قحاتي يتسائل.. ﻣﻦ ﻭﻳﻴﻦ ﺍﻟﻜﻴﺰﺍﻥ ﻛﺎﻧﻮﺍ ﻳﺠﻴﺒﻮ ﺍﻟﻘﺮﻭﺵ ﺩﻱ ﻛﻠﻬﺎ؟!

قحاتي يتسائل
ﻳﺎ ﺟﻤﺎﻋﺔ، ﻛﺪﻱ ﻧﺘﻜﻠﻢ ﺑﻮﺍﻗﻌﻴﺔ ﺷﻮﻳﺔ …
ﻣﺎﻓﻲ ﺯﻭﻝ ﻳﺘﻌﺼﺐ …
ﺃﺭﺿﺎً ﻋﻮﺍﻃﻒ …
ﻧﺎﺩﻭﺍ ﻟﻲ ﻋﻘﻮﻟﻜﻢ ..
ﺑﺴﻢ ﺍﻟﻠﻪ ﻧﺒﺪﺍ ﻭﻧﻘﻮﻝ :
ﺍﻟﻜﻴﺰﺍﻥ ﺣﺎﻛﻤﻴﻦ ﺯﻣﺎﻥ ﺑﺪﻋﻤﻮﺍ ﺍﻟﻮﻗﻮﺩ، ﺍﻟﻐﺎﺯ ﻭﺍﻟﺮﻏﻴﻒ ‏( ﻧﺤﻦ ﻛﻨﺎ ﻓﻲ ﺍﻟﻤﻌﺎﺭﺿﺔ ﺑﻨﻨﻜﺮ ﺍﻟﻜﻼﻡ ﺩﺍ ﻭﻧﻘﻮﻝ ﻣﺎﻓﻲ ﺩﻋﻢ ‏) …
ﺍﻵﻥ ﺣﻜﻤﻨﺎ ﻭﺍﺗﻀﺢ ﻟﻴﻨﺎ ﻭﻟﻠﺸﺎﺭﻉ ﺍﻧﻮ ﻛﻞ ﺍﻟﺴﻠﻊ ﺩﻱ ﻛﺎﻧﺖ ﻣﺪﻋﻮﻣﺔ …
ﺍﻵﻥ ﻟﻤﻦ ﻳﺘﻢ ﺭﻓﻊ ﺍﻟﺪﻋﻢ ﺍﻟﺠﺰﺋﻲ .. ﺭﻛﺰﻭﺍ ﻣﻌﺎﻱ ﺍﻟﺠﺰﺋﻲ .. ﻳﻌﻨﻲ ﺟﺰﺀ ﻣﻦ ﺍﻟﺪﻋﻢ .. ﺟﺎﻟﻮﻥ ﺍﻟﺒﻨﺰﻳﻦ ﻣﻦ ٢٨ ﺟﻨﻴﻪ ﻟﻲ ١٢٦ ﺟﻨﻴﻪ، ﻳﻌﻨﻲ ﺳﺒﻌﺔ ﺃﺿﻌﺎﻑ .. ﻳﻌﻨﻲ ﻓﻲ ﺍﻟﺒﺮﻣﻴﻞ ﺁﻻﻑ ﺍﻟﺠﻨﻴﻬﺎﺕ، ﻓﻲ ﺍﻟﻄﺮﻣﺒﺔ ﻣﻼﻳﻴﻦ ﺍﻟﺠﻨﻴﻬﺎﺕ، ﻓﻲ ﻣﺪﻳﻨﺔ ﻭﺍﺣﺪﺓ ﻣﻠﻴﺎﺭﺍﺕ ﺍﻟﺠﻨﻴﻬﺎﺕ ..
ﻣﻠﻴﺎﺭﺍﺕ ﺍﻟﺠﻨﻴﻬﺎﺕ ﻳﻮﻣﻴﺎً ﺍﻟﻜﻴﺰﺍﻥ ﻛﺎﻧﻮﺍ ﺑﺪﻋﻤﻮﺍ ﺑﻴﻬﺎ ﻓﻘﻂ ﺍﻟﺒﻨﺰﻳﻦ .. ﻭﻣﺜﻠﻬﺎ ﺍﻟﺠﺎﺯ .. ﻭﻣﺜﻠﻬﺎ ﻟﻠﺪﻗﻴﻖ .
