المشكلة في (الملعب) السوداني وليس في (الملعب) المالي

< زمان ...كنا فاهمنها غلط.< غلط ..غلط ..مالكم انتوا كمان نحن طلعنا من دور الـ (64).< أنا أول مرة في التاريخ أشوف لي فريق بعسكر (شهر) في قطر ..وبلعب أمام بايرن ميونخ الالماني ودي (في داعي للبزار دا)..وبدفع (12) مليار (الجنيه بنطح الجنيه) ..وبسجل ليه (7) أجانب ..وبجيب ليه مدرب (أجنبي) وبقسموا ليه (الميزانية) وبطلع من دور الـ (64).< انتوا وقت بتطلعوا من الدور دا ...(المعسكر) لزومو شنو؟.< كان تعسكروا في (جبل طورية)..وقت طالعين بدري كدا.< وكان تلعبوا مع (رديفكم) بدل بايرن ميونخ ..طول ما انتوا ح تطلعوا من دور الـ (64).< بايرن ميونخ لي شنو؟.< ولا كان في داعي لي (7) أجانب ..تقول عاوزين تمشوا اهرمات (البجراوية).(7) أجانب في جامعة الخرطوم ما في ..تجيبوهم انتوا لي كلامكم دا.< بما أنكم طالعين من دور الـ(64) كان تعتمدوا على ناس بلة جابر ديل (بقوموا بالواجب واكتر).< مالهم ناس بلة جابر ..على الأقل كان طلعتوا من التمهيدي بي ناس بلة جابر ديل ما كان في زول لامكم.< لكن انتوا لا خليتوا تراوري ...ولا باسيرو.< تراوري في الهلال متعود على (المجموعات).< وباسيرو ذاتو مع الأهلي شندي كان بتقدم في الكونفدرالية.< هسع طلعتوهم لينا مع (الجلد).< موش مرات في (ضباح) بكون ما عندو خبرة ..يقوم يطلع ليك اللحمة كلها مع الجلد.< وبعد ما يعمل حركتو دي يقول ليك عاوز أشيل الجلد.< مرة جبت لي جزار ..(ما عندو أي علاقة بالضبح).< لقيتو في شارع الستين ..شايل ليه (سكين)..رفعتو في العربية وجبتو يضبح.< الظاهر كدا زولكم دا كان ساكي ليه (حرامي)..وأنا حسب الواطة البدري افتكرتو ضباح ..جبتوا البيت.< زولكم طلع لي (اللحمة) كلها في (الجلد)...وقال لي بعد عمليتو دي ..عاوز (الجلد).< عاينت للجلد كدا (7) مرات ..وقلت ليه ..شيل (الخروف) وخلي لينا (الجلد).< الحاجات دي نحن فيها (شفوت).< بنعرف أي حاجة.< أنت وقت تشيل (الجلد)..خليت لينا شنو؟..(فول بعد الوقت دا ذاتو ما بنلقاه).< نحن عارفين أي حاجة.< نحن شفوت.< نحن ما في حاجة بتفوت علينا.< نحن أي حاجة عندنا بي نظام.< بس شنو؟.< بس الكلام دا ما يصل للناس الطلعوا من دور الـ(64).< الكلام دا ما يطلع من العمود دا.< طالعين لي من دور الـ(64)...وعاملين ليكم جهاز فني أجنبي.< الموضوع بي (كليتو)..ومصارينو برضو ..ما عاوز ليه جهاز فني أجنبي.< (معليش موضوع الخروف لخبط معاي في الكلام).< ابراهومة كفاية على دور الـ(64).< جمال الوالي ذاتو كتير على الكلام دا ..(كان تعتمدوا فقط على عبدالصمد).< تصوروا نحن لي عند قريب ..كنا فاكرين (البطيخ) من (الطيور).< مية مرة تقول لينا الكلام دا.< إن شاء الله البطيخ يطلع من (التمهيدي).< مالك أنت؟.< هسع دا ما موضوعنا.< ما تحاول تتخندق لينا في الحتة دي.< وكنا فاكرين (الروس) ديل (هنود).< هنود على منو لكن؟.< رغم من أنو ما في علاقة بين الهند وروسيا...(في احساسيات كدا ما عارف بتجي للزول من وين؟).< كنا بدون مناسبة بنعتقد.< نقعد (نعتقد) في الشارع ...من غير مناسبة.< مثلاً.< كنا بنعتقد أنو يوم (السبت) دا يوم طويل...