الحكواتي “فهد الأزرق” يعطي وَصفة للمغتربين الخائفين من شماتة “فشل الاغتراب”
كتب الحكواتي والمؤثر السوداني “فهد الأزرق”:
قبيل في واحد اخونا سوداني لاقاني جنب كفتريا قصر الشاي، كنا بنشرب في شاي كرك كباية الشاي بواحد درهم ،اها قعدنا في النجيله نتونس بالقرب من استاد الفجيرة الدولي.
قال لي انا خلاص بعد اسبوع داير اخالف وراجع السودان قنعت خلاص وما لقيت شغل ، لكن راجع وخائف، قلت ليهو خائف من شنو؟!
قال لي خائف من كلام ناس القرية العطالا البكملو ضل الضحى البعاينو للنسوان البمشن الدكاكين والجزارات يقولوا سافر الامارات ورجع بخفي حنين وما جاب حاجة وهم ما عارفين انا ما لقيت شغل وحق السكن والاكل في تلتله.
قلت ليهو ابسط حاجه امش المول الببيع الملابس الرخيصة بواقع 5 درهم، اخسر فيهم 100 درهم واشتري ليك جلالييب كندورة و زعها ليهم في شكل هدايا، والله الناس كلها بتشرب بيك الجبنه بقولوا فلان ماشاءالله جاء من الامارات و وزع جلالييب امارتية، وبكده بتكون غطيت فشلك في الاغتراب!
قال لي اي كلامك صحيح طوالي بنفذ خطتك دي وبمشي المول بشتري الجلالييب وبشتري كمان هدايا لي ناس البيت توبين وعبايتين.
قلت ليهو تمام يا زول كلام جميل جدا اشتري طوالي وسافر بالسلامة ان شاء الله، ووزع الجلاليبب لناس الفريق.
وأضاف: عشان كدي اي زول فشل فى الاغتراب يكتر الهدايا لي ناس فريقو عشان يتصدر المشهد في الفريق فلان جا من الاغتراب و وزع جلالييب هدايا وعبايات وتياب.
الخرطوم: (كوش نبوز)