ﻃﻴﺐ ﺍﻟﺪﻋﻢ ﺍﺗﺮﻓﻊ .. ﺍﻟﻤﻠﻴﺎﺭﺍﺕ ﺩﻱ ﻣﺸﺖ ﻭﻳﻦ؟ !
ﺍﻟﻜﻴﺰﺍﻥ ﻛﺎﻥ ﻋﻨﺪﻫﻢ ١٨ ﻣﺠﻠﺲ ﺗﺸﺮﻳﻌﻲ ﻭﻻﺋﻲ .. ﺃﻱ ﻣﺠﻠﺲ ﻓﻴﻬﻮ ﺃﻛﺘﺮ ﻣﻦ ٣٠٠ ﻧﻔﺮ ﺑﻴﺎﺧﺪ ﻣﺮﺗﺐ ﻭﻣﺨﺼﺼﺎﺕ ﺷﻬﺮﻳﺔ، ﻳﻌﻨﻲ ﻣﻠﻴﺎﺭﺍﺕ ﺍﻟﺠﻨﻴﻬﺎﺕ ﻓﻲ ﺍﻟﺴﻨﺔ ..
ﺍﻵﻥ ﻣﺎﻓﻲ ﻭﻻ ﻣﺠﻠﺲ ﺗﺸﺮﻳﻌﻲ ﻭﻻﺋﻲ .. ﻳﻌﻨﻲ ﺍﻟﻘﺮﻭﺵ ﺍﻟﻜﺘﻴﺮﺓ ﺩﻱ ﻛﻠﻬﺎ ﺍﺗﻮﻓﺮﺕ ..
ﺍﻫﺎ ﻣﺸﺖ ﻭﻳﻦ؟ !
ﺍﻟﻜﻴﺰﺍﻥ ﻛﺎﻥ ﻋﻨﺪﻫﻢ ﻣﺠﻠﺲ ﻭﻃﻨﻲ ﻓﻴﻬﻮ ٤٠٠ ﻧﻔﺮ .. ﺑﺮﺿﻮ ﺑﺼﺮﻓﻮﺍ ﻣﺮﺗﺒﺎﺕ ﻭﻋﻨﺪﻫﻢ ﻣﺨﺼﺼﺎﺕ، ﻭﻛﺎﻥ ﻓﻴﻬﻮ ﺭﺅﺳﺎﺀ ﻟﺠﺎﻥ ﺑﺪﺭﺟﺔ ﻭﺯﺭﺍﺀ .. ﻭﺩﻳﻞ ﺑﺮﺿﻮ ﻛﻠﻬﻢ ﺑﺼﺮﻓﻮﺍ ﻣﺮﺗﺒﺎﺕ ﻭﻋﻨﺪﻫﻢ ﻣﺨﺼﺼﺎﺕ ﺷﻬﺮﻳﺎً .. ﻳﻌﻨﻲ ﺑﺮﺿﻮ ﻣﻠﻴﺎﺭﺍﺕ ﺍﻟﺠﻨﻴﻬﺎﺕ ﻓﻲ ﺍﻟﺸﻬﺮ .. ﺍﺿﺮﺑﻬﺎ ﻓﻲ ﺍﻟﺴﻨﺔ ..
ﺩﻱ ﻛﻠﻬﺎ ﺍﻵﻥ ﺍﺗﻮﻓﺮﺕ ..
ﺍﻫﺎ ﻭ ﻳﻦ ﺭﺍﺣﺖ؟ !
ﻟﺴﻪ ﻣﺎ ﺍﻧﺘﻬﻴﻨﺎ، ﺭﻛﺰﻭﺍ ﻣﻌﺎﻱ ..
ﺍﻟﻜﻴﺰﺍﻥ ﻛﺎﻥ ﻋﻨﺪﻫﻢ ﻣﻨﺴﻘﻴﺔ ﺷﺮﻃﺔ ﺷﻌﺒﻴﺔ، ﻭﺩﻓﺎﻉ ﺷﻌﺒﻲ، ﻭﺍﺗﺤﺎﺩﺍﺕ ﺟﺎﻣﻌﺎﺕ ﻭﺇﺗﺤﺎﺩ ﻣﺮﺃﺓ ﻭﺇﺗﺤﺎﺩ ﺷﺒﺎﺏ ﻭﺩﻳﻞ ﻛﻠﻬﻢ ﺷﻬﺮﻳﺎً ﻋﻨﺪﻫﻢ ﻣﻨﺎﺷﻂ ﻭﺻﺮﻑ ﻭﻣﺮﺗﺒﺎﺕ ..
