إنت زول ياخ.. إنسان ياخ ما تنزل من مستواك ما تبقى “درداق وساخة” أكرمك الله !

أنا آسف.. بس أبلد زول في السوشيال ميديا هو الزول الشايل ليه إسكرين شوت واحدة والا إتنين والا مية داير يدين بيها شعب كامل أو قبيلة كاملة أو مهنة كاملة أو مشجعي فريق كروي كامل ومرات جندر بأكمله وينعتهم جميعهم بما شاء ويحكم عليهم بالـ “مؤبد الصفاتي” الفلاني أو العلاني !

إسكرين شوت والا إتنين والا عشرة لي شايقي يبقى خلاص الشوايقة أصلاً كدة، السوريين هناي، الرزيقات بتاعين شنو ، الجعليين والكواهلة هكذا، الهلالاب كدة ،المريخاب هناي ،النسوان أصلهن كدة الرجال بتاعين كدة، الفلسطينيين شعب مش عارف إيه، ناس مدني من الله خلقهم شنو ما عارف، بنات الأحفاد مش عارف إيه ، أولاد الإسلامية كلهم كذا وكذا، سكان كوكب عطارد هم أسوء خلق الله في المجرات، بنات الواقواق كلهن خفيفات.

يا عبقري إعلم أنه في كل شعب أو قبيلة أو مدينة أو فريق كروي أو حزب سياسي مجموعة من الحمقى يقومون بأفعال حمقاء وتصرفات شاذة هذا شيء طبيعي جداً، لكن من غير الطبيعي أن تتوقع أنت عدم وجود أمثال هؤلاء في كل كتلة بشرية، ده معناها إنك ما عارف طبيعة الأشياء ولا فاهم سوسيولوجا المجتمعات وتجهل أن موسى قد يخرج من بيت فرعون وأن امرأة لوط زوجة نبي عظيم .. فما في داعي تنشر جهلك وتبقى وظيفتك أنه ما أن سمعت بغراب عنصري كريه نعق في مكان ما إلا وتتبعته وقمت بنشر إسكرين شوت لما تفوه به من نتانة !

ليه ياخي حايم بالنجاسة الفكرية والعنصرية دي من مكان لمكان؟

هسي شغلة إيغار الصدور دي شغلة تؤجر عليها يعني وفرحان بي خيبتك دي كمان؟

وإنت قايل مافي حمقى تانين غيرك في الكون شايلين إسكرين شوتات لزول بليد أو موتور من اهلك أو من قبيلتك أو بلدك وحايمين بيها برضو؟.. شعورك شنو لما يعمموا خطيئة الزول ده عليك؟

زمان كان في رجال ونسوان شغلتهم في الحلة يمشوا لي ناس حلة ورا ياخي والله ناس حلة قدام قالوا فيكم كدة وكدة والعكس يحدث أيضاً، فتوغر الصدور وتتقطع الأواصر وتحدث الفتن.. أها ديل ناس الإسكرين شوت ذاااتهم بس نسخة ما قبل الحداثة.

إنت زول ياخ.. إنسان ياخ ما تنزل من مستواك ما تبقى “درداق وساخة” أكرمك الله !

سيد ولد بني آدم عليه الصلاة والسلام قال : من كان يؤمن بالله واليوم الآخر فاليقل خيراً أو ليصمت”.

القانون الإلهي واضح” ولا تزر وازرة وزر أخرى” و أجدادنا بقولوا كل شاةً معلقة من عصبتها، وده ألف باء تاء (عدل) .

بقلم
لؤي المستشار