شاب سوداني يغير ملابسه بسرعة في شوارع الرياض .. ما القصة؟
قالي في كيس في المقعد الورا مدو لي معاك، مديت ليهو الكيس وما عارف فيهو شنو ولا سألتو، توقعت يكون سندوتشات ولا أي حاجة خفيفة ياكلوها لأنو ورانا مشوار طويل، وطبعا هو سايق العربية وأنا راكب معاه في المقعد الأمامي.
بعد شوية وفي أول إشارة تلاقينا ونحن في شوارع الرياض العاصمة السعودية اشوف ليك صاحبي طلع ليهو جلابية وسروال من الكيس وعايز يغير ملابسو، قلت ليهو دا شنو يا زول انت ما نصيح؟ رد لي استمتع بالرحلة ودع القيادة للسائق.
وبدا صاحبي في كل إشارة سرعة سرعة يملص في هدوم الشغل ويلبس في الجلابية والسروال، ولحدي الطاقية والشال ظبطهم تماااام وأنا ساكت ما قلت ليهو حاجة خايف من لسانو الطويل.
أها بعد ما خلص براهو قالي نحن ماشين وين؟ مش معزومين غدا؟ قلت ليهو ايوة والغدا ده تبع أصحابنا سعوديين. قالي أيوااا عشان كده أنا لازم أمشي ليهم وأنا لابس وقاشر بي زي سوداني كامل، وبعدين أنا طالع من الدوام يعني حأغير وين ماحيكون في أي مكان وحنلقى نفسنا في الاستراحة محل العزومة طوالي.
ويواصل راوي القصة في إحدى المجموعات الإلكترونية على شبكات التواصل الاجتماعي بحسب رصد محرر “النيلين” قائلاً:
سكت أقول ليهو شنو، بقيت بعاين في بنطلون الجينز والتشيرت الأنا اتشحطت بيهم ديل، رديت ليهو يا زول خير تمام، بس الشغلانة دي أنا اعتراضي في العربية ما كانت ظابطة، لكن أقوليك شنو إنت قائد الرحلة زي ما قلت.
رصد وتحرير – “النيلين”
