المريخابي الايامات دي زي الزول القاعد مع نسابتو

<الزول البكون قاعد مع نسابتو ..بشوف (العجب) ...وعلاء الدين يوسف كمان.<وضفر ذاتو.<طبعاً علاء الدين يوسف (قافلة) معاه في المريخ...(السنة كلها زعلان).<الزول دا ما شفناه بضحك إلّا وقت كان في الهلال.<زمان فييرا في الهلال في (الكنبة) ضحكتو بتصل رايات الكورنر.<فييرا كان يضحك من الكشافات للكشافات.<هسع فييرا ما بضحك إلا وقت يجيبو ليه سيرة الهلال.<فييرا خلوه.<الزول القاعد مع ناسبتو ...ان جاب ليه (بطيخة) في البيت ...يندموها عليه.<بطيختك دي مالها (صفراء) كدا ...واشتريتها بي كم؟.<لو قال ليهم ادوني ليها (هدية)..بقولوا ليه : ادوك ليها غالية كدا ليه؟ ...(انت اصلاً ما بتعرف تشتري...ديمة غاشنك في البطيخ).<هسع دي (بطيخة) ليك.<البطيخة لو طلعت (سكر)...يقولوا ليه بطيختك (مسيخة) زي كلامك.<الزول القاعد مع نسابتو ..لو يوم قال (يتفنن) شوية كدا ...وجاء شايل معاه (بيتزا)..يقولوا ليه بيتزتك دي ملحها طالع.<وريحتها ذاتها ما حلوة.<لو جاب ليه كيلو باسطة..يقولوا ليه (باسطتك) زيتها كتير.<وح ترفع السكري للحاجة.<يعني عاوزنو يجففها ليكم في مصفاة الجيلي.<واحد قاعد مع نسابتو ..قال يجيب ليه (تورتة) في عيد ميلاد نسيبتو.<جاء شايل ليه (تورتة) ...وعامل فيها (ظريف).<نسيبو قابلو ليك في الباب شايل ليه (تورتة)...قالوا ليه التورتة دي جايبها ليه؟.<ولي منو؟..وعشان شنو؟.<قال ليهم عشان عيد ميلاد نسيبتي.<نسيبو قال ليه ..نحن حركات (الاتراك) ديل ما بتنفع معانا...كمان عاوز تعلم لينا (المرا) بعد السن دي ...عيد الميلاد.<اوعك تجيب لينا حاجات زي دي في البيت.<بعدين انت كبير كدا عليك الله ما بتخجل ...شايلك (تورتة) قايل نفسك في (فيلم اجنبي).<قالوا ليك في زول قاعد مع نسابتو ...حب يوم يعمل ليهم مفاجأة ، اشترى ليه (خروف) وجاء دافرو قدامو زي كأنو عمل ليه حاجة كبيرة.<خروف ناقص (الشاحن).<خروف النوع ...المرارتو بتكون جاهزة بره.<الخروف كبير ..وما فيه أي كلمة ...نسيبتو ما لقت ليه فيه أي عيب.<ما عرفت تقول ليه شيء.<تخش وتطلع ..وتقيف قدام الخروف.<اخر شيء الخروف قال (باع) بصورة مزعجة شديد وصوت عالي ..قالت ليه خروفك دا كفرو (جلاكسي) لكن نغمتو (صينية).<انت غشوك...الخروف دا جبتو من وين؟.<الزول البكون قاعد مع نسيبتو ..اصلا بتلتل كدا.<قالوا ليك واحد تاني قاعد مع نسابتو ...لمن يفتح (المروحة)..ناس البيت يشرقوا فيه.<يعاينو ليه زي الفتح ليه صفيحة جبنة.<تقول فتح خزان الرصيرص.<لو طلع ودخل ..ونسى الباب فاتح...البيت كلو (ينر) فيه.<لو نام (وشخر)...يشيلو حالو.<لو تلفونو (ضرب)..يقولوا ليه ما ترد ...صحيت الحاج.<لو زولكم عاوز يكوي ليه (قميص) ...يلقى البيت كلو واقف في (العداد).<اها (القلقلة) العايش فيها (النسيب)...عايشين فيها المريخاب الايامات دي.<الهلالاب واقفين ليهم على الواحدة.<الواحد فيهم ان طلع الصباح ساكت ..