بكري المدينة (اتشقلب) عليهم براهم

من رأسي :

الزول البيحب (الترطيبة)…لو مشى الجامع عشان يصلي بتلقوه واقف قصاد (المكيف).

يشوف المكيف الشغال ويقيف قصادو.

زي (الاستوبر).
من كراسي :

( تزوجا في بيت قصديري بين الفقراء و الآن يعيشان في البيت الأبيض و يحكمان العالم ونحن مازلنا نسأل المقبل على الزواج : ماهو عملك؟ كم راتبك؟ ما نوع سيارتك؟ هل لديك منزل؟).

احلام مستغانمي في حديثها عن اوباما وزوجته

سنة 1968 قالوا ليك البلد دي كان فيها (سخانة) مبالغة.
سخانة تلحم.
المروحة ما بتشتغل إلّا بالدفرة.
لو فتحت ليك (شباك) ساكت ، بتلقاه لحس ليك (الكهربة) كلها من العداد.
لو عاوز ليك (ربع لوح تلج) ، إلّا تشتري ليك (4) الواح تلج …عشان تضمن ربع اللوح يصل ليك البيت.
الجدادة قالوا سنة 68 كانت لمن تبيض بيضتها بتكون (مسلوقة).
تقشرها وتاكلها.
سخانة شديدة.
قالوا ليك السماكة وقت يرموا شبكتهم في البحر …السمك البطلع ليهم من البحر …نصو بكون حرقان.
والسمكة الما حرقانة …بكون (ضنبها) محروق.
انتوا قايلين (الساردين) دا جاء من وين؟.
ما جاء من (الفكرة) دي.
تفتحوا في (عيونكم) متل القميص الما فيه (زراير).
ما عاوز ازحمكم ساكت بي سنة 1968.
انتوا مالكم ومال سنة 68م.
احسن ادخل ليكم في الموضوع طوالي – بدل ما اسل ليكم روحكم ساكت في السخانة دي.
لكن يا مصعب عمر …(رمضان) ظهر فيك بي شكل.
ظهور عجيب.
انت والنعسان …رمضان ما خلى فيكم حاجة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نشوف الفي الكتاب.
احسن ليكم من (التلتة) دي.
زمان في حلتنا كان في زول اسمو (الطيب عضم).
اسمو كدا (الطيب عضم) –انا اعمل ليه شنو؟.
الرقم الوطني حقو بالاسم دا.
الطيب عضم دا …بتذكر كان كل يوم لمن يجي راجع العصر من الشغل بكون شايل ليه (كيس) معاهو.
يمكن عدم موضوع.
ويمكن علم.
ما بقدر احدد ليكم.
فترت من (التحديد).
اي حاجة انتوا إلّا يحددوها ليكم.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
الطيب عضم (كيسو) دا مرة بكون فيه (موز).
ومرة بكون فيه (بصل).
ومرة (رغيف).
ومرة (باسطة).
ومرة (دكوة).
ومرة (طماطم).
ومرة (بلح).
اصلو ما برجع البيت كيسو فاضي.
ولا بالغلط.
وكان كل حاجة بيكون شايلها بقعد ينظر لينا فيها.
بيديك فيها (حصة).
يعني لمن يكون شايل ليه (موز)…بيقنعك ..ويقول ليك والله الليلة السوق فيه (موز) سمح خلاص.
سمح وكمان (رخيص).
بكريتها بكون شايل ليه (بصل).
بقول ليك نفس الشيء …والله الليلة السوق فيه (بصل) قُلاد.
البصلة قدر كدا!!.
ورخيص كمان.
اليوم التالي بكون شايل ليه (باسطة).
بقول ليك والله الليلة السوق فيه (باسطة) ، اسكت خليها ساكت.
يشهيك في (الباسطة).
الطيب عضم …شغال معانا كدا بس.
ما عندو (حنك) غير الكلام دا.
الطيب عضم دا ذكرني ليك هسع بي ناس المريخ.
نفس النظرية الجلحات المجنبة.
شفع الزمن دا اي واحد فيهم عمل ليه واتساب وجلحات.
الله يسألني (الواتساب) بقى قبل (الجلحات).
زمنا …(الجلحات) دي ما بتتعمل بالساهل.
ممكن تعمل ليك (لوري تراب)…ما بتعمل ليك (جلحات).
ما عارف؟…يمكن تكون الوساطات دخلت في الجلحات ..قاموا ظهروا لينا بالشكل دا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
