مدرب ولّا ممرض العاوزين تخفضوا مرتبه دا؟

> كنا تسعة فينا (عشرة) هلالاب ..والباقين (مريخاب) زي الناس الما دافعة ايجار البيت.

> نتلافح في الكلام …الواحد بس ما يقول ليه كلمة ..التاني ينط ليه في حلقو.

> ما عندنا اي مشكلة.

> قاعدين نتونس في (ونسة عادية)…سيرة الراعي الطيب يوسف الزين ما جبناها.

> جونا (17) نفر جارين.

> ثبتناهم قلنا ليهم الحاصل شنو؟….مالكم (متوادرين) كدا؟.

> قالوا لينا (كروجر) عاوزين يخفضوا (مرتبه).

> قلنا ليهم وانتوا مالكم ؟..تخفيض راتب كروجر دا (مطرة).

> قطر؟.

> البخليكم تجروا شنو؟.

> سيل ..الجارين ليه شنو؟.

> كشة؟.

> البجريكم ايه يا ولاد الناس؟.

> انتوا جنيتوا يا ناس …هسع جوا فينا ناس جارية …قلنا ليهم الحاصل شنو؟…قالوا لينا المريخ طار من (التمهيدي).

> قلنا ليهم انتوا كمان (الطيران) غريب عليكم.

> انتوا من (سيكافا) بتطيروا ..يعني شنو لو طيرتوا من (التمهيدي)؟.

> قعدنا بينا وبين نفسنا…(نتجابد في المواقف).

> لا عرفنا نثبتهم …لا عرفنا نجري معاهم.

> بي صراحة ..بي امانة (تخفيض) مرتب مدرب اجنبي دي اول مرة نسمع بيها في السودان.

> الموضوع دا عاوز ليه (جرية) عديل.

> جرية كاربة عشان يقع للزول.

> انتوا يا جماعة (كروجر) دا جايبنو المريخ (مقاول)..عشان تخفضوا ليه مرتبه.

> يفتح الله ويستر الله.

> وباركها يا كروجر.

> جايبنوا (ناظر مدرسة).

> الحالة صعبت ..والحالة واقفة …وظروف الناس صعبة.

> (سواق) هو في بص الوالي ..عشان تخفضوا ليه مرتبه.

> كيف يعني تخفضوا ليه (مرتبه)؟.

> مدرب هو ولّا ممرض؟.

> دا شنو البتعملوا فيه دا يا مريخاب؟.

> طيب لو كروجر الالماني بتعملوا فيه كدا …ناس محسن سيد ديل تعملوا فيهم شنو؟.

> انتوا عارفين لو (كروجر) وافق على الموضوع دا …عادي جدا بعد شهر جمال الوالي يقول لكروجر ح نشيلك (صالح عام).

> حكاية (تخفيض المرتبات) دي نحن في مؤسسات الحكومة ما قاعدين ندورها ..عاوزين تعملوها كمان للمدربين الاجانب.

> كروجر دا طار براهو من التمهيدي.

> اشمعنا هو والاجانب البتخفضوا مرتباتهم.

> عبدالصمد.

> عبدالصمد مالو كمان؟.

> عبدالصمد دا مفروض اول حاجة …توقفو رئاسته لبعثات المريخ.

> عبدالصمد دا قالوا ليك اي بعثة هو رئيسها.

> جوة ..وبرة …هو رئيس البعثة.

> احكي ليكم الحكاية دي بي اخر تلاتة سفريات للمريخ.

> المريخ عندما سافر الي الدمازين في (تمثيلية) كأس السودان ..عارفين رئيس البعثة كان منو؟.

> كان عبدالصمد.

> قلنا ما مشكلة ..دي اصلها (تمثيلية) ساكت.

> المريخ سافر الي الدوحة ..من اجل المعسكر الاعدادي …(30) يوم المريخ في الدوحة.

> عارفين رئيس البعثة كان منو؟.

> عبدالصمد.

> يقولوا ليكم الكلام دا مية مرة.

> قلنا ما مشكلة ما معسكر اعدادي ساكت ..(موسى الزومة) ممكن يكون رئيس البعثة.

> قعدنا ساكت.

> المريخ سافر الي يوغندا من اجل اللعب في مرحلة (التمهيدي) مباراة الاياب.

