاجة الوحيدة البتأثر فيك لو كنت زول حنين.. تعابير الالم وحركات الالم البتصدر من الموجوع.. انت هنا ح تعرف انو الزول دا ممكون.. اشارة الالم بتطلع من مكان الالم وبتمشي المخ وترجع تاني بسرعة.. وهنا المخ بيترجمها انها وجع.. لو عندك قطيعة او فليتة في ضهرك موجعاك بتقدر تحددها وتخلي من يواسيك يتحسس مكانها تقول ليهو كدي جيب ايدك.. وتشيلها تختها ليهو مكان الوجع عشان يربت عليه.. لو بعيد منو تقعد توصف ليهو.. (اها انزل تحت شوييييية.. يمينك يمينك.. اهاااااااتك.. بس هنا.. الله يباركك).. دا الوجع العضوي.. أما الوجع النفسي دا.. حاجة تانية.. وتجوط ليك اي حاجة.. انت موجوع وما عارف الموجعك شنو بالضبط؟.. زول لاقاك وبدون أي سبب شتمك.. الشتيمة تمشي الجهاز العصبي المركزي وتترجم ويتم التعرف عليها.. مقارنة مع مخزونك من مفردات الشتائم العندك.. وتأثر فيك.. وين؟ ما معروف.. في ياتو حتة من جسمك.. ما معروف.. الواضح انك موجوع .. وممكن ما تنوم.. زيك وزي اي زول عندو روماتيزم وموجعاتنو ركبو.. الاتنين ما بتنومو.. داك عارف السببب وعارف الموجعو شنو؟.. انت ما قادر تحدد الموجعك.. الوجع النفسي يتساوو فيهو كل الناس كبار وصغار.. الشافع لو نهرتو تلقاهو اتوجع وقعد يبكي.. لكن لو سالتو الموجعك شنو؟.. ما ح يقدر يوريك.. كل البيقدر عليهو يأشر عليك ويقعد يجعّر.. الخوف نوع من الوجع.. الحزن نوع من الوجع.. الزعل برضو وجع.. لكن ما بنقدر نحدد مكانو وين بالضبط.. يعني مافي زول خائف يكون وجع الخوف في كراعو.. أو اضانو.. أو نخرتو.. الوجع هو عكس اللذة.. الوجع أنواع ومراحل.. يبدأ من الوجع اللذيذ.. وينتهي بالوجع اليطير النوم من عيونك!!