تعال أسمع..!!

هُـم قـالوا الإسـم مُحـال يفـارق سيـدوا
زارع كان أبوك ياكُل حلال من إيدوا
حامِد ربُه شاكر مال بالحرام ما بزيدوا
والزول مهما عاش لابُد منيتوا تصيدوا
*****
عيش العُمُر يا خوي زيّك وزيّ الناس
الخافوا المولى سيدُم الخالفوا الوسواس
كُن صادق صدُوق تبقى التقوى ليكا لباس
أظفر بذات الدين أخشى العِرِق دسّاس
*****
الفقُر ما عيب لا توطيلوا أبداً راسك
لا تنكسِر لي زول يحسِب عليك أنفاسك
أخشى خالق الكون أعمل حساب حُراسك
رقيب معاهوا عتيد الديمة هُم جُلاسك
*****
أصبر عليها الدُنيا أمسك شديد في الله
والشكوى لي غيروا واللهِ فيها مذلّة
أسألوا بابوا فاتح يغنيك بالدهب والغلة
يديك بت الحلال زينة بنات الحلة
*****
كان أبوك ياخوي عايشلوا في راكوبة
موية بير شرابوا كِسرة وبليلة لوبة
تمّ المية عُمروا لا قاس ضغِط لا رطوبة
لمّن جاهوا يوموا وسدّناهوا نحن الطوبة
*****
اتغيّرت شايفك تب بِقت حِلتنا ما سايعاك
من شُفت البنادِر جيت والحالة ما عاجباك
خايفين عليكا تفوت وين تاني عاد نلقاك..؟
تبلعك المدينة تنسانا نحن وراك
*****
صابرين عليها حياتنا عامرة ديمة بيوتنا
ما اتجزّعنا تب ما عدِمناهوا في يوم قوتنا
خلّيكا إنت معانا في الحلة أوعى تفوتنا
في أفراحنا نلقاك..في لماتنا لا عِند موتنا