يتلافو ليك بي (تمهيدي) من الصباح كدا.<الهلالاب بقوا يشرّكوا ليه في بداية الشارع.<المريخابي بقى من (نقة) الهلالاب يرجع بيتو في (انصاص) الليالي يدخل البيت على اطراف اصابعو.<وقت يدخل البيت ..ويطمئن انو ما في زول شافو ..زوجتو تولع النور ..وتقول ليه حركات (كمبالا سيتي) دي ما تعملها لينا في البيت.<المريخاب الهلالاب اكلو لحمهم.<عذبوهم عذاب.<بقوا ليهم في رقبتهم ...تقول (التمهيدي) دا طلعوا منو من (حلايب).<المريخاب للامانة شكيتهم ذاتها كترت.<شكية الجماعة ديل كترت...(من طلعوا من دور الـ (64) زادوا في الشكية).<ما عارف الشكية دي من شنو؟.< يا ربي (كُبر).<ما عارف دي (شقاوة).<اليوم كلو المريخاب بقوا يشكوا.<قالوا ليك (مريخابي) كبير في السن شكيتو زادت بعد الطلوع من التمهيدي بصورة خيالية.<زولكم اليوم كلو ..يطلع ليه (عنقريب) في الضل من صباح الرحمن ..ويقعد يشكي ليك لمن الواطة تصبح.<السخانة ...والهلال صعد دور الـ (16).<طبعاً ما في أي علاقة بين السخانة والهلال.<عمك وقت ما يلقى ليه شيء يشكي منها ...بشكي ليك من تلفزيون السودان ...يقول ليك عليك الله دي برامج يجيبوها لينا.<تلفزيون كلو عمر الجزلي.<عمر الجزلي مالو احسن زول ...ثابت وراسخ زي جبل البركل.<برامج التلفزيون السوداني زي مباديء الحصبة.<ينتهي ليك من التلفزيون ..يقبل ليك على (اتوفيستر).<هسع دا مدرب يجيبوه لينا.<جايبين لينا مدرب من بقايا حملة (هتلر).<دا يكون اشتغل مع (هتلر) في الجيش ..يكون زاملو في (كتيبة) واحدة.<معقولة ...جايبين لينا مدرب ...القون وقت يجيبوه اليوم ..بسمع بيه تاني يوم.<عمك يشيل ليك حال (اتوفيستر) ما بخلي ليه حاجة.<ينتهي من اتوفيستر.<يقبل ليك على عبدالصمد ...الزول بتاع (البلف).<يوم يستقيل ..اليوم التاني يسحب استقالتو.<تقول شغال بي (طبق).<الناس صعدوا واتأهلو لدور الـ (16).<وانتوا لي هسع في (الدور) البقوم بيه عبدالصمد.<يوم يستقيل.<واليوم التاني يسحب الاستقالة.<المريخاب بقى ما عندهم (شغلة) غير عبدالصمد..بطلوا شغلتهم ..وصاقرو ليك عبدالصمد.<عبدالصمد طلع ما ساهل.<لقى ليك (الهملة) دي ..وبقى شغال ليك على كيفو ..يستقيل ويسحب استقالتو.<وناس معاوية الجاك يكتبو ليك في الموضوع دا.<ما عندهم (بطولة).<ليهم حق يعملوا (استقالة) عبدالصمد بطولة.<هسع نحن اتأهلنا ...ونفضنا ليك (الملعب) من ملعبو.<الملعب حسمناه في (ملعبو) في مالي.<وجينا هنا ...ناس بكري المدينة ما قصروا ...لّموا ليك في (الملعب) شلعوه ليك جنس (تشليع).<بكري المدينة (فزع) ليك بالجماعة.<ناس الملعب خلوهم.<ناس المريخ ذاتهم ما فهموا ليك حاجة ..من الاشياء الشافوها دي.<بكري المدينة لاعب ضد الملعب المالي ..من (الجري) العملو بكري المدينة في المباراة ..ناس احمد عبدالله ضفر (نفسهم) اتقطع.<عليكم الله ناس موسى الزومة ديل بقدروا على الحاجات دي.<انتوا عارفين الهلال والمريخ متين؟.