يا بكري لو عاوزهم يشطبوك تعال ليهم التمرين بي (سماعة) طبية

من رأسي :
ناس ولاية الخرطوم بكونوا متوقعين (المطرة) لمن تنزل ليهم تنزل ليهم بي (مجاريها) وتصاريفها.

وبكونوا متوقعنها تنزل ليهم كمان بي (سندوتشات) طعمية حارة مع (الزيفة) دي.

من كراسي:
(النجاح هو الإنتقال من فشل إلى فشل ،، دون ان نفقد الأمل).

ونستون تشرشل

بكري المدينة (هلالابي) على (السكين).
سكينو في ايدو.
بشاكل في الهلال.
كم مرة في الهلال كان شايل (سكينو).
ما في اي زول بقول اي كلمة في الموضوع دا.
اي زول طبعا عارف مشكلة بكري المدينة القروش.
بسبب (المال) ترك بكري المدينة الهلال – وحقيقة نحن عاذرنه ، طالما نحن بنتكلم عن الاحتراف.
انتوا يا عالم عاوزين اللاعب يطبق ليكم كل نظريات الاحتراف ..يكون منضبط وملتزم وبيسمع الكلام ومن يطالب بي حقوقه الناس تتقلب عليه.
اللاعب من يتكلم عن القروش ..يقعدوا يتحدثوا عن الولاء والانتماء والفانلة.
يتأخر عن التمرين …يقولوا ليك اللاعب دا ما محترف.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المحترفون الذين يلعبوا في الهلال والمريخ اي محترف فيهم بتأخر ليه (مرتب) بيمشي اهلو.
لو نقصت من مرتبه قرش ما برضى.
تلفون ما برد عليه.
تراوري نموذجا.
سالمون ذاتو نموذج.
يعني الموضوع وقف على بكري المدينة؟؟.
بكري المدينة انتقل للمريخ لكن مازال (هلالابي) ، الدليل على ذلك ان اللاعب اليوم والتاني بيعمل ليه مشكلة.
نفسو مرقت من الكورة.
بكري المدينة في موسمين سجل ليه تلاتة اهداف فقط.
اهداف ضفر في موسم واحد اكتر منه.
فوق دا كلو ومع هذا الشح في الاهداف ..بكري المدينة يوماتي بيعطي ليك المريخاب في الدروس.
شغال على كيفو.
ولا في زول بقدر يسأله.
ولا في زول بقدر يقول ليه حاجة.
زي الطالب الابوه (مدير المدرسة).
يغيب على كيفو.
ويسقط في الانجليزي.
وما يحلق شعرو.
وما في زول في المدرسة بقدر يقول ليه شيء.
بكري المدينة هسع بيعمل في نفس الشيء.
عاوز يسافر بيسافر.
عاوز جوازو بشيلو.
عاوز يلعب بيلعب في المباراة التى يحددها هو.
ما عاوز يلعب ما بيلعب.
بكل هذه الاشتراطات والطلبات وقوة الرأس …ناس المريخ ما قدروا يعملوا ليه اي حاجة.
مجلس فيه (28) عضو ..ما قدر يعمل ليه حاجة.
الايقاف رفعوه بـ (تمثيلية) مكشوفة.
وفي النهاية اللاعب شال جوازه وسافر القاهرة.
فيكم زول قدر يقول حاجة.
بكري المدينة بيعمل في الحاجات دي وبيرهب ليك في المريخاب عشان حاجة واحدة.
عشان يفكوه.
عاوز يتخارج.
او يقعد في البيت زي هيثم مصطفى وتراوري وسالمون الى ان عقده ينتهي مع المريخ.
انتوا الحركات دي يعني غريبة عليكم.
يا بكري المدينة انت لو عاوز تخلص من الجماعة ديل تعال ليهم شايل (سماعة) طبية.
تعال ليهم بي (روب) طبي.
الجماعة ديل عندهم عقدة من (الطب).
طبيب المريخ وقفوه من غير اي ذنب ..بس عشان اكتشفو (هلاليته).
مشكلتهم معاه انه (هلالابي) ..ومع انه هلالابي (طبيب).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
انت يا بكري المدينة الشرط الاول متوفر عندك – هلالابي على (السكين).
ما في ذلك شك.
اثبت ليهم بس انك (طبيب).
اليوم التاني بيشطبوك.
