بتختوا نفسيكم في اماكن بايخة
• لو الواحد سأل سؤال محرج شوية – فيه حاجة…
• الزول تامن يوم في العيد ممكن يدخل على (العدس) ، وإلّا الموضوع دا عليه شوية؟؟.
• من كراسي:
• عندما ذهبت رئيسة وزراء فرنسا (اديت كريسون) الى لندن قالت: الشعب البريطانى اكثره من الشواذ … ففى كل مرة إلتفت ورائى ، لا اجد احداً يتابعنى بعينه مع ان لي ساقين جميلتين … وكان رد (مرجريت تاتشر): هذا الذي يفعله البريطانيون نسميه الادب.
• انيس منصور
• بابكر سلك امس اعترف ..وكشف الحاصل وقدم مشاعرهم بكل صدق وامانة.
• انتوا يا هلالاب لو شفتوا الوضعية العايش فيها الوصيف هذه الايام – تحمدوا الله على نعمة (الهلال).
• مرتاحين..وبالكم رايق .. وما عندكم اي مشكلة وفارق النقاط اصبح (12) نقطة ..والطابق الثالث في الجوهرة على مشارف النهاية.
• احمدوا الله بس.
• الله يديمها نعمة ويحفظها لينا.
• تتخيلوا وانتوا في النعيم دا كلو في ناس وضعهم يحنن.
• حالتهم صعبة.
• ظروفهم كعبة.
• سلك قال (بقينا نضرّبها).
• زي الموظف البيصرف ليه (750) جنيه في الشهر ..وساكن اجرة وعندو 3 اطفال في المدارس.
• اتارينا انا الايامات دي كل ما القى لي مريخابي في الشارع بلقاه قاعد يتكلم براهو.
• بحسب في شنو ما عارف؟.
• الناس ديل شغالين جنس (لولوة).
• ما خلوا ليهم (احتمال).
• جربوا كل الاحتمالات..بما في ذلك فوز هلال كادوقلي في كل المباريات القادمة.
• ناسنا ديل ..والله احتمالات (النيل شندي) وضعوها في الحساب.
• لو كدا ..بيحصل شنو؟.
• ولو حصل دا ..الوضع بكون كيف؟.
• زي الزول الجاب ليه (لمبة)…قام ركبها في الصالون.
• بعد ما ركبها في الصالون ..قال يطلعها يركبها في الحوش يشوف البحصل شنو؟.
• يركبها في الحوش ..يقول احسن اركبها في المطبخ.
• يركبها في المطبخ..يقوم يجيبها (البرندة).
• يحول فيها من مكان لي مكان بحثا عن (الاضاءة) الاعلي.
• زولكم ما عاوز يدفع ويجيب ليه (لمبة) تانية.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ولسه يا سلك ..(بص الوالي) ح يخليكم تحسبوها راكب ..راكب.
• طالب .طالب.
• شوفوا اعترافات سلك الجميلة : (ومن مظاهر الهوان الذي الم بنا – اصبحنا كلما نجتمع نقعد نضرب -اذا الخرطوم غلب كورتين وفقد كورة بعمل كم- هلال الابيض عندو تلاته كور في بلدو لازم يخسر الكورة البره بلدو- اهلي شندي اسي لو درن معانا ببقى التاني هو ولا نحنا- وضربنا كل الاحتمالات – و وصلنا لسقف نقاط الخرطوم الوطني وهلال الابيض واهلي شندي – ده كلو ليس خوفا من فقدان المركز التاني- ولكنه خوفا من فقدان فرصة تمثيل السودان افريقيا – اصلن اربعه فرص – فهل نستحق واحدة منهن ؟؟؟ – يا لها من مهانة نعيشها واقعا).
• دا كلام سلك براهو.
• الكلام دا كلام سلك…(الاوضاع من الداخل).
• دي حسابات الجماعة.
• شوفوا الوضع وصل بيهم وين؟.
• ذكرتوني بي حالتكم دي (موظف)..كل يوم بيجي يشيل ليه (طحنية) بي (5) جنيه من الدكان بالجرورة وبمشي على كدا.
• ما بزيد ليه حاجة فوق (الطحنية).
• الموظف وقت يجي اول الشهر ..بيجي يقول لبتاع الدكان حسابك كم؟.
• بتاع الدكان بقول ليه حسابك 1950 جنيه.
• الموظف بقول ليه : ليه انا قاعد اشيل منك شنو غير (الطحنية) دي؟ ..عشان الحساب يصل الرقم دا.
• سيد الدكان بقول ليه : انت قايل (الطحنية) ساهلة؟؟!!.
• قايلها حاجة شوية.
• ناس المريخ هسع نفس الشيء.
• بشيلوها (طحنية) وبعدين وقت تجي ساعة الحساب بتبقى ليهم حارة.
• الكتوف اتساوت بين هلال الابيض واهلي شندي والمريخ العاصمي والخرطوم الوطني.
• نحن عارفنهم – جماعتنا ديل لو ما لقوا ليهم (لجنة استئنافات) بيقعدوا يحسبوها كدا.
• والله يا سلك ..انت هسع بتحسبوها خوفا من فقدان المركز الثاني ..انا خايف حساباتكم دي توصلكم فقدان المراكز الثالث والرابع.
