محتال يحكي كيف حاول خداع الشبخ محمد الغرقان بحلى ذهبية مزيفة

في يوم الاربعاء .
28 من اكتوبر 2015م
وبحي الشهداء الامدرماني بالقرب من قبر قاضي المهدية حيث مقهي ( الفتاة الاثيوبية ميمي) كان اللقاء مع احد ابناء المجاهدين وحفيد احد جنود المهدية .
.

رجل تمرد علي قيم اهله والبيت الذي ترعرع فيه .
اختار لنفسه حياة خاصة .
مارس كل انواع العربدة والفتوه .
يتحدث عن نفسه بثقة بالغة .
غير نادم علي شي .

يتظاهر بالجنون في بعض الاحيان .
وفي الغالب يتظاهر بالفقر عندما يرتدي الملابس المتواضعة
فهو يجيد التمثيل ببراعة .

يفضل النظر والسمع علي التحدث
وعندما يتحدث يظهر للسامع او يتظاهر انه لا يفقه ادني شي عن الحياة في بداية حديثه حتي يتاكد من هوية محدثه وخبرته ومجاله ..

وعندما ( يضحك ) تكتشف انه يمارس ابشع انواع الاستخفاف .

كثير الاسئلة وكذلك كثيرة هي الاسئلة التي تدور حوله وحول مظهره ..
متناقض جدا .

البعض كان يتهمه بانه مصدر لرجال مكافحة المخدرات ..

.

يرتدي في بعض الاحيان اغلي الملابس الغربية وعندما يحدثك عن نفسه..
يتحدث اولا عن الولايات الامريكية المتحدة ثم الصناعة الامريكية واناقة نجوم السينما الامريكية .
بل يحفظ معظم ( اسامي ) الشركات الامريكية ورجال الاعمال الامريكان وفي تسجيل صوتي عدد اكثر من ..
/100..
من ابطال الملاكمة ونجوم السينما .
بل زاد علي ذلك بحفظه لتاريخ حياتهم واماكن ميلادهم كما انه يعرف الولايات المتحدة بشوارعها ومدنها الصغيرة والكبيرة اكثر من معرفته للشرق الاوسط وافريقيا ..
قال انه لا يحب السياسة ولا يهتم بالفن السوداني .
غير انه كان يحب الجابري ..

وعندما سألته عن الشعر علي هامش الونسة ..
قال
انه لا يحفظ بيت شعرا سوداني واحد
لكنه كان يعرف الشاعر عبدالرحمن الريح معرفة شخصية
ووصفه قائلا ..

كان زول انيق وعملاق ووسيم
كنت بمشي ليه .راجل شخصية نضيف ضبانه ما بترك فيه

وعن المطربات قال ..

ما ..
بسمع ( لقويه )

وعلي هامش الونسة ايضا تحدث عن الرياضة
والاندية الامدرمانية
مثل
الرابطة
وحي العرب
والموردة
ثم تحدث عن صداقته بالاعب الصاروخ ولاعب الهلال عزيز ثم قال انه كان يحب كورة القدم ومن المفترض ان يصبح لاعبا لو لا اهتمامه بحمل الاثقال .
وقال
ان اللاعب زمان يتم تسجيله بفنله فقط
واصفا لا عب المريخ السابق جاد الله( بالشفت )

2/

رجل غريب في سلوكه وطريقة كلامه .

في لبسه وتعامله مع الناس ..

تارة يظهر بمظهر الغلبان المحروم وتارة اخري يتجبر ويستخف حتي بمن يعرفه ..

متقلب
حاد المزاج
يتأمل ولا يسرح .
قوي الاطراف
شجاع لا يعرف غير المواجهة ان لزم الامر ..
قاسي جدا ومع ذلك عاطفي لدرجة لا توصف
يكاد يبكي عندما يشاهد طفل متشرد او صاحب حاجة او عندما يسمع بموت رجل عرف بين الناس بالكرم .
..

يعرف تاريخ معظم المجرمين ورجال المباحث .ولا يعترف الا بالقليل ..
وصف كل من سألته منه من قطاع الطرق والمجرمين في المدينة .
وصفهم بالوهم
غير انه قال ان الواثق صباح الخير كان ( خطير )
وعندما سألته عن عصابة الرومان .
قال
ديل وهم ساي .
وعن جمال دقلش
قال
( دا مكداكي ) اي نشال ..

3/

.. لا تظهر عليه البهجة الا عندما تقول له انت (شفت)
لحظتها يشعر بالسعادة ويحس انك انزلته المنزلة التي يستحقها .
ويرد عليك ..
ايوه ايوه ايوه شفت شفت شفت ثلاث مرات ثم يضحك وينظر الي ملابسه ويحدثك عن سعرها العالمي اليوم ..