(والحقيقة غير كدا بعد ما طلع السبت عطلة).< السبت هسع بقى زي (الزمن البدل الضائع) البرفعو الحكم في نهاية الزمن الرسمي للمباراة.< وكان الجماعة ديل بقولوا لينا في مؤسسات الحكومة ...(الخميس يوم قصير).< ونحن نصدق الكلام دا.< الكلام دا طلع من وين ؟...ما عارف.< القال كدا منو؟...ما عارف.< البخلي يوم الخميس يوم قصير ..ويوم السبت يوم طويل شنو؟.< دي اعتقادات ساكت.< اعتقادات ناس ما عاوزة تشتغل بس.< من الاعتقادات (الراسخة) عندنا برضو ..هو أن الفيلم العربي إذا تميتو وما نمت ..فذلك يعني أنك بتحضر ليك في فيلم أمريكي مدبلج.< وكنا بنعتقد ..أنو الفول ما في أحسن منو في الفطور ...(لو سمحتوا لي دي اعتقادات زول مفلس ساي).< فول شنو؟...(نحن بنطير من دور الـ 64) عشان تقول لينا (فول).< الفول دا ما تجيب لينا سيرتو ...(الكلام دا قولو لي زول بلعب في التمهيدي).< نحن الهلالاب كلامك دا ما بنفع معانا.< وبنعتقد برضو أنو المدارس دي عملوها في الدنيا عشان يدفعونا (رسوم) دروس العصر.< شفتوا (الاعتقاد) دا بايخ كيف؟.< زمان برضو كان في (اعتقاد) غريب كدا.< زمان كانوا بقولوا لينا (فهم السؤال نص الإجابة)..اتكلنا على الحكاية دي ..وبقينا أي امتحان كدا نجيب فيه (نص الدرجة).< بنجيب (الباص)...عن طريق (فهم) السؤال.< نفهم السؤال ..ونمشي للسؤال البعدو.< ما في زول كان قاعد يكتب ليه (اجابة).< ولا فاضيين للحاجات دي.< هسع أنا عاوز أقول لي ناس الهلال نفس النظرية ...عاوز أقول ليهم وهم سوف يلعبون بإذن الله بعد غدٍِ أمام الملعب المالي إن (فهم السؤال نصف الإجابة).< افهموا كلامي دا كويس ..وما ترموه البحر.< لو اشتغلتوا بالنظرية دي ...ما بتجيكم إن شاء الله أي عوجة.< بتغلبوا أربعة إن شاء الله ..لو اتعاملتو مع الملعب المالي على أساس (فهم السؤال نصف الإجابة).< يعني يا هلالاب ..مفروض تفهموا أن فهم السؤال هنا ...هو أن نسجل في الملعب اكتر من (هدف).< ما تجيبوا لي هدف واحد ..وتقعدوا تقفلوا لي على كدا.< يقوم ناس الملعب المالي ديل يخطفوا ليهم (هدف) تعادلي في آخر دقيقة ..يخلوا خشمكم ملح ...ملح.< أوعكم ..الموضوع دا انتوا قاعدين تعملوه كتير يا ناس الهلال.< هلال كادوقلي مرة خطف ليه هدف تعادل في آخر عمر المباراة.< والخرطوم الوطني.< دا غير الخروج المؤسف بالطريقة نفسها في البطولة الافريقية العام الماضي...عندما سجل الهلال ثلاثية ثم استقبلت شباكه هدف في آخر دقيقة أخرج الهلال من البطولة الافريقية.< هسع اعملوا حسابكم.< احسموا الملعب المالي من بدري ..وبأكثر من هدف ...وخلوا هناك على الأقل فارق هدفين.< نتيجة التعادل ..نتيجة مخيفة ..يمكن أن تمنح الفريق الضيف دافع أكبر للتسجيل.< وتسجيل هدف لصالح الهلال ..لا يعني تأهل الهلال ..إذا لم يسجل الهلال هدفاً ثانياً.< عشان نتيجة 1 / صفر ممكن تتعدل في أي لحظة ..وتعديلها لا قدر الله يعني خروج الهلال.< لذلك بحث الهلال منذ الان يجب أن يكون هو الانتصار بأكثر من هدف.< اعتبروا الهلال خسر في مالي صفر / 1.< اعتبروا ضربة الجزاء التى احتسبت ضد الهلال ...سجل منها الملعب المالي هدفاً.< لذلك مطلوب أولاً من الهلال تعديل النتيجة ...