تعال ليهم التمرين شايل ليك (سماعة).
في اليوم ذاتو مجلس الادارة بيجتمع في ليلو وبيشطبك.
سماعة شنو؟.
(حقنة) ساكت ممكن تشيلك من كشوفات المريخ.
درب بيطيح بيك.
انت قايل علاءالدين يوسف قنعو منو ليه؟.
عشان صاحبو طبيب بيطري.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عشان كدا طبق ليهم الخطة (ب).
الخطة (أ) ما عملت حاجة.
تعمل ليك مشكلة مع عضو مجلس …ما بيسألوك.
تطلع من المعسكر ..ما بقولوا ليك شيء.
تغيب من التمارين …ولا بيشتغلوا بالموضوع.
لكن لو شافوك شايل ليك (حبة بندول) ساكت …بيلحقوك طبيب فريق المريخ السابق.
لكن بيني وبينك مع ناس عنكبة وعبده جابر ديل لو فتحت ليك مستشفى خاص …ما بقدروا يخلوك.
هجوم فيه عبده جابر وعنكبة …مجبورين يستحملوا بكري المدينة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المريخ الايامات دي شغال متل الزول القاعد يبني ليه في بيت وما عندو قروش.
كل 6 شهور ينزل ليه 500 طوبة.
المريخ الايامات دي بفوز بي هدف بعد تلتلة.
بعد طلاع روح.
على الامير فازوا بي (هدف) بعد (6) شهور اعمال شاقة.
وجاء الخرطوم الوطني وفاز على الامير 7 / 1.
شبكونا ليك فريق الامير بقى خطير.
وبلة جابر نجم المباراة.
الامير جاء خسر من ثالث الدوري بسبعة اهداف.
امس المريخ بي التلتلة نفسها فاز على النسور بعد ولادة متعسرة.
فرد هديف.
الامير والنسور الاتنين بتذيلوا روليت الدوري الممتاز.
الطريف ان المريخ سوف يلعب الاسبوع القادم مع المتذيل الاخر النيل شندي.
انتوا الاندية المتذيلة دي بتجيبوها من وين؟.
نحن من هلال كادوقلي الى هلال الابيض.
من مريخ نيالا الى الاهلي (مدني وشندي).
بنلعب مع المقدمة.
وبيلعبوا مع الاندية المتذيلة.
وبعد دا بفوزوا بي هدف وحيد.
وبطلعوا فرحانين بي كدا.
المريخ في الاسابيع القادمة وقت يدخلوا على الغريق بفهموا حاجة.
هسع اقعدوا ألعبوا لي مع (الحمام) دا.
ناس الخرطوم الوطني وهلال الابيض وهلال كادوقلي ومريخ نيالا في انتظاركم.
معقولة يا عالم من مريخ كوستي الى الامير بحري.
ومن الامير الى النسور.
ومن النسور الى النيل شندي.
جنس راحات.
مبارياتكم دي زي جدول الامتحانات وقت يبدأ بي الانشاء والقراءة الصامتة.
الانجليزي والرياضيات والكيمياء والفيزياء ..راجياكم قدام.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
جماعتكم ديل مع الامتحانات الساهلة دي بمروا بي حق الحكومة.
فرد هديف.
تامنها حكام.
هسع عليكم الله الاجواء دي جو هدف وحيد.
نحن لو لقينا المطرة دي نغلب سبعة.
الخرطوم الوطني لقت المطرة غلبت سبعة.
انتوا غالبين واحد.
…………
و
بكرة مباراة مهمة امام الهلال في مدني.
العودة من مدني بالنقاط الثلاث …المطلب الاول.
اي نتيجة غير الانتصار تبقى مرفوضة.
بعد مباراة مدني ..تأتي المهمة الاصعب في شندي.
نطلع من عقبة لي عقبة.
الله ينصر الهلال اينما لعب.
الاجواء في مدني هذه الايام بتكون مثالية.
بس الله يمرقنا من المطرة يوم المباراة.
المباراة القادمة مباراة كاريكا ان شاءالله.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………
السيدة (ل) – سمعنا للمطرة جدول تلاتة.
وقرّط على كدا.