يا مازن شمس الفلاح بتلبس كم؟

شنطة (الدمورية)…وباقى (القضا) الفي العيون…والشارع الفيه شوية ناس..بتضحك (اعمدة الكهربة) فيه من غير سبب.
والموية المدفقة.
وفانلة (السقط)…اكمامها وسخانة.
وكتاب الجغرافيا الما فيه (غلاف)…
وقروش الفطور الناقصة (وما رضيان بيها)…
وفسحة الحصة الرابعة….
وانت بين بين وبين…
عندك احساس (الخميس) دا تاني ما بيجي.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
و
القُعّاد في (الحيطة)..
والجلوس على (الشباك)..
والغنا في (الدرج).
يربوها لمن (الناظر) يجي طالع من مكتبه.
بين الحصة والحصة ما في اجمل من الغناء لابراهيم عوض (ليه بتسأل عني تاني).
(وكنت معاك سعيد والليلة في بعدك ما اضناني)..
طلبة زمان كان عندهم (عقلية) في موظفين الايامات دي ما في..
زيت (الزلابية) الما بطلع من اليد..
وكراس الاملاء الاصلو ما بتملي.
واستاذ العلوم ..جرس نهاية الحصة بعد ما يضرب ما بطلع من الفصل.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
ايام..
باب الزنكي..
وشباك الخشب..
وقلم الحبر…قدر ما تكون حريف بتلقى ايديك اتملن حبر…
والعيد من يكون فاضل ليه 55 يوم ..بتكون انت قاعد تفكر في (الجلابية).
والشبط الجديد…
ايامكم..
في الابتدائي زمان – والى وقت مرحلة الاساس الآن ..وقت تسأل (التلميذ) يا ولد انت في الصف الكم؟.
التلميذ بكل براءة بقول ليك ماشي (خامس).
او ماشي (تالتة).
ما في (طالب) بقول ليك (الفصل) الذي هو فيه في الوقت الذي تسأله فيه – دائما بقول : (بعد الاجازة ما تنتهي ح امشى المستوى السادس).
او سابع.
وعشان يثبت ليكم كلامو بيأخد ليه (شبه) عشان يؤكد ليك انو كبير.
وانو قدر الكلام البقول ليك فيه.
الحكاية دي ذكرتني ليك بي مازن شمس الفلاح – عمل ليه مشكلة واعتراض وجاط الدنيا كلها عشان نزلوه من الفريق الاول الى (الرديف).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مازن شمس الفلاح وهو في مهمة (وطنية) وخارج البلاد – عمل ليه (جوطة) وقومة وقعدة ، وادخل ليك بعثة المريخ في مدرسة.
قال ما بيلعب.
ولا بنزل من الغرفة.
انت يا حاتم محمد أحمد وقت هائج كدا ..وفائر ما كان احسن توقف مازن شمس الفلاح في حده بدل الاعتداء (الغاشم) على حكم المباراة.
وقت عندكم (حماس) قدر دا – ما كان تعملوه مع مازن شمس الفلاح.
ولاءالدين ووليد الشعلة في الخرطوم حولهم الهلال الى (الرديف) من الفريق الاول ، ما في واحد فيهم قال حاجة.
ما في اي اعتراض.
ما في اي غضب.
ولا كلمة.
رغم ان ولاءالدين ووليد الشعلة اتوا للهلال وهم (نجوم) من الاندية التى يلعبون فيها (الاهلي) مدني والخرطوم.
مازن شمس الفلاح اصلا هو لاعب صعد للفريق الاول من (الرديف).
ولا في زول بعرفو قبل المريخ.
يعني مفروض مازن شمس الفلاح الموضوع ما يكون (غريب) عليه وما تبقى ليه صعبة لهذا الحد.
خاصة ان مازن لا في مستوى ولاءالدين ولا في مستوى وليد الشعلة عشان يعمل كل هذه المشاكل.
مسيرة مازن شمس الفلاح مع المريخ تخللها صراعات وخلافات دائمة.
