قفلوا (البلف) وقفلوا (الاستاد)

من رأسي :
بص الوالي بتاع (لجنة التسيير) طلع كلو (طلبة) الـ (28) عضو طلع فيهم (26) طالب…الناس ديل طلعوا (دعاية) ساكت ..ما عندهم اي قروش (شغالين بي نص القيمة). البص دا الزول الوحيد الشغال فيه هو عبدالصمد ..البقية كلهم (طلبة).
من كراسي :
تستوقفني الصفحات المثنيّة في كِتاب ، و الجُمل التي وضع أحدهم سطرًا تحتها. في الحبّ كما في الكتابة أنت تتعقّب آثار أحد!.
احلام مستغانمي
من مظاهر (التقشف) في المريخ ان (عبدالصمد) اصبح الرئيس الفعلي للمريخ ..واصبح (رمضان عجب) الذي كان يلعب في الموسم الماضي (طرف يمين) يلعب (مهاجما) ، وصار المدافع (ضفر) بيلعب (صانع ألعاب).
شفتوا ليكم (تقشف) اكتر من ان يصبح (ضفر) كابتن لفريق المريخ.
ناس مزمل ابوالقاسم اصبحوا (خوارج) في المجلس..عافي منك يا عبدالصمد لو قعدت (6) شهور تاني بتصبح (المدير الفني) للمريخ.
ناس مزمل ومحمد موسى من الليلة اسمهم (الخوارج).
خوارج (بص الوالي).
او خلونا نقول (طلبة) بص الوالي.
شغالين بـ (نص القيمة).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ومن علامات التقشف التعاقد مع مدرب اجنبي من غير اي (شروط جزائية) يمكن الاستغناء عنه في اي لحظة.
في مدرب عندو حاجة بيقبل بالشرط دا.
انتوا الزول دا جايبنو يسجل (ريحة البن) مع ناس محمود الجيلي وعاطف شمبات وود مسيخ.
انتوني هاي تم التعاقد معه للجلوس في (المقصورة) ، تقول جايبنو مصور في قناة النيلين.
التقشف الحاصل على المريخ اتعكس على (النجيلة).
النجيلة من العطش ..بقت زي (الفتة) بتاعة السليقة وقت ما تكون مرشوشة كويس.
حافه.
التقشف ظهر في حلاقة اكرا.
حلاقة اكرا دي ما حلاقة صوالين.
ظاهر عليها حلاقة قعاد تحت شجرة نيم.
حلاقة ضفر واضحة.
حلاقة الضل.
تقشف المريخ جعل (محمد الرشيد) لاعب اساسي في تشكيلة المريخ من اول اسبوع للاعب في المريخ.
وتقشفهم وصل مرحلة انهم بقوا يقولوا ليك المريخ فاقد (محمد الرشيد) عندما يتعرض الرشيد للاصابة او الايقاف.
بقوا يعتمدوا على ابراهيم جعفر.
تقشفكم يا ناس المريخ – خلاكم تلقطوا نقاط الدوري نقطة نقطة.
وكوفي حايم الليل كلو من قسم لي قسم.
والله غارزيتو اصلو ما غلطان عليكم.
هلال الابيض فاز على المريخ 5 / 1.
بعد مباراة المريخ امام هلال الابيض ..قالوا ليك في صحفي سأل كوفي عن السبب الذي جعل المريخ يخسر بهذه النتيجة الكبيرة؟.
كوفي رد سبب الخسارة لسوء ارضية الملعب.
علما ان المباراة في استاد المريخ.
استاد المريخ اصبح اسوأ من استاد النقعة.
السبب يا كوفي ما سوء ارضية الملعب – السبب حلاقتك دي.
بقيتوا تشكوا من (ارضية) ملعبكم.
هي حصلت؟.
عادي ناس المريخ يشكوا من ارضية استادهم – اذا كانوا هم بيشكوا من (حكامهم).
وبيشكوا من عبدالصمد.
نائب الرئيس.
وبيشكوا من علاءالدين يوسف وبكري وتراروي وسالمون (اولادهم).
عشان كدا عادي يشكوا من (حكامهم).
هم بيشكوا من (لعيبتهم)..و(نجيلتهم) ..غريبة عليهم يعني يشكوا من (حكامهم).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الغريبة قالوا المريخ عاوز يهرب من ملعبه.
عاوزين يهربوا من مباراة القمة.