تتخيلوا ناس المريخ بيلعموا في نفس الاشياء الكان بيعمل فيها الطيب عضم.
الخالق الناطق.
المريخاب ديل …وقت سجلوا (بكري المدينة) طلعوه ليك اخطر مهاجم في افريقيا.
قالوا ما في منو اتنين؟.
اي واحد فيهم يقول ليك زول سريع شديد.
والله تفكو …تاني ما تلم فيه.
هسع وقت تفك ليك (50) جنيه ..بتلقى ليك فيها (قرش).
ما بتعرفها مشت وين؟.
لمن تشك في (جيبك).
تقول انتوا الجيب دا مقدود وإلّا شنو؟.
المريخاب وقت وقفوا بكري المدينة ..طلعوه ليك زول اي كلام ..وما بنفع ..وغير منضبط.
املاء ما بعرفها.
انضباطو عاوزين بيه شنو انتوا؟.
انتوا عاوزين تشغلوه (ساعة).
المريخاب علاءالدين يوسف القائد …والشايل الفريق طلعوه ما عندو اي حاجة..واعتبر قرار معقابته قرار (تاريخي).
شوف الناس الما عندهم كلمة ديل.
تاريخي في شنو؟.
ديل شدة ما عندهم موضوع …محمد الرشيد لاعب الاهلي عطبرة السابق ..طلعوه لينا افضل لاعب في التسجيلات.
وقالوا ليك تسجيلات اسامة ونسى هي الافضل على الاطلاق.
طيب وقت تسجيلات اسامة ونسى عاجباكم كدا …شيالينو مالكم؟.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
بكري المدينة (العقرب).
بكري المدينة (اتشلقب).
بكري …
بكري…
بكري بي المديدة.
بكري بدون مديدة.
بكري في شارع مدني.
بكري برة الشارع.
ما خلوا ليه اي حاجة.
العقرب.
العقرب.
العقرب قلبت عليهم.
بكري المدينة قام (اشتقلب) عليهم.
قالوا خطاب الاستدعاء رفض يستلمو.
قال ليهم انتوا قايلني انا جايكم من وين؟.
انتوا جيتكم من (الهلال).
خطاب الاستدعاء دا ودوه لي مصعب عمر.
ضفر.
انا ما تجيبوه لي.
الـ (28) عضو – شعرو ليك كرامتهم اتجرحت.
عشان كدا اتخذوا قرار الايقاف.
الايقاف دا ما عشان المريخ.
الايقاف دا عشان بكري المدينة جرح ليهم كرامتهم.
28 عضو ..ما اشتغل بيهم.
غايتو يا بكري المدينة اخذت لينا حقنا بالكامل.
زمان نحن كنا بنلومك عشان نطيت من كلمتك مع الكاردينال.
هسع انت الـ (28) عضو ما عملت ليهم قيمة.
العمم.
والجلاليب.
والرتب الكبيرة.
والمول.
والنادي الاجتماعي.
والفندق.
ما اشتغلت بيهم الشغلة.
انا عارف…
من الاول انا عارف…
بكري المدينة دا بعد ما شاف (الجوهرة الزرقاء) ما بقعد ليكم تاني.
بكري المدينة في مباراة القمة الاخيرة …اتخلع بالجوهرة.
شعر ليك بي روحو ضائع ساكت مع الجماعة ديل.
كمان (الجوهرة الزرقاء) ما عندها سعرها.
علاءالدين يوسف ذاتو قدامها بقى ضعيف.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………

و

يا ربي مامون ابوشيبة قال شنو في قرار الايقافات دا.
ابوشيبة ممكن يعتبر القرار مدسوس من (لجنة الحكام).
ويمكن يعتبر الكاردينال ايدو واصلة في لجنة تسيير المريخ.
لجنتكم دي تقول شكلها ليكم اشرف الكاردينال.
الهلالاب اكيد افتقدوا صحيفة (الاسياد)….في هذه الايام.
افتقدنا الزملاء في (الاسياد) ..اقلامهم وكتاباتهم ورأيهم في البيحصل الايامات دي في المريخ.
نتمنى ان تعود (الاسياد) سريعا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..
السيدة (ل) – تقطيع النجيلة ليس دليل على انك مخلصة وزولة خجولة شديد.
وقرّط على كدا.