• يعني ممكن السنة دي (الكونفدرالية) ذاتها ما تمثلوا فيها.
• لكن ما عندكم مشكلة .. سيكافا جاهزة.
• سيكافا دي لو طلعتوا برة العشرة الاوائل ممكن تشاركوا فيها.
• ما تشيلوا هم ساكت.
• بعدين خلوها على الظروف.
• ما تقعدوا تحسبوها كدا.
• بتجيكم (نفسيات) ساكت – لو حسبتوها بالصورة دي.
• لو لقيتوا ليكم اتحاد (عاد) ليكم مباراة او اتنين ..ما بتصلوا للحالة دي.
• انتوا عارفين الهلال لو ما انحسب الموسم الماضي من الممتاز كان (اعادة) المباريات بتاعة المريخ لي وقتنا دا شغالة.
• اي مباراة يخسروها يعيدوها ليهم.
• شفتوا (الانسحاب) عمل شنو؟.
• رفع الفارق لـ (12) نقطة.
• تتخيلوا مع الاعادات دي ..والبطولة (الملح) التى منحها الاتحاد الموسم الماضي بغير حق للمريخ ..اعلام المريخ في الموسم الماضي كان بهاجم في مجلس اسامة ونسى.
• هسع الفارق بقى (12) نقطة ..زول قال ليه كلمة واحدة في جمال الوالي ما في.
• البتشجع شديد ..ويكرب بطنو ويقوي عينو بقوم يهاجم عبدالصمد.
• ابعد من كدا ..ما عندهم طريقة.
• لكن للحقيقة سلك الايامات دي بجرد ليهم في الحساب.
• سلك قال ليهم بالواضح كدا : (ايها الناس – الكذب لن ينجينا – والحق هو ما يخرجنا من هذه الورطه – من هذا القاع الذي لم نكن يوما نتوقع ان نتقوقع فيه – يجب ان لا نضاري – ماهي ايجابيات مجلسنا منذ توليه المهمة؟؟ – واين الذين كانوا ينادون بانقاذ المريخ من الذي يحدث حاليا مع العلم بان المريخ في زمن مناداتهم لانقاذه كان افضل من الذي نعيشه اليوم بمليون مره – خسارة دورية واحده وتعادلات – ثم توالت الخسائر).
• اشمعنا.
• يا حليل اسامة ونسى.
• اسامة ونسى كان رحمة بالنسبة لجماعة ديل.
• جماعتكم الموسم الماضي لو النسور اتعادل مع الاهلي الخرطوم بيطلعوا يهاجموا اسامة ونسى.
• اسامة ونسى سلمكم المريخ والفارق (4) نقاط من الهلال.
• هسع الفارق بقى (12) نقطة في مجلس بتكون من 28 عضو.
• والمشكلة ..المريخ بقى في منافسة واضحة مع هلال الابيض.
• منافسهم بقى اهلي شندي.
• فكوا الهلال ومسكوا ليك في الخرطوم الوطني.
• بقوا يتابعوا ليك مباريات الخرطوم الوطني واهلي شندي وهلال الابيض ..عشان مصيرهم مربوط بهذه المباريات.
• والله الايامات دي نحن ارتحنا.
• بقى ما في زول شغال بينا.
• الهلال لاعب مع منو ما جايبين خبر؟.
• انجمينا في عضمنا دا.
• المريخ بقى بنافس في الخرطوم الوطني وهلال الابيض واهلي شندي.
• تاني ما في حاجة بتلمنا بيكم.
• الكلام دا حالتو قبل ما نعمل الطابق الثالث.
• وقت نعمل الطابق الثالث ..تاني ما نسمع لينا زول يقول المريخ (ند) للهلال.
• إلّا هلال الابيض.
• شوفوا الناس القدركم.
• ألعبوا بعيد.
• خلونا نحن نفكر في منافسة الاهلي المصري.
• الترجي التونسي.
• مازيمبي.
• الوداد المغربي.
• ما في حاجة بتلمنا معاكم.
• انتوا من طريق ونحن من طريق.
• المنافسة في الدوري هسع كلها من اجل (الوصافة).
• المركز الاول اتحسم.
• اتحسم من قبل (6) اسابيع.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• في ريحة لبن مقنن.
• لبن شنو؟..
• ما تشتغلوا بالكلام دا.
• مرات بجيب لي حاجات برة العمود.
• ………..
• و
• منتخب الناشئين شرفنا بنتيجة جيدة امام الكاميرون.
• ان شاءالله المنتخب يتأهل للنهائيات.
• نملك القدرة للوصول للنهائيات.
• الاهلي شندي انتصر امس على مريخ الفاشر.
• وانتصر النيل شندي على الرابطة كوستى.
• وشندي تتقدم نحو المركز الثاني.
• ونحو البقاء في الممتاز بالنسبة للنيل.
• مريخ كوستي نفسه فاز على الاهلي الخرطوم.
• والاهلي الخرطوم زي المريخ بخت نفسو في اماكن بايخة.
• اليوم ان شاءالله الهلال قادر على الفوز الكبير في الفاشر.
• موعدنا بكرة باذن الله مع فرحة (عصرية).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• …………..
• السيدة (ل) – حفظت جدول تلاتة صم ..عشان اول ما اقابلك اشيل رقم تلفونك.
• وقرّط على كدا.
دق الدلجة
