هل ممكن نشجع الناس على التوليد من الشمس في المنازل في السودان ؟
الواقعية في الطاقة المتجددة
في 2019 أضاف الأستراليين 2.2جيجاوات كهرباء للتوليد القومي من الطاقة الشمسية من سقوف المنازل “دي قريب كل أنتاج السودان الحالي ” ،وكان أضافو 1.6 في 2018 و 1.1جيجا في 2017 .. حيث وصلت كهرباء المنازل في نهاية 2019 حوالي 12.7جيجا واط من 2.7 مليون منزل وهو ما يقارب 30% من المباني والبيوت لسكان أستراليا البالغ عددهم 25مليون .. العملية بدت بدت من 2012 ولكن تسارعت أوتضاعفت في السنوات الأخيرة عندما نزلت كلفة أنتاج الكيلو واط (قلّ السعر – وزادت كفاءة الألواح ) من 2 الف دولار في 2012 إلي حوالي 700دولار حالياً ، بحيث أصبحت مجدية كتيرة مقارنة بمتوسط سعر الكيلو من الكهرباء القومي عندهم الهو في حدود 0.21 دولار أميركي حالي كتير من خبراء الأسواق بينصحو الناس ما يستثمروا في الشركات البتقدم كهرباء قومية لأنة شكل Curve بتاع نمو المنازل ده حا يأثر على دخول الشركات مستقبلاً
…
كلنا بنحب الطاقة الشمسية وشايفين انها مخرج لبلد زي السودان ، لكن “الشيطان في التفاصيل” لدرجة لحدي هسه بعض المختصين هنا في السودان ما بينصحو بيها ،
طيب عشان تفهما لازم تعرف انها من خلال وجودها في الشبكة القومية هي على أربعة أنواع
1- محطة توليد مربوطة بشبكة الكهرباء .. On grid
2- محط توليد كهرباء محلية يوزع لمستلهكين بيوت أومزارع أومصانع قريبة .. Mini Grid
3- محطة مربوط تبادلي مع الشبكة القومية يديها الفائض ويشيل منها لم ينقص Tied Grid
4- وحدة توليد واستهلاك منفصلة زي حقات المزارع البركبوها الأيام دي Off-Grid
عملية نقل الكهرباء ، ودمجها دي عملة مكلفة جداً خصوصا في في بلد واسع زي السودان ، ونحن ناس خزيتنا فاضية ، يعني التفكير في مشاريع كبيرة عايز تمويل والتمويل حجوة ام ضبيبنة ، .. اشترينا خمس وحدات سيمنس حرارية تنتج 875 ميقا وصلت في 2016 بي 560 مليون وفوائد الدين ماشة و لحدي هسه ما وصلوها بالشبكة القومية بسبب البنية التحتية والتوصيلات دي (واظن الوحدة أو الأتنين الدخلت من اول السنة طلعت بسبب الكرونا وسفر الفنيين)
دول كتيرة اشعاهعا الشمسي يمكن نص الموجود في السودان بتشجع مواطنيها على نظام الربط التبادلي وبتديك عداد يحسب الداخل والطالع زي مصر بتحسبو بما يعادل 7سنت والأردن 8 سنت وتركيا 11 سنت
الشهر الفات تكتل تأهيل أقليم التقراي الأقتصادي في اثيوبيا وهي مجموعة من الشركات وأصحاب العمل التقراي وقعوا عقد بقيمة 3مليار دولار لمدة 30 سنة مع شركة مجتمعية “تعاونية ” كبيرة في أستراليا اسمها لوتس عشان تقدم ليهم حلول طاقة شمسية بحوالي 500ميقاواط غير حلول التخزين والاستفادة من تدوير النفايات ،و وصفوه بأنو حايكون أكبر ” شبكة محلية Mini Grid في العالم ” طبعاً حا يدقوهو شيرنغ ” وبرمجة وتمويل خاص ربما بدون دخل من الحكومة زاتو .. ليه فكروا كده وعندهم سد النهضة وغيرو من المصادر حا تدخل 20.000 ميقا قريب ؟ ما ياهو بسبب تكلفة النقل والمحولات دي
مشروع بنبان المصري بينتج 1950ميقا من الطاقة الشمسية الدخل السنة الفات أنشاته كونسرتيوم عشرات الشركات ، ومشروع بحيرة تركانا في كينيا خش 2018 من طاقة الرياح 310 ميقا برضو أنشاته شركات وكان قوقل رفضت الدخول فيهو لانو الحكومة اتأخرت سنة في ربطه بالشبكة القومية ” تتخيل سنة واحدة ؟ ما عارفين نحن 5 سنوات ما قادرين نربط وحدات سيمنس
هل ممكن نشجع الناس على التوليد من الشمس في المنازل في السودان ؟ كيف نقدم ليهم المحفزات بحيث يتصاعد التوليد ؟ هل تقنياً ممكن نعمل تبادل مع شبكة القومية بحيث تزيد سعة التوليد القومي وتقل تكلفة الأنشاء للطاقة الشمسية بالتخلص من البطاريات ؟ هل ممكن نخلي ناس المزارع في دلتا طوكر أو في غرب أمدرمان أو الباوقة أو ناس المصانع في الباقير أو الشاحنات بورتسودان يعملو Mini Grid ؟ او حتى Small-scale solar أو طاقة رياح ؟
#دعوة_للمشاركة
دعوة للناس نسمع أفكار واقعية في التكلفة والأمكانية يا بهدف نقدم حاجة تنتصر على واقعنا الأقتصادي السيء .. علما بأننا مجموعة من الشباب شغالين في الحتة دي بنفاضل بين الشركات في التكلفة والكفاءة والأمكانية
والتكلفة في العموم من المعدات الصيني والهندي اقل كتير من الظاهر في تقارير استراليا
………………
للزول الما عارف عشان ما تتلخبط
الجيجا وات ساعة فيهو ألف ميقاواط .. والميقا فيهو ألف كيلو من البتشوفهم في شاشة الجمرة ده
هادي ود البورت
