حسن فاروق : الرئيس شغال شنو؟

مرات كده بطلع سؤال من واحد يكون بفكر ويفكر ويفكر يقوم يطلع ليك بسؤال انت الرئيس شغال شنو؟ والرئيس المقصود الرؤساء السياسيين، وحسب التفاسير لمنصب الرئيس معروف انه الرئيس موظف دولة، وقبل كده خادم الشعب، ده وصف الرئيس السياسي، وفي هذه المساحة يهمنا الرئيس الرياضي، رئيس مجلس ادارة نادي، رئيس اتحاد كورة، او رئيس لجنة تسيير حكومية (معينة) بقرار سياسي، والاخير ده موضوعنا اليوم، الناس مشغولين بكورة هلال مريخ، ونحن شاغلنا الرئيس شغال شنو؟ الناس مركزة مع امم اوروبا للمنتخبات، ونحن شاغلنا الرئيس المعين بقرار سياسي لتسيير لجنة حكومية شغال شنو؟ كان ممكن اكتب عن مفارقات غريبة وسط احاديث كتيرة عن تراجع الاهتمام بالكرة السودانية، وكيف انه التركيز اصبح مع الكرة الاوروبية والعالمية، وكيف ان ملعب الهلال وملعب شندي كانا ممتلئين في توقيت اقيمت فيه احدي مباريات امم اوروبا، ولكني مشغول بحكاية الرئيس شغال شنو؟ وكان ممكن اكتب عن سحب مباراة القمة بين الهلال والمريخ (بكره) البساط من المباريات الاوروبية بالتركيز الجماهيري والاعلامي الكبير، وان مباراة الغد الاوروبية لن تجد المشاهدة المطلوبة او بمعني تاني (مابتنافس) في المشاهدة مهما علت قيمة المنتخبين المتباريين في ذات توقيت مباراة الهلال والمريخ، لكن برضو مشغول بحكاية الرئيس شغال شنو؟؟؟.
كلام كتير ممكن يتكتب عن كورة القمة، وحال القمة، ومنشطات القمة، وفيتامين القمة، وحكام القمة (اجانب ولا وطنيين)، والسر في بير بتاع لجنة التحكيم المركزية وانه ماف زول حا يعرف اسم الحكم الا وهو داخل علي ارض الملعب، لكن برضو شنو زي مابقول صديقي حافظ الماحي، موضوع الرئيس شغال شنو،مهم وشاغلني شغلة شديدة، وشايف الاتحاد السوداني لكرة القدم مطلع قرارات صارمة واجراءات امنية مشددة تصل مرحلة التفتيش الشخصي للمشجعين، ومنع اللافتات والشماريخ وقائمة طويلة من الممنوعات، الكلام زي ماقلت كتير عن مباراة الهلال والمريخ، الاجواء، التوقعات، القراءات، ومن ستضحك له المجنونة، لكن ده كلو ما اهم عندي من حكاية الرئيس شغال شنووو؟
لانه هلال مريخ ما حاتكون الاولي ولا حاتكون الاخيرة، لكن الرئيس شغال شنو عايزه شرح لانها ممكن تكون اول وآخر مرة، يكون مامعروف شغال شنو، وللماعارفين طبعا جمال الوالي مابحب الاجتماعات،وطوال 13 سنة اجتماعات مجالسه المختلفة بصيغة المبالغة ممكن تكون اقل من اجتماعات لجنة التسيير المقالة، قام عمل شنو المعين رئيسا للجنة حكومية من اجل تسيير النادي بانقلاب معلن علي اهلية وديمقراطية الحرطة الرياضية وذبحها في وضح النهار، كمية كم اللجان لتساعد لجنة مكونة لتسيير الشأن الاداري والفني لفترة شهور (ستة شهور)، ممكن نتخيل الصورة .. لجنة حكومية كونت لجان لمساعدتها، وقالوا تاني ماف اجتماع للجنة الحكومية، الاجتماع فقط للجان المساعدة للجنة الحكومية الاغتالت الديمقراطية وحولت المريخ لنادي يستجدي الرؤساء (في زول سمح بنادي بتسول رئيس) ده المريخ وعشان مانظلم المريخ ديل الاستلفو لسان المريخ واتكلموا باسموا وجروا يمين وشمال وقالوها في وسائل ياناس يا الفوق ادونا رئيس لو ما جمال واحد زي جمال .
وادوهم جمال .. عينو ليهم بقرار حكومي واي زول مشي قال ادونا جمال او اقنع جمال بقبول رئاسة اللجنة دخل اللجنة، زي حكاية مشو يخطبوا عقدو ليهم ، ديل مشوا يتوسطوا دخلوهم اللجنة .. ده كلو ولسه ماعرفنا الرئيس شغال .. ننتظر ونشوف .. اواصل.