الكواليس الخفية للخطوبة الملكية

تسيدت الاخبار قصة خطبة الامير هاري للممثلة الامريكية ميغان ..لكن الامر لم يتم بتلك السهولة التي ظهرت بها ..فقد كانت هناك صولات وجولات كشفت عنها مصادرنا بقصر باكنجهام ..حتى وافقت الملكة على دخول الممثلة الامريكية ذات الاصول العرقية المختلطة (طبعا دا اسم الدلع للاصول الافريقية تبعنا وكدا ) ..المقاطع التالية تخيلات للموضوع ..ماذا لو كانت الاسرة المالكة البريطانية ذات اصول سودانية ..اليكم السيناريو

مشهد اول :
تشارلز وزوجته كاميلا ..يجلسان على الشرفة وهما يحتسيان الشاي باللبن ..تتنهد كاميلا بصوت مسموع ..ينظر اليها تشارلز : في شنو ؟ مالك من الصباح ؟؟
كاميلا: مافي شئ …بس بتحسر على نفسي ..امك بالسنين ما عايزة توافق على عرسنا .قال شنو مطلقة ..انا يا يمة بت الحسب والنسب ..هسع قالوا عايزة توافق لي ولدك (هاري ) ..عشان يعرس الامريكية دي ..قايلانا ما عارفين اصلها ولا فصلها ..نحن يا ود امي .. عارفين القير والقعاقير.
تشارلز : عليك الله خلي النقة من الصباح ..قير شنو وقعاقير شنو ..انت من زمن الحاجات دي ؟ الدنيا اتغيرت ..ميغان دي ..ممثلة معروفة …وانسانة ناجحة
كاميلا تمصمص شفتيها قائلة : حليلك وحليل أيامك يا ادوارد الثامن ..ضيعوك ودروك ..وانت ما بتعرف صليحك من عدوك ..ما ياهو جدكم دا ..الاتخلى عن العرش عشان يعرس الامريكية المطلقة ؟؟ روح يا زمن ..وتعال يا زمن ..هسه ولدك عايز يعرس .. مش بس امريكية ..ومش بس مطلقة ..وكمان اكبر منو !!..دي يا يمة ..اهلها لي ورا قالوا فيهن ( …..)بس نقول شنو ….استغفرتك يا مالك روحي.
تشارلز يتمتم : قالوا فيهن شنو ؟؟ النظرة العنصرية دي …الملكة بقت افكارها تقدمية ..بعدين ..انت بس اصبري ..خليني امسك الحكم ..وتشوفي براك.
كاميلا تطلق ضحكة عالية : تمسك الحكم ؟؟ دا وين دا؟؟ ..امك عينها فيك انت ..اتنازلت عن جزء من المسؤوليات لي وليام ولدك ….يعني الكلام ليك يا المنطط عينيك
تشارلز مذهولا : تفتكري تقصد شنو بالحركة دي ؟
كاميلا : يعني انت ما عارف تقصد شنو ؟؟ الليلة ووب وتاني ووب
مشهد اخر
الملكة اليزابث مع زوجها فيليب ..الذي يدخن الشيشة بمزاج وهي تحتسي ( الجبنة .).
الامير فيليب: انت يعني بين وبينك كدا ..صحي ناوية توافقي الولد هاري دا ..يعرس البت دي ويجيبها هنا في القصر دا ؟؟ ..
الملكة : نسوي شنو لكن ؟ الولد ماشي يفضحنا ..زمان كانت الدنيا صغيرة والاخبار تمشي بالسيسي ..الليلة كان ما وافقت ليهو ..اصغر زول في الدنيا دي يكتب في صفحته الملكة فعلت والملكة تركت ..عشان كدا قررت اوافق ..انا بس ما شايلة هم الا لي زولة واحدة بس
الامير فيليب: منو ؟ كاميلا مرة تشارلز؟
الملكة : كاميلا؟ اخر الزمن كمان اشيل هم لي شماتة كاميلا ؟؟ ليه فوق كم ؟؟ انا شايلة هم بياترس ملكة هولندا ..كل ما نتلاقي تطاعني بالكلام ..عشان هي اتنازلت من الحكم لي ولدها ..تشيل وترمي في الكلام ..مرة تقول الناس قاعدة في الحكم لي شنو لاخر العمر ..مرات تقول كل عمر وليهو احكامهو ..مرات تقول هو الناس بتعمل ولي عهد ليه؟ وقت ما ناوية تتنازل ليهو ..اها بعد ما تسمع القصة دي تقول شنو علي؟؟
الامير فيليب متحدثا الى نفسه : تقول عليك اتعاديتي من المستعمرات حقتك …قاعدة في كرسي السلطة من المهد الى اللحد.
هنا يدخل الامير هاري مسرعا ..يقبل يد جدته ..ويقول : انا ما مصدق ..ابوي قال انتي موافقة اخطب ميغان
الملكة : نعمل شنو ..ما باليد حيلة ..البتجي من السما تتلقاها الواطة ..انا بس عندي شرط واحد
الامير هاري : اي شرط ..انت تأمري
الملكة : فطور العريس يجيني هنا في حوشي ..ما يمشي لي مرة ابوك بي هناك .

ناهد قرناص