قالوا ارضية الملعب غير صالحة.
غير جيدة.
عشان ما يلعبوا في استاد المريخ مباراة القمة.
عارفين الهلال في استادهم ما بتقابل.
ولا بتفاهم.
قالوا احسن يشيلوا الكورة من بدري.
المفارقة الغريبة – الهلال عمل ليه (3) طوابق في استاده.
وجاب ليه شركة صينية شغالة ليل ونهار.
الهلال عمل ليه مظلة طايرة.
بعد الحاجات دي كلها – الهلال ما قفل ملعبه.
المباريات شغالة في الاستاد – عادي جدا.
انتوا يا ناس المريخ عاوزين تقفلوا الاستاد عشان تسقوا (النجيلة).
قفلة البلف عرفناها.
قفلة الاستاد شنو كمان؟.
البلف عارفنو قفلو عبدالصمد – القفل الاستاد منو؟.
شغالين (تقفيل) كدا ..وشبكة المريخ (مفتوحة).
اقفلوا (المرمى)..بدل ما تقفلوا البلف.
اقفلوا (الشبكة) …بدل ما تقفلوا الاستاد.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
لكن برضو منطق.
احسن تقفلو الاستاد.
سادومبا متعود على استاد المريخ اكتر من تعوده على بيته.
سادومبا الاقوان البيجيبها في استاد المريخ – في التمرين ما قاعد يجيبها.
ادروب ولوف.
وسادومبا برضو.
سادومبا وقت لقى (اكرم الهادي سليم) مع الاهلي الخرطوم ما رحمو.
شاف اكرم قال إلّا يجيب قونو.
في الاهلي..في المريخ ..ما فارقة معاهو.
يا اكرم وقت مشيت الاهلي كان تحلق شعرك.
كان تقصو.
سادومبا ما كان بيعرفك.
وزي ما سادومبا عندو قون في استاد المريخ.
مهند الطاهر برضو نفس شيء.
مهند الطاهر محل ما يقابل المريخ بجيب فيه قون.
في الابيض.
في استاد المريخ.
مع الهلال الاب.
مع الهلال الابن.
قونو في المريخ (حصة ثابتة).
في الحضري..
في جمال سالم..
في رمزي صالح..
اي زول بلقى قدامو في مرمى المريخ بيجيب قونو فيه.
مهند الطاهر ناس المريخ حاولو يضللوه جابو ليه المعز محجوب.
مهند الطاهر برضو جاب فيه قون.
مهند قال ليهم انا في الحتة دي ما بفرق جمال سالم من المعز محجوب.
كلهم عندي واحد.
البلقاه كلو واقف في مرمى المريخ ..بجيب فيه قون.
الهوبة ثابتة.
المحيرني الشيخ موكورو العلمو الحركات دي منو؟.
الشبكو في الشبك دي شنو؟.
جاب ليه 3 اقوان في المريخ – قرب يطلع هداف الدوري الممتاز من مباراة واحدة.
زول يجيب ليه ربع دستة اهداف في شبكة المريخ.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عاوز اقول ليكم حاجة اخيرة.
ختوها حلقة في (ودنكم).
بشه ما فارقة معاه كتير.
تلعبوا مباراة القمة في استاد المريخ.
في استاد الخرطوم.
في دار الرياضة.
في ميدان عقرب.
في اي حتة ..بشه عندو قون ثابت في المريخ.
في جمال سالم.
في الحضري.
في رمزي صالح.
في اكرم الهادي سليم.
كلهم سجل فيهم.
…………….
و
الدعوات والاماني ان ينجح الهلال في تحقيق الانتصار اليوم على مريخ الفاشر في النقعة.
بشه الليلة في النقعة.
بشه عندو كلام.
مباراة اليوم مباراة بشه.
بشه في الحتات الزي دي ما قاعد يتفاهم.
ان شاءالله الليلة الهلال يطلع بالنقاط الثلاث من النقعة ويتبقى له فقط نقطة واحدة للتتويج ببطولة الممتاز.
اليوم كان جمعة.
والامة مجتمعة.
والهلال منتصر ان شاءالله.
دعواتكم ..(النقعة) دي ما مضمونة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
خلونا نتم الفرحة عصرا.
بكرة فرح جديد.
……….
السيدة (ل) – عيونك ديل لو عملوا فيهم (ترباس)..ما في زول تاني بيلقى ليه (فيزا) للهجرة.
وقرّط على كدا.