> عارفين رئيس البعثة كان منو؟.

> كان عبدالصمد برضو.

> اها نوع دا يقولوا عليه شنو؟.

> عبدالصمد دا لو كان اسمو عبدالواحد ..كنا قلنا يمكن ناس المريخ ديل ما عندهم غير الزول دا.

> شنو اي بعثة رئيسها عبدالصمد محمد عثمان.

> رجعنا وقلنا ما مشكلة ..ما كتيرة على عبدالصمد ان يكون رئيس بعثة المريخ الذي يلعب في دور الـ (64).

> بلة جابر …ممكن يكون رئيس البعثة ..يعني شنو؟.

> اها يا جماعة ..بيني وبينكم كدا ..(الطيران) دا سببو عبدالصمد رئيس اي بعثة للمريخ ولّا كروجر.

> اشمعنا تخفضوا مرتب (كروجر).

> زي كأنو (العلة) كلها في مرتب (كروجر).

> مرتب كروجر دا عارفين زي شنو؟.

> زي الناس البتبيع في بضائعها في تقاطع الشوارع.

> الزول يكون شايل ليه (لبسة) اطفال بتاعة سقط (تحديدا).

> تقول ليه (اللبسة) دي بي كم؟.

> يقول ليك بي (180) جنيه.

> بعد شوية يقول ليك بـ (170) جنيه.

> تاني يقول ليك جيب (160) جينه.

> يا زول نحن معاك لـ (150) جنيه.

> 130 جنيه بتنفع معاك.

> لمن خلاص الشارع يكون عاوز يفتح بيديك (اللبسة) ذاتها بـ (15) جنيه فقط.

> (15) جنيه.

> هسع جمال الوالي عاوز يتعامل مع (كروجر) بي نفس الفهم.

> من (180) جنيه …عاوزين يصلوا معاه لـ (15) جنيه.

> قالوا ليك كروجر مرتبه (18) الف دولار …المريخ طار من التمهيدي قالوا ليه ح نخصم منك (6) الاف دولار …(ضريبة طيران).

> عاوزين يبقوا مرتبه (12) الف دولار.

> ليه؟.

> عشان شنو؟.

> كروجر دا طار براهو.

> ما كلكم طرتو معاهو.

> خلاص يجيبوا ليكم مدرب (بنغالي).

> الشغل دا ما بقبل بيه إلّا البنغالة.

> الالمان كلامكم دا ما بنفع معاهم.

> جيبوا ليكم (بنغالي)..ويبقوا اتحاسبو معاه مباراة …مباراة.

> شغل يومية يعني.

> يغلب تحاسبوه كاش.

> يتغلب يتخصم منو؟.

> او ممكن تتعاملوا معاه بشغل الاسبوع ..زي ناس البنيان.

> كل خميس ..تشوفوا المدرب لعب كم مباراة ..واتغلب متين ..وعمل كم تمرين؟..وتحاسبوه بعد داك على كدا.

> يعني الاجهزة الفنية في المريخ خصصوا ليها (محاسب).

> عشان يحاسبهم بالتمرين.

> ناس صديق حسن صالح لو فكوا ليهم الموضوع …المدرب بحاسبوا ليك بالشوتة.

> ديل ناس صعبين.

> البلف قفلوه …وعاوزين يلحقوا المدرب في مرتبه.

> الطريف في الامر ان مجلس المريخ بعد انهاء التعاقد اصدر (بيانا).

> شوفوا العين القوية.

> يخفضوا مرتب المدرب ..ويطلعوا (بيان) كمان.

> مجلس المريخ في بيانه قال ان عقد كروجر قد تم انهاؤه بالتراضي ولم تتم اقالته.

> الفرق شنو يعني؟.

> ما في فرق كبير …اقالة ..انهاء العقد بالتراضي ..كلو واحد.

> بعدين لو كروجر انهى عقده مع المريخ بالتراضي ..هل يمكن ان يكون بكل هذا (الزعل).

> كروجر عاوز يطق من الزعل ..تقولوا لي تم انهاء العقد بالتراضي ..طيب لو كان ما في تراضي كان ح يحصل شنو اكتر من كدا.