ثم التسجيل من أجل التأهل.< عشان كدا نقول (فهم السؤال نصف الإجابة).< افهموا السؤال أولاً.< الشئ العاوزين نقوله في حكاية ( فهم السؤال نصف الإجابة) ...هو أن (الملعب) السوداني أخطر على الهلال من (الملعب) المالي.< يعني يا ناس الهلال اعملوا حسابكم أولاً من ملعب استاد الخرطوم.< اعملوا حسابكم من (الأرضية)...الملعب المالي الهلال بقدر عليه إن شاء الله.< وهذا يجعلنا نقول ...إن الهلال عليه أن يسجل أكثر من هدف ...تحاشياً لتقلبات (الملعب) تربيع.< ملعب استاد الخرطوم...وملعب مالي.< الوصية الأخيرة ..وأنا أسمع الان عبر إذاعة الشباب والرياضة اف ام 93 عبر الزميل الإعلامي (خليل) من خلال سهرته (أمسية الخميس) أغنية (الوصية) التى كتبها إسماعيل حسن ولحنها برعي ..وتغنى بها العملاق وردي.< اسمع لها الان بصوت عصام محمد نور ..ونقول إن (الوصية) لجمهور الهلال هو أن يكون حاضرًا أمسية الأحد بكل الحماس والطموح والفرح لمساندة الهلال.< عودوا إلى مدرجاتكم ..وشجعوا الهلال.< انتوا فاكرين في أحلى من تشجيع الهلال.< تعالوا اشربوا الشاي والقهوة ..وشوفوا ناس سيدي بيه ديل بعملوا في شنو؟.< قالوا (الحفلة) ح تبدأ من تمانية يوم الأحد.< الفنان الأول سيدي بيه.< الفنان التاني نزار حامد (الصاقعة).< ثم بشه ومهند الطاهر ومدثر كاريكا وكوليبالي.< انتوا عاوزين شنو اكتر من كدا.< ابقوا مارقين ساكت على الاستاد.< ناس (التمهيدي) ديل ما يشغلوكم بالمسلسل التركي.< خلوهم براهم يتابعوا المسلسل التركي ..انتوا عندكم بطولة أفريقية ..(كمان نحن بنلعب).< ملحوظة : غايتو الزول وقت يطلع من دور الـ(64) ما بفك الريموت من ايدو.هوامش< الأهلي شندي اليوم سوف يفعلها إن شاء الله مساء اليوم.< فرحتنا دائماً تبدأ من شندي.< وأولاد الأهلي قادرون على أن يسبقوا حتى الهلال في التأهل.< مفروض شندي كلها تكون اليوم حاضرة في الاستاد.< عندكم فارس اليوم سوف يتم زفه إلى الدور المقبل في الكونفدرالية.< خلونا نبدأ من شندي.< ومن الأهلي تحديدًا.< ثم تكون الفرحة القادمة في الخرطوم عبر الهلال.< موضوع استقالة عبدالصمد...وجمال الوالي رئيساً للقطاع الرياضي..ما تجيبوه لي.< نحن ما فاضين للحاجات دي.< خلونا كلياً اليوم مع الأهلي شندي.< عاوزين نفرح.< وعاوزين نبدأ صاح من الأهلي.< واسألونا بعد ذلك يوم الأحد.< اثق في تأهل الأهلي شندي..وأعرف أنه قادر بإذن الله وتوفيقه على ذلك.< انتوا الحركات البعمل فيها (شوبير) دي شنو؟.< الزول دا اشتغل في القطاع الرياضي بتاع المريخ.< يا شوبير ..اتلم...شوف مشاكلكم بعيدًا عن الهلال.< أخبارك (المعفصة) دي لمّها عليك.< بعدين أنت القوانين دي يا شوبير ..درسوك ليها في (طابونة) رغيف.< دا شنو البتعمل فيها دا؟.< هلال منو البعاقبوه.< عصام الحضري بي جنسيتو المصرية وعن طريق جامعة الدول العربية كان بلعب في المريخ ..ما في زول قال ليه حاجة.< الحضري دا كان في السودان شغال في حرس الصيد.< يا زول مسرحيات ناس سعيد صالح ديل ..ما تعرضها لينا هنا.< ....< عاجل : ناس المريخ ديل لو لعبوا في دور الـ (110) بطيروا.[/SIZE]وإن طال السفر - محمد عبد الماجد صحيفة قوون