جلست معه تنفس وتحدث وقال كل شي بشفافية عن مراحل حياته ..
طرحت عليه ( 30) سؤال اجاب عليها دون تحفظ ودون تردد..

احذف بعضها لكونها مرتبطة بخصوصية غيره ..
…

قلت له في البداية …

س
/1

تايقر
عباسيه
جزيره
الراستا
المعلم
جنصصه

دي كلها بنادوك بيها ..

اسمك الحقيقي منو ؟؟

ج
اسمي محمد الطاهر محمد .

2/

من وين اصلا

ج/
اصلنا من الجزيرة ابا .

3/
يعني جزيره دي المقصود بيها الجزيرة ابا .
طيب مولود في الجزيره ابا ام امدرمان

ج
ايوه ايوه الجزيره ابا
ومولود هنا في تكية السيد عبدالرحمن المهدي .
امي مرا جميلة خالص ..
اتزوجت ابوي في الجزيرة ابا وكان من جنود المهدية ولحد الان موجود

4/

قاعد وين ابوك ؟؟

ج

في قبة المهدي

5/
طيب قبل كده سمعتك قلت انك( لقيط )

ج
ضحك ثم قال
اي اي اي طولي بقول كده ديل ناس وهم الواحد يسألك انت من وين وجنسك شنو .
بقول لقيط عشان اقفل الواحد
هسي انا ما بسال زول انت من وين وامك وابوك مالي ومال الناس كتابي واحد
البسألني بقول ليهو انا لقيط …
ثم عاد لضحكته ..

6/

طيب علاقتكم شنو بي بحري شايف اخوك طوالي بقول لي جاي من بحري وماشي بحري وساكن في بحري بعدين اخوك متدين جدا وراجل بركه ..

ج
نحن ولاد امدرمان عباسيه ود نوباوي البوسته .اخوي دا مع الشيوخ في بحري في اي مكان فيه نوبه وذكر بتلقاه و واتفارقنا من نحن صغار ..

7/

اتفارقتو كيف ؟

ج^
اتفارقنا من التكية اخوي واصل في الخلوة وحفظ المصحف وانا بقيت متشرد .

8/

كدي قبل نجي لي متشرد دي انت مولود سنة كم ؟؟

ج
تقدر تقول 50// 49 / 51/ ما متاكد بالضبط .

8/
حضرت السيد عبدالرحمن المهدي ؟

ايوه ايوه شفتو وبحبو جدا
انا بحب الراجل الكريم السيد عبدالرحمن بحبو خالص ..
كان رجل عملاق والسيد الصديق .

الصادق برضو عملاق اتصور بمارس الرياضه لحد الان
الراجل لازم يكون قوي .دا خطير جدا
اللقويات بحبن الرجل العملاق بجذبهن تصور !!
ثم تنفس وضحك بعد ان اظهر عضلاته ونظر لنفسه عبر شاشة الجوال . ..

9/

عملاق زي هارون بتاع الخزن ..
بتتذكرو ؟؟؟
رجل عتالي كان بشيل الخزنه يطلع بيها العمارة

ج/

ايوه ايوه كان جامد الله يرحمه مسكين مات
لكن دا (…………) وهم ساي الله اداك قوة زي دي تشتغل بيها عتالي ..

10/
اها نرجع لي موضوع اخوك اتفارقتو

ج مقاطعا
ايوه كل زول بي دينه

س
اتفارقتو وخليتو في الخلوة وما دخلت المدرسة يعني ما قريت خالص
المحيرني الانجليزي دا اتعلمو وين ؟؟

ج
زي ما قلت ليك يا ود اخوي كل زول بي دينه ..
انا خليت الخلوة بعد حفظت سور الصلاة وما دخلت مدرسة بقيت متشرد ..
والانجليزي
من الافلام الامريكية بتكلمو بس كتابه شويه شويه
انا بحب الامريكان ..

11/

اها بقيت متشرد وبعدين ؟؟

ج
بقيت متشرد
ااكل من البراميل العيش الملان وسخ وبول ..

12

ما اشتغلت ؟

ج
ما بشتغل
اشتغلت بعد تبت
ببيع ساعات ونضارات وخواتم .

13/

س
كدي حدثني عن تكية السيد عبدالرحمن والناس الفيها وشكل الحياة كان كيف .ومشيت خليتها ليه ؟؟

ج
خليتها لاني ما بحب حياة الشحادين
الواحد لازم يجازف انا بكره الفقر
وكان عندي هدف .

