أمي ..!!

تحت قدميكِ جنة ربي يا يُمة ..
أريت ترضي..
منك طالب الدعوات..
شان منى الكريم يرضى..
يغفر ليّا كُل الفات..
كل هفواتى والزلات..
في دار الخلود ألقاك..

تنعمي فى سِدِر مخضود..طلِح منضود..ظل ممدود..
عالي قصور..حولِك حور..كُلِك نور..
أنا القصرت فيك يُمة..
جيت الليلة كايسوا رضاك..
نسيت أُمي كل الفات..
تسعة شهور شقى وأهات..
أنين مسموع..
أبكي أنوح ولا من جوع..
عشان تصحى..

تبكي معايا من ألمي ..من عينيك سائلة دموع..
تسألى لله يشفينيي..يخليني..
أشوفك بُكرة إنت كبير..
تكبر ليّا تبقى سفير..
زي ودشمو تبقى وزير..
عند مولانا ما قاسي ..
تسوقني معاك..أطوف البيت..
أسأل ربي شان يديك..
كل الدايروا كان يرضيك..

يقسِم ليكا من فيضوا الوسيع يغنيك..
أكون مرتاحة فى قبري..
عافية وراضية يا ولدي..
عشان سيدى يرضى عليك..
رحمة ربى تغشاك يُمة..
أسأل ربى يغفر ليك..

بلا أقنعة – زاهر بخيت الفكي
صحيفة الجريدة