صبري محمد علي (العيكورة)يكتب: إن شاء الله الكلام ده يطلع غلط ..!
حمل لي تطبيق (الواتساب) بالامس مصيبة واتمنى صادقاً ان تكون (طرش واتساب) وان لا تكون حقيقة .
وقبل ما (اقول ليك) الحكاية…
خلونا نتفق انه….
من الخطأ والخطل والخطر الماحق ان تكون موارد الدولة (أي دولة) تحت سيطرة من يحملون السلاح بعيداً عن هيبة الدولة ومواعيد الاقتصاد فى البلد (داك) ومن الخطورة بمكان ان تعترف الدولة او (بلاش من كلمة تعترف دى) خلينا نقول تغمض عينيها وتعمل فيها ما شايفة ان الجنرال فلان شغال تعدين واللا اللواء فلان زارع من قادة الحركات المسلحة الذين يفترض ان يكونوا قد اكملوا التحول الى دعاة سلام وان تلك الحركات
التى قدراً سماها (الود حمدوك) حركات الكفاح المسلح . قد تحولت لاحزاب مدنية لها ما للاحزاب الاخرى وعليها ما عليهم من الواجبات الوطنية والالتزام بقيود العمل السياسي .
طيب نجي للمصيبة القلتها ليكم دي….
هو خطاب واكرر واتمنى ان يكون (ما صاح) ! ترويسة الصفحة تقول
الجيش الشعبي لتحرير السودان شمال
وتحت منها (ببونط) اقل شوية كتب (الجبهة الثورية القوات خارج المنطقتين) ! ويحمل رقم (ح/ش/ح/س/ش/ق/خ/م) بتاريخ ٢٢٠٢/١٠/١٦م
موجه الى السادة لجنة محلية النجيم بولاية البحر الاحمر وللامانة سأنقل نص الخطاب بما ورد وباخطائه وهو ..
السادة محلية النجيم
السلام عليكم ورحمة الله وبركاته
الموضوع / آبار منطقة النجيم
التابعة لمحلية (هيا) بولاية البحر الاحمر .
هذا الآبار تتبع للحركة الشعبية لتحرير السودان شمال الجبهة الثورية خارج المنطقتين .
نرجو منكم اللا تتعرضوا لهذا الابار لتعدي . باننا قدر تعرضنا لخسائر من قبل جراء ذلك التعرض وانبهكم اذا تعرض عليها اى واحد فإنه يتحمل المسؤولية الكاملة
ولكم منى خالص الشكر
الختم و التوقيع
الجنرال / عمر السيد حسب الله محمد
القائد الاعلى للقوات خارج المنطقتين
وللامانة من التوقيع وداخل الختم لم يظهر سوى العام (٢٠٢٢م) كتب باليد مصاحباً للتوقيع
(صاح ما صاح علمي علمك يا عب باسط) !
(انتهى مضمون الخطاب)
سألت بعض من اثق فيهم بحكم خبرتهم الامنية عن ماهية تلك الابار المقصودة فقيل لى انها ابار تعدين الذهب
طيب يا جماعة …..
معاهو طوالي وعلى ذات الورق المروس خطاب منسوب لنفس الجنرال مكتوباً بخط اليد موجهاً للادارة الاهلية بمنطقة النجيم يعتذر فيه عن خطابه الذى اشرنا اليه ولم ينفه بل واكد ان اى خطوة سيتخذها سيتم التشاور فيها مع (ناس) الادارة الاهلية . (مش كده وبس) ده (قال ليك) لو ناس الادارة الاهلية طلبوا من قواته مغادرة المنطقة لفعلوا فوراً . حسب الاتفاق بينهما (يقصد الحركة والادارة الاهلية كما فهمت) !!
تقريباً هذا مضمون الخطاب الاخر !
والخطابان سادفع بهما مع هذا المقال للصحيفة (وبالمرة) فليتقبلهما منى سعادة القائد العام للجيش هدية خااالصة منى لوجه الله تعالى .
ادارات اهلية تحتكر وتتفق وتاخد حقها نجيض !
ومقتدر يحمل السلاح ويملك من المقومات ما يجعله يستخرج الذهب ويحمي ويسوق و(الحساب يجمع) !
شفتو خازوق (جبل عامر وصل وين)؟
المشكلة ما هنا …..
المشكلة ان السلاح اصبح اداة (بااااردة) للثراء
قول لى كيفن ؟
عاوز تعمل زى سعادة الجنرال ده لازم تكون جاهز بالسلاح من مجاميعو ! (لا والله) (كنتو) عصابة كده على قد حالكم و من هواة قطع الطرق برضو لازم يكون معاكم كلاشين تلاتة .
(لا والله) اتقريفت ليك لخطفة موبايل واللا حقيبة ساكت تطعم بيها خشمك ! الموضوع ده اقلاااهو عاوز ليهو سكين وموتر ولربما مسدس صغير .
ما تعاين لي ! مش ده الحاصل يا جماعة ؟
اذا اين الدولة يا برهان ؟
على كل حال …..
اتمنى صادقاً ان يكون الخطابان المشار اليهما (مفبركين) يااااارب
وإلا زراعة شنو ؟ وسعاية شنو؟ كلاش يا عمك وريح راسك! واللا انا غلطان يا جماعة؟ مش ده اسهل واقصر طريق ؟
سعادة الفريق اول (الركن) البرهان ……
وسعادة الفريق اول (الما ركن) حميدتي …..
الحرائق بدأت تشتعل بالاطراف وان لم تتداركاها قضت على الاخضر واليابس فماذا تنتظران يا رعاكما الله .
قبل ما انسى :-
نقل عن القيادي الشيوعي صدقي كبلو قوله او إن شئت فقل (سكليبه) يقول فيها ….
الاسلاميون عادوا لمواقعهم واذا قامت عشرة انتخابات فسيفوز الاسلاميون !
ده كلام منو يا جماعة ؟ ده كلام صدقي كبلو صاح؟
وكلامي انا …
واضرب العشرة فى عشرة يا صدقي (بررررضو) سيفوز الاسلاميون .
صحيفة الانتباهة
