هام جدا لمستخدمي الواتس.. الواتس اب يطلق ميزة الاتصال الضوئي

يا جماعة في حاجات غريبة جداً حايمة في الواتساب .. تدل على جهلنا – أو عدم معرفة الكثيرين مننا – بالتقنية أو ما يسمى بالثقافة الاعلامية (Media Literacy)

يعني مثلاً في رسالة متداولة يقول ليك تطبيق الواتس اب يطلق ميزة الاتصال الضوئي لتتمتع بانترنت مجاني بسرعات جنونية ومفتوح ولامحدود . أو يقول ليك: استخدم الواتس اب بدون انترنت من خلال ميزة الاتصال الضوئي .. ولمعرفة اذا كان جوالك يدعم هذه التقنية أضغط هنا .. أو يقول ليك : شاهد من قام بعمل حظر وبلوك لك ومن يراقبك على الواتس اب ويتابع حالتك ويشاهد صورتك الشخصية بإستمرار الان من هنا ..
وتحت الرسائل المغرية دي دايماً تلقى رابط لما تدخل فيه يقول ليك أرسل الدعوة لعدد 3 مجموعات أو كم شخص لكي تتمكن من تفعيل الخاصية .. وانت تقوم بكل حسن نية ترسل الرسالة وما تلقى أي شيء ..

في عدة أشياء بديهية حقو الناس تعرفها وتفهما كويس ..
أولاً:
إياك والتعامل بحسن نية مع كافة روابط ومواقع الانترنت .. واعرف تماماً إنو ما كل الناس طيبين زيك .. في مبرمجين وهاكرز الواحد فيهم يقعد شهر كامل عشان يخترع فيروس صغير جداً ويدسه في الروابط الانت بتدخلها بحسن نية ..

ثانياً:
ما في حاجة اسمها انترنت مجاني يجيك من الهواء كده أو تلتقطه زي موجات الراديو مثلا .. وما في حاجة اسمها اتصال ضوئي .. وقبل كدا لازم تعرف إنو مافي واتساب بيوفر لك انترنت .. لأنه بكل بساطة الواتساب عبارة تطبيق زيو زي باقي التطبيقات وبيعمل بالانترنت .. تماماً زي ما العربية بتشتغل بالبنزين .. حصل شفت عربية بتزود صاحبها بالبنزين ؟ ما حصل ولا ح يحصل ..

ثالثاً:
معروض نعرف إنو شركة الواتساب لما تضيف ميزة جديدة بتتفعل تلقائياً لما تعمل تحديث للتطبيق .. وإنو شركة الواتساب عمرها ما عملت لنفسها دعاية أو أرسلت رسالة أو طلبت دعوة أصدقاء أو نشر رسالة معينة في القروبات ..

طيب الهدف شنو من الرسائل دي ؟
الأهداف كثيرة .. الروابط دي بتكون ملغومة ومفخخة .. وانت لما تدخل فيها يكون تلفونك بقى تحت رحمة صاحب الرابط .. ممكن يسرق منك صور شخصية وعائلية أو معلومات يستفيد منها ويستغلك بيها أبشع استغلال ..

أو مرات كتيرة تلقى الواحد يقول ليك تلفوني دا بقى يعلق كتير رغم إنو جديد .. ما عارف من شنو !..
يا أخي تلفونك بيعلق من الروابط والمواقع دي لأنها بتزرع ملفات خبيثة (فيروسات) تخلي تلفونك بطييييئ .. وتضطر للفورمات وإعادة ضبط المصنع كل مرة عشان التلفون يستعيد عافيته ..

برضو ممكن تلقى فجأة تلفونك مسح بعض الصور أو حذف بعض المقاطع أو قائمة الأسماء .. والسبب هو الروابط دي ..

طيب الحل شنو ؟
الحل هو عدم إعادة نشر أو تبادل أي رسالة تتحدث عن تفعيل ميزة معينة في الواتساب .. لأنك لما تنشرها لعدد من القروبات بتكون كده عملت دعاية مجانية للفيروس وللهكر المجرم المختفي صاحب الرابط .. وبالتالي الفيروس يلقى فرصتو في الانتشار في أوسع نطاق وسط أحبابك واصدقائك بعدما اخترق خصوصية تلفونك..

وأخيراً .. أسالك بينك وبين نفسك :
عمرك لقيت زول قال ليك أنا شغال بانترنت مجاني ؟؟
أو قال لك أنا شغال بالاتصال الضوئي ؟؟
أو الواتساب عندي مجاني ؟
لا يوجد ..
إذن دي كلها خزعبلات وأكاذيب والمؤمن لا يلدغ من جحر واحد مرتين .. يكفي إنو الناس اتلدغت عشرات المرات ، وقبل كدا المؤمن كيس فطن يفكر مرة ومرتين وتلاتة قبل اتخاذ أي خطوة مهما كانت .. ما ينشر أي شيء أو يضغط على أي رابط مجهول ..

منقول من فيسبوك للفائدة