<الهلال والمريخ باقي ليها ايام محدودة.<اها المريخ عاوز يقابلنا بي مدربو دا ...(77) سنة.<بي اتوفيستر دا ..لو عاوزين تلعبوا مع الهلال إلّا تجيبوا ليكم (اذن من القصر).<عشان ما نغلبكم كتير.<شوفوا ليكم (واسطة).<قولوا عندكم (ظروف).<ممكن نسامحكم.<بي حالتكم دي ...(10) دقائق ما بتقدروا تثبتوا امام الهلال.<باقى مجلسكم دا ح نفرتكو ليكم.<عبدالصمد من متوكل أحمد علي ما بتقدروا تفرزوهم..مع (الاستقالات) الحايمة دي.<احسموا مواضعيكم من الان.<خلوا عبدالصمد يحدد موقفو ...مستقيل ولّا مستقيل؟.<عشان ناس باسكال دا ما يتجهجهو.<الجماعة ديل على (الهبشة).<لو قابلهم الهلال بي حالتهم دي ..بتلحقو (الموردة).<الموردة هبطت بسبب القروش.<وانتوا الظاهر برضو ح تهبطوا بسبب (القروش).<غير ان سبب هبوط الموردة ..الموردة ما كان عندها (قروش).<والمريخ كترت القروش ح تهبطو.<مفروض فريق يطلع من دور الـ (64)..مفروض طوالي ينزل من (الممتاز).<خاصة لو سبق ليكم انكم لعبتو امام (بايرن ميونخ).<يا خسارة بايرن ميونخ فيكم.<انا ما عارف عندي احساس (حايم) كدا ..اتوفيستر لو قعد شهر في البلد دي ..ح يعمل محل اتصالات في شارع الاربعين.<اتوفيستر كورتو كورة محل اتصالات.<اصلو ما اكتر من كدا.<ملحوظة : اتصالات (عالمية) لكن.هوامش<كروجر في اول مباراة له مع (انبي) خسر امام المقاولون العرب في الدوري المصري.<الزول دا عبدالصمد مشى معاه انبي ولاّ شنو؟.<كروجر مشى الدوري المصري.<وحسام البدري ممكن يرجع للمريخ من مصر.<شفتوا اللخبطة دي.<شغل (الاعادة) دي بحبوه زي عيونهم.<يعني احمد رفعت يمكن يرجع.<ومحمود سعد ذاتو ما بعيد ..يرجع.<التاجر وقت يفلس ..برجع لي دفاترو القديمة.<والمريخ وقت يتراجع برجع للمدربين السابقين الذين تولوا الاشراف عليه قبل سنوات.<اجمل ما في مباراة الهلال لمسة الوفاء التى كانت من لاعبي الهلال تجاه لاعب الرابطة كوستي محسن عبدالله.<في الهلال دائماً مثل هذا الوفاء.<مباراة الهلال الخميس القادم مع الرابطة في كوستي ..تعتبر مباراة صعبة..لو تجاوزها الهلال سوف يكون الهلال حقق 9 نقاط ان شاء الله في ثلاث مباريات لعبها في الولايات.<الهلال سوف يلعب مباراته الثالثة في الولايات ..والمريخ إلى الان لم يغادر الخرطوم.<نشأت الامام في قناة النيلين..قدم استوديو مباراة الهلال والملعب بصورة رائعة وجميلة ..وبإحساس عالي.<نشأت الامام سوف تفقده الفضائيات السودانية ..نسبة لهجرته إلى الولايات المتحدة.<سوف يكون فقد نشأت كبيرًا ...بعد تألقه الكبير في البرامج الرياضية وفي الاستديوهات المباشرة.<سعدالدين حسن ..ايضاً سوف تفتقده قناة النيل الازرق بسبب استقراره في الامارات مع قناة العربية.<سعدالدين حسن ..ضاق عليه سقف الحريات في السودان ..فغادر يبحث كلمة شريفة ..على نسق لقمة شريفة.<....<عاجل : هوبة مهند الطاهر في كوستي اصبحت واجبة.[/SIZE]وإن طال السفر - محمد عبد الماجد صحيفة قوون