قرار بحل إتحاد الهجن وأيلولة أصوله للوزارة

والله يا ناس قحت قضيتكم قضية ، ماعارفين الحاصل في البلد واول ما يطلع خبر جميل من جهة ما تجروا عشان تحطموها وتصادروها وتكتفوا ايديها ،،
والله البنية دي لا بتعرف اتحاد هجن ولا سمعت بيه الا بعد الانتصارات التي حققها الاتحاد في الامارات والسعودية ..
قالوا كانت نايمة وقامت فجأة ولقت خبر فوز الهجن السودانية في مهرجان الملك عبد العزيز لسباق الهجن العربية قالت اجي هو نحن اتحاد للهجن وشالت التلفون: هلوووو يا محمد انت ليه ما قلت لي انه عندنا اتحاد للهجن .ومحمد يقول ليها سعادة الوزيرة كل ملفات الاتحادات عندك وفي بورد مكتوب فيه اسماء الاتحادات كلها والوزيرة قالت ليه لالا كدا ما يفع لازم توريني… بكرة اوريك ..
قامت الوزيرة من الصباح طرشت وشيها بحبة كريم وختت قلم الحواجب في الشنطة عشان تعملوا في المكتب وما تتاخر ..واول ما وصلت نادت محمد تعال جيب الملف دا محمد طلع الملف وكان تاني ملف لانه احداثه كانت جارية ،، قالت سجمي سجمي دا كله وانا ماعارفاه ، والاتحاد دا رئيسه منو قالوا ليها الشيخ فلان ودائما ابله بتفوز . قالت يعني الابل دي ما تبع النظام قالوا ليها لا ، طيب والاتحاد دا داره وين قالوا ليها ماعنده دار قالت ليهم طيب كيف بيجتمعوا وبيصرف على الاتحاد ..؟اكيد بجيهم دعم وغير موضح او مكشوف قالوا ليها لا يا سعادتك ديل بمولوا نفسهم بنفسهم والدولة ما قاعدة تتدخل كتير بس بالتصدق على السفر للابل المشتركة في المهرجانات .
طيب هسي ديل اتعامل معاهم كيف وهم مافي الخرطوم .الكلام دا ما ينفع والثورة قامت عشان تخت يدها على كل حاجة تتبع للدولة او شبه تابعة او يكون نشاطها مقرون باسم الدولة وعشان كدا لازم يتحل الاتحاد دا ويكون رئيسه واحد من ناس الثورة .
يا سعادتك ناس الثورة ديل مافيهم زول بيعرف امور الهجن وسباقاتها وديل اخذوا خبرة بالمشاركات قالت ليه الوزيرة عاين لي انا ماعايزة نقة كتيرة اعمل منشور هسي بحل الاتحاد وتؤول الابل والمباني للدولة
محمد قالها يا سعادة الوزيرة الابل بتلحق اسود القرشي ..