في التكية
كان الناس بتاكل وتشرب وتشتغل جوه التكيه وبدوهم رقعه ///قروش .
والداير المدرسه بدخلو وفي علاج .

س
البديهم قروش منو ؟؟
والعلاج علاج شيوخ ام دكتور .

ج
بدي القروش السيد عبدالرحمن والصديق والعلاج دكتور وكلو مجان المرا الدايره تلد بجيبو ليها الدايه
السيد عبدالرحمن كان راجل اصلي انا بحبو جدا .

س
اتعلمت شنو من فترتك في التكية
ج
ما اتعلمت شي
انا اتربيت في الخيران والزقاقات بمشي التكيه مره مره لي امي .
علمتني الحياة اقلع احتال جرائم حره كلها

15/

اها بعد كبرت شويه عملت شنو ؟

ج
خشيت محل الحديد اتدربت وعملت عضلات وبقيت عملاق

بقيت بتسرق يعني ؟؟
لا لا لا … يازول .اوعه .

انا عمري ما اشتغلت مكداكي ديل ناس عوض وجمال والدنقلاوي ديل ناس وهم وجبانين بنشلو محافظ النسوان .
انا بدق وبقلع يا ود اخوي زول تعبان زيك كده ما بحقرو لازم يكون عملاق ضخم فهمت علي .
ما بكدك لي قروش مرا مسكينه في المواصلات كتابي واحد .
بخش الخانه اشوف العربي المحنفل اطقطقو واجازف العندو .

س
الخانه دي شنو ؟
ج
زمان يا ود اخوي امدرمان دي كان فيها بيوت ………. وبارات وخانات كبنقه وقهاوي قمار .
س
وما بتخاف .
ج
كيف ما بخاف مافي زول ما بخاف
بخاف طبعا قول لي من شنو
س
اها من شنو ؟؟
ج
من دعوة المظلوم قال ليك دا ربنا طوالي بجيب دعوته يعني هسي زي البت بتاعت القهوة دي ما بشيل محفظتها لانها مسكينه وعايزه تاكل عيش اما البجي الخانات دا حقو حلال .

س
بتخاف من شنو قلت لي ..

ج
دعوة المظلوم .

س
وتاني

ج
الفقر

انت متاثر بي افلام العصابات الامريكية ونجوم السينما ؟
ج
ايوه ايوه وبحب الامريكان جدا لانهم شفوت

16/

طيب ياخ انت قلت عشت حياة قاسية واكلت من الكوش القوة دي جبتها من وين .

ج
ايوه قال ليك ربنا يضع سره في اضعف خلقو انا اكلت العيش الملان بول وهسي ان نقرتك بونيه يوم القيامه تقوم ماسك حنكك

ثم ضحك وردد
انا شفت انا شفت ياخ ..انت فردتي بهظر معاك ..

17
يا جزيره في ناس قالوا انت مصدر ؟؟

ج
مصدر لي ناس المكافحة تقصد ..

س
ايوه وتحديدا هاشم بخيت والزبير وجماعة عمارة البغدادي
وبالامارة بتمشي هناك كتييير ..
احتمال تكون اشتغلت مصدر وخليتها
ادينا فكرة عن التجربة دي والمقابل كان شنو ؟؟

ج
اول حاجه انت ود اخوي وما بدس عليك حاجه
انا بكره( البونبه)// رجل الشرطه يقصد ..
وبكره واللقويه
مش بقول ليك خوة الكاب حدها الباب
ما بتعرص لحكومه ولا بحترم ال…………
العسكري واللقويه غدارين

وبمشي عمارة البغدادي للساعاتيه ..

18
طيب حصل اتقبضت .؟

ج
بي كبنقه ما حصل
البتقبض بي دواء دا فاره

س
بعت البنقو قبل كده

ج
لا
وانت مش هسي ود اخوي وبعرفك ما بشحدك سجارة ولا بشتري منك

س
بتشرب يعني براك

ج
زمان
ربنا تاب علي عشرين سنة ما عملت حرام

س
كنت بتشتري من وين ؟

ج
ما بشتري
فردي شفوت وتجار بجازف منهم .

19
دخلت السجن كم مره وفي شنو ؟؟

ج
كتيييير
كل سجون العاصمه دخلتها
بي جرائم حره طبعا ..

20
كدي احكي لي عن عملية احتيال قمت بيها ..

ج
لمن كانت السجائر ممنوعه وفيها مصادرة تتذكر ؟

س
لا ما حاضرها

اها ؟؟

ج

جيت داخل الاوسط لقيت ليك يازول السجائر دي بالكراتين جوه القسم .
قلت يا معلم دا شغل جاهز
عديت الكراتين لقيتها ليك 150 كرتونه .

