الضلع الرابع للدائرة

هاك اتعلم يا اسحق بدل الورجغة المامفهومة بتاعتك دي شوف البت دي ارجل منك واشجع منك بتقول الكلام عديل بدون لولوة ولا تخشى في قول الحق لومة لائم
بتتذكروا اطفال كأس جيم بتتذكروا الاطفال السمر النحاف العادوا من بعد هزيمه في اخر دقائق وحققوا فوز كاسح وفازوا بي كاس جيم ؟ بتزكروا كيف بكوا وانفعلوا مع العلم السوداني؟ يااخي بتتزكروا المدرب بتاعهم؟ الكان قاعد في الارض عيونوا ما بتفارق الميدان وسبحتوا ما فارقت يدوا؟ المدرب الكان قاعد طرف الملعب وروحوا وعقلوا وقلبوا مع اللاعبين ؟،الاطفال الكانوا بجروا لي مدربهم بي شعور ابوي كل ما احرزوا هدف؟ ،بتزكروا انهم اخدوا مكافاءت وجوائز واسمهم اتردد في الاعلام مقرون بي اسم السودان؟ الاطفال ديل قاتلوا ولعبوا واجتهدوا واحرزوا كاس ،كانوا فريق حقيقي بي روح فريق تدربوا واشتغلوا وتعبوا واصبحوا فريق ، الكاس السنه دي اتلعب تاااني طيب المفروض شنو؟ المفروض الفريق الجاب الكاس دا يمشي يلعب لي عدة اسباب اولا دا حقهم لانهم من صنع المجد ثانيا” هم بقى عندهم خبره تأهلهم اكتر من غيرهم للفوز ثالثا الانظار كلها حاتكون مركزه على حامل النسخه السابقه يبقى لازم يظهر الفريق بي مستوى لائق ربعا دا حقهم دا حقهم دااااا حقهم الحصل انو الاطفال ديل بعد ما رجعوا من قطر ما وقفوا تدريباتهم نفس الفريق نفس المدرب مع اضافة بعض العناصر الجديده وقبل السفر بي كم يوم جاهم قرار انو ما حايشاركوا ،ليه ماحايشاركوا؟ السودااان ما مشارك صرف المدرب اللاعبين ولغى التمارين بعد كم يوم ظهروا اولاد بي فل سوت في المطار وساكاهم الصحافه وتصوير واهتمام عجيب، مع العلم انو كاس جيم الاول (الجابوهوا الاولاد السمر النحاف) اللبسه اللعبوا بيها الاولاد (السمر النحاف) كانت تبرع من بعض ابناء الجاليه السودانيه في قطر، سافر المنتخب المزور ولعب مباريات مهزله اتغلب عشششره من الكويت عشره يخوانا وهو حامل اللقب واتغلب تاااني تسعه مااا هم ما نفس الفريق، هم اولاد اشخاص ما ،متنفزين قادرين يسرقوا مجد اطفال (سمر ونحاف) بي كل قوة قلب ناس قادرين يسرقوا الفرحه من اطفال،فرحه صنعوها براااهم ،الفرحه دي صنعوها الشفع ديل ليه تسرقوها منهم بي اي حق؟ انتوا سرقتوا فرحة ومستقبل اطفال فائزين انتوا هزمتوهم انتوا علمتوهم انوا الحق بضيع ولو وراو مطالب انتوا سوقتوا اطفالكم الغير مستعدين ولا جاهزين وهزمتوهم شر هزيمه حملتوهم عار ما حقهم العار حقكم المحسوبيه والانانيه وسرقة فرحة اطفال مستحيل تولد ابطال دا بثبت لي شئ واااحد والله الغلط مافينا والله نحن بخير العله فيكم انتوا بتسرقوا كل شئ وترجعوا مدمر كما السكه حديد اجدب كما الجزيره فاسد كما التقاوي مهزوم كما فريق كاس جيم مسروق كما ابطال كاس جيم كل الكفاءت تتم اقالتها واحالتها للصالح العام والعام هو انتم ونحن الهامش لصالح فريقكم المزور كل مؤهلاتوا انو تبعكم معاكم حقكم والمصيبه نحن من ندفع التمن انتم من اخطاء وسرق وافسد ولكن لازلتم اسياد السلطه والمال كل يوم تزدادوا غنى ونفوذ ونحن نذداد فقر ومرض والم حكومة الانقاذ لا اجد تعبير يصفكم اكتر من انتوا فقر وجبتوا لينا الفقر ما ان تضعوا اصابعكم على شئ حتى يتحول الى كارثه وهزيمه #ارحلوا شاهيناز القرشي

معقووول كلام اب لمبة ده حصل.. واسوداناه وامصيبتاه .. والله الموضوع عايز ثورة حقيقية على هذا الفساد العفن ان صدق اب لمبة.. بس كيف السبيل لمعرفة الحقيقة؟

حسبنا الله ونعم الوكيل …