في بداية هذا الموسم رفض مازن شمس الفلاح السفر مع المريخ الى معسكره في اثيوبيا بحجة انه لم يستلم حافز تسجيله من المريخ.
وقتها كان راجي عبدالعاطي وامير كمال قد اشاروا الى ان الكبار في المريخ ما شالوا حقوقهم يعني بقت على مازن شمس الفلاح.
هو مازن ولد متين؟.
مازن شمس الفلاح اجبر مجلس المريخ يشيل حقو ..ثم لحق بمعكسر المريخ بعد ذلك.
قبلها كان مازن شمس الفلاح مشاركاته مع المريخ مجمدة بسبب انه يلعب بكرت شقيقه في المنتخب.
لاعب صاحب المشاكل والصراعات في كل المواسم.
هذا الموسم اصطدم مازن شمس الفلاح اكثر من مرة مع مجلس الادارة والجهاز الفني.
حتى كان رفضه المشاركة في تمارين المريخ في المغرب بسبب تحويله لكشف الرديف.
واضح ان مازن شمس الفلاح لا يطيب له المقام في المريخ.
هو مثل ابراهومة ينتظر انتهاء فترة قيده مع المريخ ..والمغادرة.
يمكن مازن شمس الفلاح يكون عاوز يمشي هلال الابيض.
المريخ ما واقع ليه.
ويمكن يكون عاوز يمشي الخرطوم الوطني.
المهم يمرق من المريخ.
ويمكن عاوز يمشي (شبيبة القيروان).
المهم عندنا مازن شمس الفلاح ما عاوز يقعد في المريخ.
ناس المريخ مفروض يفهموا الكلام دا.
ما يبقى دمهم تقيل كدا.
الزول دا ما عاوزكم.
الزول دا احتك معاهم في (قضايا) تثبت عدم رغبته في اللعب في المريخ.
انتوا يا ناس المريخ الزول دا إلّا يتلب ليكم من الطابق الرابع.
الزول دا إلّا يلبس ليكم (الكسكتة).
الموضوع واضح.
الموضوع فيه (شيبوب).
نصف لاعبي المريخ ..اصبح لا يطيب لهم المقام في المريخ.
اثبت هذا شيبوب.
والوك ..يؤكد ذلك الآن.
وابراهومة ومازن على نفس الطريقة.
احسن مازن شمس الفلاح ..تقنعو منو.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
مدرب الهلال الروماني بلاتشي – طبعا عندو (حركات).
عندو شغل بعرفو براهو.
بلاتشي ..قالوا اي لاعب عاوز يسجله الهلال اول حاجة بيسأل عن مقاس (الحذاء) الذي يلبسه.
اهم حاجة عندو مقاس الحذاء.
لقى مقاس الحذاء (مشاتر)…بلاتشي ولا بجامل…لو بقيت (ميسى) ما بتلعب معاه.
بعرف كورة اللاعب من مقاس الحذاء.
عشان كدا – تحت تحت ..قالوا بلاتشي سأل من مقاس حذاء مازن شمس الفلاح.
يا مازن لو مقاسك في الحذاء (47) شوف ليك نادي نادي.
نحن المقاس دا ما بنفع معانا.
بلاتشي كان قد ابعد (محترف) من اختبارات الهلال الفنية حسب اخبار الصحف لأن مقاس حذاء المحترف كان كبيرا.
هسع مازن شمس الفلاح في مرحلة (مقاس الحذاء).
انت وحظك يا مازن.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
و
انضمام النجوم الدوليين للمنتخب ..فيه خير للهلال.
وبالتأكيد الخير كله للوطن.
انضمام الدوليين للمنتخب سوف يتيح الفرصة لوجوه جديدة في الهلال.
عاوزين نشوف ناس شيبوب والريدة.
لاعب في قيمة شيبوب كيف لا يكون في المنتخب.
شاهدوا شيبوب في اول ظهور في الهلال ..تاني يوم ح تلقوه في المنتخب.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………
السيدة (ل) – جرحك كبر ، لمن بقى حاجة تانية.
وقرّط على كدا.