ﺩﺍ ﻛﻠﻮ ﻫﺴﻲ ﻣﺎﻓﻲ، ﻳﻌﻨﻲ ﻣﻠﻴﺎﺭﺍﺕ ﺍﻟﺠﻨﻴﻬﺎﺕ ﺑﺮﺿﻮ ﺍﺗﻮﻓﺮﺕ ..
ﻣﺸﺖ ﻭﻳﻦ؟ !
ﻃﻴﺐ، ﺁﺧﺮ ﺣﺎﺟﺔ، ﺍﻟﺒﺸﻴﺮ ﺷﻬﺮﻳﺎً ﻛﺎﻥ ﺑﺰﻭﺭ ﻟﻴﻬﻮ ﻣﺤﻠﻴﺔ ﺃﻭ ﻭﻻﻳﺔ ﻭﻳﻔﺘﺘﺢ ﻟﻴﻬﻮ ﻣﺴﺘﺸﻔﻰ ﺃﻭ ﻃﺮﻳﻖ ﺃﻭ ﺣﺘﻰ ﻛﺒﺮﻯ ﺃﻭ ﺇﺟﺰﺧﺎﻧﺔ ..
ﺩﻱ ﻛﻠﻬﺎ ﻭﻗﻔﺖ ﻟﻴﻬﺎ ﺳﻨﺔ ﻛﺎﻣﻠﺔ …
ﻣﻦ ﻭﻳﻴﻦ ﺍﻟﻜﻴﺰﺍﻥ ﻛﺎﻧﻮﺍ ﻳﺠﻴﺒﻮ ﺍﻟﻘﺮﻭﺵ ﺩﻱ ﻛﻠﻬﺎ؟ !
ﻭﺍﻵﻥ ﺍﻟﻘﺮﻭﺵ ﺩﻱ ﻣﻔﺮﻭﺽ ﺍﻧﻬﺎ ﺍﺗﻮﻓﺮﺕ ..
ﻃﻴﺐ ﻭﻳﻨﻬﺎ؟ !
ﻓﻲ ﻧﻘﻄﺔ ﻣﺎ ﻧﻨﺴﺎﻫﺎ ﺍﻟﻜﻴﺰﺍﻥ ﻛﺎﻥ ﺑﻴﺤﺎﺭﺑﻮﺍ ﻓﻲ ﺍﻟﺤﺮﻛﺎﺕ ﺍﻟﻤﺴﻠﺤﺔ .. ﺷﻬﺮﻳﺎً ﻋﻨﺪﻫﻢ ﻣﺘﺤﺮﻙ .. ﺑﻜﻠﻒ ﻣﻠﻴﺎﺭﺍﺕ ﺑﺮﺿﻮ ..
ﻋﺴﺎﻛﺮ ﻭﺗﺎﺗﺸﺮﺍﺕ ﻭﺳﻼﺡ ﻭﺫﺧﻴﺮﺓ ﻭﺗﺸﻮﻳﻦ ﻭﻭﻗﻮﺩ، ﺍﻟﺤﺮﺏ ﻭﻗﻔﺖ ﻟﻴﻬﺎ ﺳﻨﺔ، ﻭﺍﻟﻘﺮﻭﺵ ﺩﻱ ﻛﻠﻬﺎ ﺍﺗﻮﻓﺮﺕ ..
ﻃﻴﺐ ﻣﺸﺖ ﻭﻳﻦ؟ !
ﻣﺎ ﺗﻨﺴﻮﺍ ﺑﺮﺿﻮ ﻗﺮﻭﺵ ﺍﻟﻘﻮﻣﺔ ﻟﻠﺴﻮﺩﺍﻥ ﻭﻣﻠﻴﺎﺭﺍﺕ ﻛﺮﻭﻧﺎ ﻭ ﻏﻴﺮﻫﺎ ﻣﻦ ﺩﻭﻻﺭﺍﺕ ﺍﻟﺪﻋﻢ ﺍﻟﺠﺎﺕ ﻟﺤﻜﻮﻣﺔ ﺣﻤﺪﻭﻙ ﻭﻗﺤﺖ ﻣﻦ ﺑﺮﺍ
ﻭﻳﻴﻴﻦ ﺭﺍﺣﺖ ﻳﺎ ﻧﺎﺱ؟
محمد عبد الله لطيف