> مجلس المريخ امس بالبيان الذي اصدره ارتكب حماقة كبيرة ..لأن بيان مجلس المريخ أكد ان من اسباب انهاء التعاقد مع كروجر هو خلافاته مع اللاعبين.

> ولا خلاف لكروجر مع لاعب غير هيثم مصطفى.

> (اكد المجلس بان من شروط تعاقده مع المدرب الالماني الابتعاد عن افتعال الخلافات وسط اللاعبين وعدم اطلاق تصريحات سلبية ورغم ذلك لم يلتزم اطلق العديد من التصريحات ووصل الامر الى الخلافات التى اخذت طابعا شخصيا , و اطلق اراء سالبة عن بعض اللاعبين اصبحوا اصدقاء لدكة البدلاء رغم انه من قام بالتوصية بتسجيلهم).

> مجلس المريخ حمّل هيثم مصطفى ذنب انهاء التعاقد مع كروجر ..وهذا يعني ان هيثم مصطفى مؤثر بصورة واضحة وكبيرة لدرجة ان مجلس المريخ انهى تعاقد مع مدرب لأنه مختلف معه.

> في الهلال رؤية المدرب وتقديراته انتصرت على هيثم مصطفى ..وفي المريخ يحدث العكس.

> البيان تجاوز الحديث عن تسجيلات المريخ الاخيرة والتى اكد كروجر عنها انه غير راضي بتسجيلات المريخ.

> البيان لم يتحدث عن التسجيلات …وجاء (عاطفيا) ..مثلما تأتي بيانات الكوارث ..التى تدعوا الي التكاتف ..والعمل من اجل مصلحة المريخ …وعدم الالتفات للاصوات المعارضة.

> بيان مجلس المريخ يثبت ان المجلس وجد نفسه في موقف محرج للغاية بعد تصريحات كروجر الاخيرة ..وبعد الانتقادات العنيفة التى تعرض لها المجلس …والتعاطف الكبير الذي وجده كروجر من القاعدة الرياضية في السودان بعد ان تم انهاء التعاقد معه بهذه الصورة غير الحضارية.

> دائما ما يثبت لنا مجلس المريخ في كل عهود جمال الوالي المختلفة انه مجلس ضعيف.

> الهجمة الاعلامية التى تعرض لها المجلس مؤخرا بعد اعفاء كروجر بالتراضي ..جعل المجلس يصدر (بيان).

> وهذا من علامات الضعف والهوان.

> ملحوظة : اتوفيستر دا بر ضو عاوز ليه (بيان).

هوامش

> اتوفيستر سنة 2007م …كان ما قاعد يفرق بين موسى الزومة وبلة جابر.

> هسع نحن في سنة 2014 ..اظنه عبدالصمد وضفر ما ح يفرق ليكم بينهم.

> زول عمرو (77) سنة…ح يعمل ليكم شنو؟.

> الاهلي شندي فاز على النيل الحصاحيصا.

> اخيرا عاد الاهلي شندي الي سيرته الاولى ..انتصر على الاتحاد في شندي برباعية نظيفة ..وفاز على النيل رغم من ان الاهلي شندي يلعب خارج الديار.

> مواجهة مهمة للاهلي شندي في الاسبوع السادس مع المريخ في شندي.

> عبدالرحمن الدعيع عاد اكثر تألقا.

> جميل من لجنة تسيير الهلال ان وافقت للنابي بمساعد تونسي ..حتى يستطيع المدير الفني التونسي للهلال ان ينجز مهمته في الهلال على اكمل وجه.

> النابي وحده في الجهاز الفني للهلال لن يستطيع ان ينفذ برنامجه على الوجه الاكمل.

> اليوم فريق الخرطوم الوطني مؤهل ان يفعل شيئا امام المريخ.

> المريخ لن يفلت من مباراة اليوم.

> انتظروا اخبار سعيدة ان شاءالله مساء اليوم.

> ابراهومة نفسه بعد مباراة اليوم يمكن يخفضوا ليه المرتب.

> اقول ليكم حاجة.

> خفضوا مرتب ابراهومة من الصباح.

> استفيدوا من وقتكم.

> ………..

> عاجل : لو جينا للجد ..(التمهيدي) دا ذاتو ما في داعي يكون فيه (مرتبات).