جيت السوق لقيت واحد من ……………. الوهم ديل جيعان وطماع .
كان بشتغل سجائر بالدس .
جريتو بعيد قلت ليهو اسمع
عندي ليك 150 كرتونه بي تصديق من النيابة .

ترقعني وترقع الضابط نسلمك ليها جوه القسم بي ورقها ..

الوهم طمع ما جيعان

كشيتو ليك القسم شاف السجائر وحسب الكراتين .

كبكابه طلع
وقف بعيد قال امش جيب الورق

قلت ليهو دي اجراءت حكومه
الورق بتخش انت للنيابه تستلم براك
هسي الضابط الواقف بعاين علينا داك هو البعمل ليك اللازم جيب القروش واقيف بعيد لمن اناديك .

وعشان يطمئن خليتو بحسب في (الضحاكات )ومشيت للضابط وقفت معاه شويه وجيت شلت من الفاره القروش ودخلت صالة القسم بعد وقفت مع الضابط واتخارجت بالباب التاني خليت الفاره منتظر ..

س
قلت للضابط شنو في المرتين ..

ج
المره الاولي سلمت عليهو وقلت الراجل دا مسكين عندو اخوه رايح عايز يعرف لو جابوه هنا .
ما خلي مستشفي ولا قسم ..

الضابط قال لي اخوه اسمه منو؟

جيت راجع للفاره صبنت القروش في جيبي ولطشت اسم من راسي قلتو للضابط قال لي شوف اليوميات جوه واتخارجت

..

21/
القروش كنت بتوديها وين ؟

ج
قمار
مش بقول ليك يذهب من حيث أتي ..

س..
ما كنت بتمشي بيها سبعه بيوت ..

ج
انا لقويه ما بدفع ليها قروش بدفعو الفارات .
باكل بالبونيه …

22/
طيب ما اتزوجت ليه ؟؟

ج
ما عايز مش حر

23

حاولت تحتال شيخ محمد الغرقان رحمه الله رغم انو كان بحسن فيك وبوكلك ويشربك وبديك مصاريف
كدي احكي لي القصة من اولها ..

ج
ضحك ثم ترحم علي خليفة الغرقان
وذكره بالخير ثم قال ..

يا الله …….. بنفس طويل

شيخ محمد ربنا بدخلو الجنه
اتخيل كان بعمل الاكل بي يدو للشماشه وال …….المجانين ومقاطيع ويديهم قروش
كان شبعان وبنفق عشان كده ربنا فاتحه عليهو

محمد صاحبي يا سلام
انا اتاثرت عليهو جدا
من مات القبه بقت مسيخه
اتصور كان بغسل المكسرين ويحممهم
انا بحبو شيخ محمد صاحبي .

ثم
قال

لكن كان مفتح وشفت
مره كنت مسخن مشيت جبت لي قويشات من السوق جوه من واحد صاحبي ومشيت بيهم لي لقويه قلت ليها عايز حبة خمره مسحت ليك القويشات بالخمره والمحلب وختيتهم في كيس والكيس في قطعه وتاني لفيتهم بي كم كيس .
وعطرتهم من بره .
ومشيت لي شيخ محمد في غرفته
قشيت دموعي قدامو
وقلت ليهو يا شيخ محمد امي عيانه ودايرين نعمل ليها عمليه

دا دهب حقها اشتري منها او خلي معاك وادينا قروش العمليه

يازول المكنه بعد قلت خلاص شالت .
بعد مسك مني الكيس وقال لي اقعد

شم الكيس وعاين لي كده
دخل يدو في جيبو رقعني بي مصاريف
وقال لي
قوم قوم دهب شنو انت ابوك تبيدي

ثم ضحك وقال
شفت شفت شيخ محمد

24

طيب يا جزيره قصة الدولار دي شنو ؟

ج
ايوه انا بحب جورج
ما عندي قروش غير دولار

25
هسي معاك كم ؟ وممكن تطلعها اشوفا

ج
جدا
معاي 8 الف دولار

طلع ملابسه الخارجية واخرج الدولار كما هو في الصورة ..

26
معاك جنيه سوداني كم ؟

ج
اعتدل في جلسته واخرج 10جنيهات وقال دي وساخه
ما بختها لي بكره

واستاذن
ثم غادر المكان

اربعة اسئلة تم حذها من هذه( الونسة )

لكونها تتعلق بسمعة غيره

والحمدلله الرجل الان في سبيل الاستقامة يعيش علي ذكريات يعتقد انها كانت جميلة .

ومهما كان الرأي فيه
فهو جزء من ثقافة كانت في الماضي القريب

حوار
عبدالرحمن مساعد‎
فيسبوك